30 މެއި 2018 - 09:18
އަނެއްކާ ވެސް ކޮމެޑީ ފިލްމެއް ކުޅެލަން ބޭނުންވާ ކަމަށާއި އެ ޖޯންރާއަކީ އޭނާ ވަރަށް ގަޔާވާ ވައްތަރުގެ ފިލްމްތަކެއް ކަމަށް އެކްޓަރު ޖޯން އަބްހަރަމް ބުނެފި އެވެ.
ޖޯންގެ ކޮމެޑީ ރޯލްތައް ފެނިފައިވާ ފިލްމްތަކުގެ ތެރޭގައި "ގަރަމް މަސާލާ"، "ހައުސްފުލް 2" އަދި "ވެލްކަމް ބެކް" ހިމެނެ އެވެ.
މިހާރު ސިނަމާގައި އޮތް އަދި މިދިޔަ ހުކުރު ދުވަހު ރިލީޒް ކުރި ޖޯންގެ އެންމެ ފަހުގެ ފިލްމް ތުރިލާ/ޑްރާމާ އަށް ބޮކްސް އޮފީހުގައި ބޮޑު ތަރުހީބެއް ލިބެމުން އަންނަ އިރު، އޭނާ ބުނީ އަމިއްލަ ފިލްމް ކުންފުނި ޖޭއޭ އެންޓަޓައިންމަންޓުން ކޮމެޑީ ފިލްމަކަށް ތައްޔާރުވަމުން އަންނަ ކަމަށެވެ.
"ކޮމެޑީ ފިލްމެއް އަމިއްލަ އަށް އުފައްދައި، އެ ފިލްމް ކުޅެން އަހަރެން މިހާރު ވަރަށް ބޭނުން،" ވިކީ ޑޯނާ އާއި މެޑްރާސް ކެފޭ ފަދަ ފިލްމްތައް ވެސް ޕްރޮޑިއުސް ކުރި ޖޯން ބުންޏެވެ. "މާ ދުރު ނޫން މުސްތަގުބަލެއްގައި ކޮމެޑީ ފިލްމެއް ގެނެސް ދޭނަން."
އޭނާ ބުނި ގޮތުގައި ރަނގަޅު ސްކްރިޕްޓަކަށް ފިލްމެއް ހަދައިފި ނަމަ ކޮންމެ ވައްތަރެއްގެ ފިލްމެއް ވެސް ބެލުންތެރިން ބަލައިގަންނާނެ އެވެ. އަދި "ޕަރްމަނޫ" އަކީ އޭގެ މިސާލެއް ކަމަށް ބުންޏެވެ.
އެހެންވެ މިހާރު ފިލްމަކަށް އެއްބަސްވާ އިރު، އެންމެ ބޮޑަށް ބަލާ ކަމަކީ ވެސް އޭގެ ސްކްރިޕްޓް ކަމަށް 45 އަހަރުގެ އެކްޓަރު ބުންޏެވެ.
ޖޯންގެ ކުރިއަށް ހުރި ފިލްމްތަކުގެ ތެރޭގައި ހުރީ ވަރަށް ސީރިއަސް ކޮންސެޕްޓްތަކަށް ހަދާ ފިލްމްތަކެވެ. އޭގެ ތެރޭގައި ސަތިޔަމޭޖް ޖަޔަތޭ (އެސްއެމްޖޭ)، ރޯމިއޯ އަކްބަރު ވޯލްޓާ (ރޯ) އަދި "ބަޓްލާ ހައުސް" ހިމެނެ އެވެ.
ޖޯން ޕްރޮޑިއުސްކޮށް ގެނެސް ދިން "ޕަރްމަނޫ" އަށް ކްރިޓިކުން ވަރަށް ބޮޑަށް ތައުރީފުކޮށްފައިވާ އިރު، މި ފިލްމަކީ ކޮންމެހެން ވެސް ބަލައިލަން ޖެހޭ އަދި އިންޑިއާ މީހުންގެ ހިތްތަކުގައި ގައުމީ ލޯބި އުފައްދައި ދޭނެ ވަރަށް ވެސް ފުރިހަމަ ފިލްމެއް ކަމަށް ކްރިޓިކުން ބުނެފައިވެ އެވެ.
އަބިޝެކް ޝަރްމާ 50 ކްރޯޑްގެ ބަޖެޓުން ހެދި ފިލްމަށް ބޮކްސް އޮފީހުގައި މިހާތަނަށް ވަނީ 30 ކްރޯޑް ރުޕީސްއާ ގާތް ކުރާ ވަރުގެ އާމްދަނީއެއް ލިބިފަ އެވެ.
މީގައި ދައްކުވައި ދެނީ 1998 ގައި އިންޑިއާގެ އަސްކަރިއްޔާ އިން ކުރާ ނިއުކްލިއާ ޓެސްޓަކާ ގުޅިގެން ދިމާވާ ކަންތައްތަކެކެވެ.