24 މެއި 2018 - 14:27
އދ.ގެ ސެކިއުރިޓީ ކައުންސިލްގެ މެމްބަރު ކަން ހޯދަން ރާއްޖެ އިން ކުރާ ކެމްޕޭނާ ގުޅޭ ގޮތުން ސަރުކާރާއި އިދިކޮޅު މީހުން ބޮޑެތި ތުހުމަތުތަކެއްކޮށް، މައްސަލަ ހޫނުވެއްޖެ އެވެ.
އދ.ގެ އެންމެ ބާރު ގަދަ ކައުންސިލް ކަމަށްވާ ސެކިއުރިޓީ ކައުންސިލަށް ގައުމުތަކުގެ ތާއީދު ރާއްޖެ އިން ހޯދަމުން އަންނަނިކޮށް، ކުރީގެ ނައިބު ރައީސް ޑރ. މުހައްމަދު ޖަމީލާއި ކުރީގެ ފޮރިން މިނިސްޓަރު އަހްމަދު ނަސީމް އެންޓި ކެމްޕޭން ކުރައްވަމުން ގެންދަވާ ކަމަށް ފިޝަރީޒް މިނިސްޓަރު ޑރ. މުހައްމަދު ޝައިނީ ވަނީ ވިދާޅުވެފަ އެވެ.
މި ތުހުމަތަށް ރައްދު ދެއްވައި، ނަސީމް ވަނީ ސެކިއުރިޓީ ކައުންސިލްގެ ގޮނޑި ކާމިޔާބުކުރަން ކުރާ ކެމްޕޭނަށް ރާއްޖެ އަށް 500،000 ޑޮލަރު (ގާތްގަނޑަކަށް 7،710،000ރ.) ހޯދި ގޮތް ހާމަކުރައްވަން ގޮވާލައްވައިފަ އެވެ.
އެއީ ބޭރު ގައުމަކުން ދިން ފައިސާއެއް ނަމަ، ސަލާމަތީ މަޖިލީހުގެ ގޮނޑީގެ އިންތިހާބުގައި ނަގާ ވޯޓުގެ މިނިވަންކަން ގެއްލޭނެ ކަމަށް ވިދާޅުވެ ނަސީމް ވަނީ ކަންބޮޑުވުން ފާޅުކުރައްވައިފަ އެވެ.
ނަސީމް "މިހާރު" އަށް ވިދާޅުވީ އދ. އަށް ވަޑައިގެން ވަކާލާތު ކުރެއްވީ ރާއްޖޭގައި މިނިވަން، އިންސާފުވެރި އިންތިހާބެއް ބޭއްވޭނެ މާހައުލެއްގެ މުހިއްމުކަމާ ގުޅޭ ގޮތުން ކަމަށެވެ. އެއީ ގައުމަށް ގެއްލުން ދިނުން ކަމަށް ދެކެވަޑައިނުގަންނަވާ ކަމަށް ވެސް ވިދާޅުވި އެވެ.
"އަޅުގަނޑު މި ދަންނަވާ ވާހަކައަކީ، ސެކިއުރިޓީ ކައުންސިލް ގޮނޑީގެ ކެމްޕޭނަށް 500،000 ޑޮލަރު ލިބުނު ގޮތް ސަރުކާރުން ސާފުކޮށްދޭން ޖެހެއޭ. ނުފޫޒެއްގެ ދަށުވެ، ޔޫއެންގެ ވޯޓުތަކުގައި ދިވެހިރާއްޖެ ކޮމްޕްރޮމައިޒްވުމަކީ ވަރަށް ބޮޑު ގޯހެކޭ. ވަރަށް ބޮޑު މައްސަލައެކޭ،" ނަސީމް ވިދާޅުވި އެވެ.
ރާއްޖެ އަށް ވޯޓު ހޯދުމުގެ ކެމްޕޭންގެ ފަހަތުގައި ވަރަށް ހުތުރު ކަންތައްތަކެއް ހިންގަމުންދާ ކަމަށާއި އެ ކަންކަމުގެ މަލާމާތް ދިވެހި ގައުމަށް ރައްދުވާނެ ކަމަށް ވެސް ވިދާޅުވި އެވެ.
"ވޯޓު ހޯދުމުގެ ނަމުގައި، ގައުމެއްގެ ނުފޫޒުގެ ދަށުވެ ހިންގަނީ ބޮޑު ޚިޔާނާތެއް،" ނަސީމް ވިދާޅުވި އެވެ.
މި ތުހުމަތަށް ރައްދު ދެއްވައި ޝައިނީ "މިހާރު" އަށް ވިދާޅުވީ ފައިސާގެ ތުހުމަތުތަކެއްކޮށް، ނަސީމް ދައްކަވަނީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. އދ.ގެ ސަލާމަތީ މަޖިލީހުގެ ގޮނޑި އަށް ކެމްޕޭން ކުރަން އެއްވެސް ގައުމަކުން ރާއްޖެ އަށް ފައިސާ ދީފައި ނުވާ ކަމަށާއި އެފަދަ ވާހަކަތައް ދައްކައިގެން މުޅިން ވެސް އުޅެނީ ރައްޔިތުންނަށް އޮޅުވާލަން ކަމަށް ވެސް ޝައިނީ ވިދާޅުވި އެވެ.
