25 މެއި 2018 - 14:32
މެލޭޝިއާގެ ބޮޑު ވަޒީރުގެ ކުރީގެ ނައިބު އަންވަރު އިބްރާހިމް، ރައީސް މުހައްމަދު ނަޝީދުގެ ސިޔާސީ ހަޔާތުން ފިލާވަޅުތަކެއް ހޯދެއްވި ކަމަށް އަންވަރުގެ ދަރިކަނބަލުން ނޫރުލް އިއްޒާ އަންވަރު އިއްޔެ ވިދާޅުވެއްޖެ އެވެ.
މެލޭޝިއާގެ ކުރީގެ ބޮޑު ވަޒީރު ނަޖީބު ރައްޒާގުގެ ވެރިކަމުގައި 2015 ވަނަ އަހަރު ޖަލަށް ލި އަންވަރު، އެ ގައުމުގެ ވެރިކަން ބަދަލުވެ މިނިވަންވުމާ އެކު، ރައީސް ނަޝީދު ވަނީ އެ ކަމަށް މަރުހަބާ ވިދާޅުވެ ޓްވީޓެއް ކުރައްވާފަ އެވެ.
އަންވަރާއި އަނބިކަނބަލުން ވާން އަޒީޒާގެ އިތުރުން ދަރިކަނބަލުން ނޫރުލް އިއްޒާ ޓެގްކުރައްވައި ނަޝީދު މިދިޔަ ހަފުތާގެ ބުދަ ދުވަހު ކުރެއްވި ޓްވީޓްގައި ވިދާޅުވީ ގޮތް ދޫނުކޮށް އެ ކަމެއްގައި ސާބިތުވެ ހުރެއްޖެ ނަމަ ރަނގަޅު ގޮތް މެދުވެރިވާނެ ކަމަށެވެ. މެލޭޝިއާ ރައްޔިތުންގެ އެހީތެރިކަމާއެކު އެ ބޭފުޅުން ކާމިޔާބު ހޯދައިފި ކަމަށާއި އެކަމަށް މަރުހަބާ ދަންނަވާ ކަމަށް ނަޝީދު ވިދާޅުވި އެވެ.
މެލޭޝިއާގެ މަޖިލީހުގެ މެމްބަރުކަންވެސް ކުރައްވާ އިޒާ، ނަޝީދުގެ އެ ޓްވީޓަށް ރިޕްލައި ކުރައްވައި ވިދާޅުވީ ނަޝީދު މަސައްކަތް ކުރެއްވި ގޮތަށް އަންވަރު ވެސް މަސައްކަތް ކުރައްވައި ނަޝީދުގެ ފަރާތްޕުޅުން ފިލާވަޅު ލިބިގެންނެވި ކަމަށެވެ.
ކޮރަޕްޝަންގެ ބޮޑެތި ތުހުމަތުތަކަކާއެކު މެލޭޝިއާގެ ކުރީގެ ބޮޑުވަޒީރު ނަޖީބުގެ ވެރިކަން ބަދަލުވި އިރު އެކަމުން ރާއްޖޭގެ އިދިކޮޅު ފަރާތްތަކަށް ބޮޑު އުފަލެއް ލިބުނެވެ. އިދިކޮޅު ފަރާތްތަކުން ބުނަމުން ދަނީ މެލޭޝިއާގެ ސިޔާސީ މަސްރަހާ ރާއްޖޭގެ ހާލަތާ ވަރަށް އެއްގޮތް ކަމަށެވެ.
އަންވަރު، 70، މިނިވަންވުމާ އެކު އޭނާ އަށް އަނެއްކާވެސް މި ވަނީ ސިޔާސީ ދާއިރާ އަށް ވަނުމުގެ ފުރުސަތު ލިބިވަޑައިގެންފަ އެވެ. އަންވަރު މިނިވަން ކުރީ، އިންތިހާބުގައި ނަޖީބު ރައްޒާގު ބަލި ކުރައްވައި ބޮޑު ވަޒީރު މަހާތިރު މުހައްމަދު ދެ ވަނަ ފަހަރަށް ވެރިކަމަށް ވަޑައިގަތުމަށް ފަހު އެވެ.
މަހާތިރު މިހާރު ވަނީ ދެ އަހަރެއްހާ ދުވަހު ބޮޑު ވަޒީރުކަން ކުރެއްވުމަށް ފަހު އަންވަރަށް ވެރިކަން ހަވާލު ކުރައްވާނެ ކަމަށް ވިދާޅުވެފަ އެވެ.