28 މެއި 2018 - 13:53
ކުރީގެ ރައީސް މައުމޫން އަބްދުލްގައްޔޫމްގެ އޮފީހުގެ މުވައްޒަފެއް ކަމަށްވާ ނަޖުމާ އިބްރާހިމާއި މައުމޫންގެ ޕްރައިވެޓް ސެކިއުރިޓީއެއް ކަމަށްވާ މުހައްމަދު އަޒްމީގެ ޝަރީއަތް މާދަމާ ފަށަން ކްރިމިނަލް ކޯޓުން ހަމަޖައްސައިފި އެވެ.
ނަޖްމާ އާއި އަޒްމީ މިދިޔަ ފެބްރުއަރީ މަހު ހައްޔަރުކުރީ ސަރުކާރު ވައްޓާލަން ރައްޔިތުންގެ މަޖިލީހުގެ ބައެއް މެމްބަރުންނަށް ރިޝްވަތުގެ ފައިސާ ދިން ކަމަށް ތުހުމަތުކުރާ މައްސަލައާ ގުޅިގެންނެވެ. އެ މައްސަލައާ ގުޅޭ މުހިންމު ހެކިތަކެއް ހުރި ކަޅު ފޮއްޓެއް ނަޖުމާގެ ގެއިން ފެނުނު ކަމަށް ފުލުހުން ކުރިން ބުނެފައިވެ އެވެ.
އެ މައްސަލާގައި އެ ދެ މީހުންނަށް ކުރަނީ އަދުލު އިންސާފު ގާއިމުކުރަން ހުރަސް އެޅުމުގެ ދައުވާ އެވެ. އެ ދައުވާ ސާބިތުވެއްޖެ ނަމަ ހަތަރު މަހާއި 24 ދުވަހުގެ ޖަލު ހުކުމެއް އަންނާނެ އެވެ.
ނަޖްމާ އާއި އަޒްމީ މިހާރު ވެސް ތިބީ އެ މައްސަލާގައި ބަންދުގަ އެވެ. އަޒްމީ ޖަލު ބަންދުގައި ހުރި އިރު ނަޖުމާ ހުރީ ގޭ ބަންދުގަ އެވެ.