އޭނާ ވިދާޅުވީ ވޯޓު ގަންނަ ކަމަށް ވިދާޅުވެ ދޮގު ވާހަކަ ދައްކަވަން ނަސީމު ލަދުގަންނަން ޖެހޭ ކަމަށެވެ. އޭގެ ސަބަބަކީ، ޝައިނީ ވިދާޅުވި ގޮތުގައި، ތާރީޚަށް ބަލާއިރު 1970 ގައި ރާއްޖޭގެ ވޯޓު ވިއްކަވަން ނަސީމް އުޅުއްވި އުޅުއްވުމެވެ. އެފަހަރު އެކަން ފަޅާއެރި ކަމަށް ވެސް އޭނާ ވިދާޅުވި އެވެ.
ޝައިނީ ވިދާޅުވީ އެމެރިކާގައި ހުންނަ އދ.ގެ މައި މަރުކަޒަށް ވަޑައިގެން ނަސީމާއި ޖަމީލް ވަނީ ސަލާމަތީ ކައުންސިލްގެ ގޮނޑި ރާއްޖެ އަށް ނާކާމިޔާބުކުރަން ހަގީގަތާ ޚިލާފު އެތައް ވާހަކަތަކެއް ދައްކަވާފައި ކަމަށެވެ. އޭގެ ތެރޭގައި، ރާއްޖެ އަކީ އަންނަން ކަމުދާ ވަރުގެ ތަނެއް ނޫން ކަމަށް ބުނެ ލިއުންތަކެއް ވެސް ބަހާފައިވާ ކަމަށް ޝައިނީ ވިދާޅުވި އެވެ.
"ސަލާމަތީ މަޖިލީހުގެ ގޮނޑި ރާއްޖެ އަށް ހޯދަން މަސައްކަތް ކުރަމުން އަންނަނިކޮށް، ރާއްޖޭގެ ނައިބު ރައީސްކަން ކުރެއްވި ބޭފުޅަކާއި ފޮރިން މިނިސްޓަރު ކަން ކުރެއްވި ބޭފުޅަކު އަމިއްލަ ގައުމާ ދެކޮޅަށް ކެމްޕޭން ކުރުމަކީ ސިޔާސީ ގޮތުން ވެސް، ޒާތީ ގޮތުން ވެސް ކުރަން ހެޔޮވާރުގެ ކަމެއް ނޫން. ހުރިހާ ހަޑިއެއް ލިބޭނީ ދިވެހިންނަށް،" ޝައިނީ ވިދާޅުވި އެވެ.
އޭނާ ވިދާޅުވީ ބޮންޑު ވިއްކައިގެންނާއި އެހެން ގޮތްގޮތުން ވެސް ރާއްޖެ އަށް ބޭރު ފައިސާ ވަންނަ ކަމަށާއި އޭގެ މާނައަކީ އޮޅުވާލުންތަކާ އެކު ވާހަކަ ދެއްކުން ނޫން ކަމަށެވެ.
މިނިސްޓަރު ވިދާޅުވި ގޮތުގައި މިހާތަނަށް ކޮށްފައިވާ މަސައްކަތަށް ބަލާއިރު، ރާއްޖެ އަށް ސެކިއުރިޓީ ކައުންސިލްގެ ގޮނޑި ލިބުމުގެ ފުރުސަތު ބޮޑެވެ.
"ވަރަށް ގިނަ ގައުމުތަކުގެ ތާއީދު ރާއްޖެ އަށް އެބަ އޮތް، ކުޑަ ގައުމަކަށް ވެ ދިވެހިރާއްޖެ އަށް ލިބޭނެ ފަޚުރެއް އެއީ ޔޫއެން ސެކިއުރިޓީ ކައުންސިލްގައި ތަމްސީލްވުމަކީ،" ޝައިނީ ވިދާޅުވި އެވެ.
އދ.ގެ ސެކިއުރިޓީ ކައުންސިލަށް ރާއްޖެ އިން ވޯޓު ހޯދަން، ގައުމުތަކާ އެކު އަންނަނީ ސިޔާސީ ގުޅުން ވެސް ގާއިމްކުރަމުންނެވެ.
ސެކިއުރިޓީ ކައުންސިލްގެ އިންތިހާބުގައި ރާއްޖެ އިން ވާދަކުރަން ނިންމާފައިވަނީ އަންނަ އަހަރުން ފެށިގެން 2020 ވަނަ އަހަރުގެ ނިޔަލަށް އޮންނަ ދައުރަށެވެ. އެ އިންތިހާބު މި އަހަރު ބާއްވާނެ އެވެ. މިއީ އެ ކައުންސިލްގެ މެމްބަރު ކަމަށް ރާއްޖެ އިން ވާދަކުރާ ފުރަތަމަ ފަހަރެވެ.
އދ. ސެކިއުރިޓީ ކައުންސިލްގެ މެމްބަރު ކަމަށް ހޮވޭނީ އދ. ގެ ޖެނެރަލް އެސެމްބްލީގައި ނަގާ ވޯޓުގައި މެމްބަރު ގައުމުތަކުގެ ތެރެއިން ތިންބައި ކުޅަ ދެބައި ގައުމުގެ ވޯޓު ލިބިގެންނެވެ. އިންތިހާބުގައި އެ ކައުންސިލަށް އޭޝިއާ ރީޖަނުން ރާއްޖޭގެ އިތުރުން ވާދަކުރަނީ އިންޑޮނީޝިއާ އެވެ.