25 މެއި 2018 - 18:13
އެމްސްޓެޑަމް (މެއި 25) - މެލޭޝިއާ އެއާލައިންސްގެ ފްލައިޓް އެމްއެޗް17 ވައްޓާލުމުގެ ޒިންމާ ރަޝިޔާ އިން އުފުލަން ޖެހޭނެ ކަމަށް އޮސްޓްރޭލިއާ އާއި ނެދަލެންޑްސް އިން ބުނެފި އެވެ.
ނެދަލެންޑްސްގެ ފޮރިން މިނިސްޓަރު ސްޓެފް ބްލޮކް ވިދާޅުވީ އެމްއެޗް17 ވައްޓާލުމުގައި ރަޝިޔާ އިން ފުރިހަމަ އަށް ޒިންމާ އުފުލަން ޖެހޭ ކަމަށް ގަބޫލް ކުރާ ކަމަށެވެ. އަދި ބޯޓު ވައްޓާލި މައްސަލާގައި ރަޝިޔާ ޒިންމާ ކުރުވުމަށް ފިޔަވަޅުތައް އަޅަމުންދާ ކަމަށް ވެސް ވަނީ ވިދާޅުވެފަ އެވެ.
އެމްއެޗް17 އަށް އެރި މިސައިލް ފޯރުކޮށްދީފައި ވަނީ ރަޝިޔާގެ އަސްކަރިއްޔާ އިން ކަމަށް ބައިނަލްއަގުވާމީ ތަހުގީގު ޓީމުން ފުރަތަމަ ފަހަރަށް އިއްޔެ ވަނީ ބުނެފަ އެވެ. އެކަމަކު އެމްއެޗް17 ވައްޓާލުމުގައި އެއްވެސް ރޯލެއް ނޯންނާނެ ކަމަށް ރަޝިޔާ އިން ވަނީ ބުނެފަ އެވެ. ރަޝިޔާގެ ޑިފެންސް މިނިސްޓްރީން ބުނެފައި ވަނީ ހޮލެންޑްގެ ތަހުގީގު ކުރާ ފަރާތްތަކުގެ ރިޕޯޓް ދޮގު ކުރާ ކަމަށާއި އެމްއެޗް17 އަށް ހަމަލާ ދިނުމަށް އެއްވެސް ބާވަތެއްގެ ހަތިޔާރެއް ފޯރުކޮށްދީފައި ނުވާނެ ކަމަށެވެ.
ނަމަވެސް ބައިނަލްއަގުވާމީ ޖޮއިންޓް އިންވެސްޓިގޭޝަން ޓީމުން ބުނީ އެމްއެޗް17 އަށް އެރި މިސައިލް ބަކް-ޓެލާ މިސައިލް ފޯރުކޮށްދީފައި ވަނީ ރަޝިޔާގެ ކާސްކްގައި ގާއިމްކޮށްފައިވާ 53 ވަނަ އެންޓި-އެއާކްރާފްޓް މިސައިލް ބްރިގޭޑުން ކަމަށެވެ. ބޯޓަށް އެރި މިސައިލް ފޮނުވާލާފައި ވަނީ އިރުމަތީ ޔޫކްރޭނުގެ ސަރަހައްދަކުން ކަމަށް ވެސް ބުނެފައިވެ އެވެ. އެއީ ރަޝިޔާގެ ކޮންޓްރޯލް އޮންނަ ހަނގުރާމަވެރިންގެ ބާރު އޮތް ސަރަހައްދެކެވެ.
"53 ވަނަ ބްރިގޭޑަކީ ރަޝިޔާގެ އަސްކަރިއްޔާގެ ބައެއް،" ތަހުގީގު ޓީމުގައި ހިމެނޭ ހޮލެންޑުގެ ވިލްބާޓް ޕައުލިސަން ނޫސްވެރިންނާ ވާހަކަ ދައްކަވަމުން ވިދާޅުވި އެވެ.
މެލޭޝިއަން އެއާލައިންސްގެ ބޯއިން 777ގެ ބޯޓު ވައްޓާލީ 2014 ވަނަ އަހަރު އެވެ. އެމްސްޓެޑަމުން ކުއާލަ ލަމްޕޫރަށް ދަތުރުކުރި ބޯޓަށް ވައިގެ ތެރޭގައި ދިން މިސައިލް ހަމަލާގައި ބޯޓު ގޮވައި އެ ބޯޓުން ދަތުރުކުރި 298 މީހުން ވަނީ މަރުވެފަ އެވެ. ބޯޓުން ދަތުރު ކުރި މީހުންގެ ތެރޭގައި ހޮލެންޑުގެ 193 މީހުން، މެލޭޝިއާގެ 43 މީހުން އަދި އޮސްޓްރޭލިއާގެ 27 މީހުން ހިމެނެ އެވެ. ބޯޓުން ދަތުރު ކުރި އެހެން މީހުންގެ ތެރޭގައި އިންޑޮނީޝިއާ، އިނގިރޭސި ވިލާތް، ބެލްޖިއަމް، ޖަރުމަން އަދި ފިލިޕީންސް މީހުން ވެސް ހިމެނެ އެވެ.
އެމްއެޗް17 އާ އެއާ ޓްރެފިކް ކޮންޓްރޯލްއާ ގުޅުން ކެނޑިފައި ވަނީ ރަޝިޔާ އާއި ޔުކްރޭނުގެ ބޯޑަރާ 50 ކިލޯ މީޓަރު ދުރުންނެވެ.