18 މެއި 2018 - 08:19
ބޮލީވުޑްގެ މަޝްހޫރު ބަތަލާ ކާޖޮލް ދެން އެންމެ އަވަހަށް ބޮޑު ސްކްރީނަށް އަންނަ ފިލްމް "އީލާ" ރިލީޒްކުރާ ތާރީހު އިއުލާންކޮށްފި އެވެ.
ކާޖޮލްގެ ފިރިމީހާ އަދި އެކްޓަރު އަޖޭ ދޭވްގަން އާއި ޖަޔަންތިލާލް ގާޅާ ޕްރޮޑިއުސް ކުރާ ފިލްމް ސިނަމާތަކަށް އަންނާނީ ސެޕްޓެމްބަރު 14 ގަ އެވެ.
މި ފިލްމަކީ 2015 ގައި ރިލީޒް ކުރި ރޯހިތު ޝެޓީގެ "ދިލްވާލޭ" އަށް ފަހު، ކާޖޮލް، 43، ފެނިގެންދާ ފުރަތަމަ ހިންދީ ފިލްމެވެ. އޭނާ އެންމެ ފަހުން ކުޅުނު ފިލްމަކީ މިދިޔަ އަހަރު ރިލީޒް ކުރާ ދަނޫޝް (ކޮލަވަރީ ޑީ) ގެ ތަމަޅަ ފިލްމް "ވީއައިޕީ 2" އެވެ.
އެކަނިވެރި މަޔަކާއި އޭނާގެ ފިރިހެން ދަރިފުޅާ ދެމެދު އޮންނަ ގުޅުމެއްގެ މައްޗަށް ބިނާކޮށް ގެނެސްދޭ "އީލާ" އަކީ އާނަންދް ގާންދީގެ ގުޖުރާތީ ޕްލޭ "ބޭޓާ ކާގްޑޯ" އަށް ބިނާކޮށް ހަދާ ފިލްމެކެވެ. މިތޭޝް ޝާހްގެ ސްކްރީންޕްލޭއަކަށް ހަދާ ފިލްމް ޑައިރެކްޓް ކުރަނީ ޕަރިނީތާ (2005) ފަދަ ފިލްމްތައް ގެނެސް ދިން ޕްރަދީޕް ސަރުކާރު އެވެ.
އޭނާ އެންމެ ފަހުން ޑައިރެކްޓް ކުރި ފިލްމަކީ 2014 ގައި ރާނީ މުކަރްޖީ ފުލުހެއްގެ ރޯލް ކުޅުނު "މަރްދާނީ" އެވެ.