06 ޖޫން 2018 - 08:09
ފިލްމަކަށް އެއްބަސްވާ އިރު ބޮޑަށް ބަލަނީ ނުކުޅެވޭނެ ކަމަށް އަމިއްލަށް ގަބޫލު ކުރާ ކަހަލަ ރޯލްތަކަށް ކަމަށާއި ބޭނުން ވަނީ ޗެލެންޖިން ރޯލްތަކެއް ކުޅެން ކަމަށް ޒުވާން އެކްޓަރު ސުޝާންތު ރާޖްޕޫތު ބުނެފި އެވެ.
ޓީވީ ސިލްސިލާތައް ކުޅެފައި، ބޮލީވުޑަށް ނުކުތް އެކްޓަރުންގެ ތެރެއިން އެންމެ ކާމިޔާބު އެކްޓަރަކީ ވެސް މިހާރު ސުޝާންތެވެ. "ޕަވިތުރަ ރިޝްތާ" ފަދަ ޓީވީ ސިލްސިލާތަކުން ހޯދި މަޝްހޫރުކަމާ އެކު، އޭނާ ބޮލީވުޑަަށް ނުކުތީ 2013 ވަނަ އަހަރު ފިލްމް "ކައިޕޯ ޗޭ" އިންނެވެ.
އޭގެ ފަހުން ސުޝާންތު ކުޅުނު މޮޅު ފިލްމްތަކުގެ ތެރޭގައި "އެމްއެސް ދޯނީ: ދި އަންޓޯލްޑް ސްޓޯރީ"، "ޑިޓެކްޓިވް ބިޔޮމްކޭޝް ބަކްޝީ" އަދި "ޕީކޭ" ފަދަ ފިލްމްތައް ހިމެނެ އެވެ.
އޭނާ އެންމެ ފަހުން ފެނިގެން ދިޔަ ފިލްމަކީ ބޮކްސް އޮފީހުގައި މާ ބޮޑު މަގުބޫލު ކަމެއް ނުލިބުނު "ރާބްތާ" އެވެ. އެކަމަކު އެ ފިލްމަކީ ވެސް ސުޝާންތުގެ ވަރަށް ތަފާތު ރޯލެއް ފެނިގެން ދިޔަ ފިލްމެކެވެ.
އުމުރުން 32 އަހަރުގެ އެކްޓަރު ބުނި ގޮތުގައި އޭނާ ބޮޑަށް ޝައުގުވެރި ވަނީ ވެސް ކެރެކްޓާތަކަށް ވަރަށް ބޮޑަށް ތައްޔާރު ވާން ޖެހޭ ކަހަލަ އުނދަގޫ ރޯލްތައް ކުޅޭށެވެ.
"އެކްޓިންއަކީ އަހަރެންގެ ޕެޝަނެއް. އެހެންވެ ފިލްމަކަށް ވަގުތު ދިނުމާއި އެއަށް ކުރަން ޖެހުނު ކޮންމެ ކަހަލަ މަސައްކަތެއް ކުރަން ޖެހުމަކީ އަހަރެން ޖެހިލުން ވާނެ ކަމެއް ނޫން،" ސުޝާންތު ބުންޏެވެ. "އެހެންވެ ސްކްރިޕްޓަކަށް އާއެކޭ ބުނާ އިރު އެންމެ ބޮޑަަށް ބަލާ ކަމަކީ އަހަންނަށް ނުކުޅެވޭނެ ކަމަށް ގަބޫލު ކުރެވޭ ކަހަލަ ރޯލްތަކަށް އެއްބަސްވެެގެން އެ ރޯލަކަށް މަސައްކަތް ކުރުން."
އޭނާ ބުނި ގޮތުގައި އެކްޓަރަކަށް ލިބޭނެ އެންމެ ބޮޑު ހިތްހަމަޖެހުމަކީ ވެސް ބުރަކޮށް މަސައްކަތްކޮށްގެން، ފިލްމްގެ ޑައިރެކްޓަރާއި މުޅި ޓީމް އުފާވާ ކަހަލަ ހުނަރެއް ދައްކައިލަން ފުރުސަތު ލިބުމެވެ.
ސުޝާންތު ބުނި ގޮތުގައި ކުޅޭ ފިލްމްތައް ފްލޮވުމަކީ ވެސް އޭނާ އެހާ ކަންބޮޑުވާ ކަމެއް ނޫނެވެ.
"އަހަރެން ގަބޫލު ކުރަނީ ކާމިޔާބީއަކާ ހަމައަށް ދެވޭނީ ނާކާމިޔާބީއާ ވެސް ކުރިމަތިލައިގެންކަން. ވަކިން ހާއްސަކޮށް އެކްޓަރެއްގެ ކެރިއަރުގައި އަބަދު ވެސް ކާމިޔާބީ އާއި ނާކާމީޔާބީ އޮންނާނެ،" ޝުދް ދޭސީ ރޮމޭންސް ވެސް ކުޅުނު އެކްޓަރު ބުންޏެވެ. "އެހެންވެ ފެއިލިއާއަކީ އަހަރެން އެހާ ބިރު ގަންނަ އެއްޗެއް ނޫން."
ސުޝާންތު ކުރިއަށް ހުރި ފިލްމްތަކުގެ ތެރޭގައި ޖެކްލިން ފެނާންޑޭޒާ އެކު ކުޅޭ "ޑްރައިވް" އާއި ސާރާ އަލީ ހާން ބޮލީވުޑަށް ތައާރަފުވާ ފިލްމް "ކޭދަރްނާތު" އާއި ބޫމީ ޕެޑްނޭކަރްއާ އެކު ފެނިގެންދާ ފިލްމް "ސޯން ޗިޅިޔާ" ގެ އިތުރުން "ޗަންދާ މާމާ ދޫރް ކޭ" ވެސް ހިމެނެ އެވެ.
އަދި އޭނާ ވަނީ "ޑަންގަލް" ގެ ޑައިރެކްޓަރު ނިތޭޝް ތިވާރީގެ އާ ފިލްމަށް ވެސް ސޮއިކޮށްފަ އެވެ.