17 މެއި 2018 - 11:41
މި ސީޒަނަށް ނިއު ރޭޑިއަންޓުން ތައްޔާރުވިއިރު އެންމެ ބޮޑަށް އިސްކަންދިން އެއް ކަމަކީ އޭއެފްސީ ކަޕްގައި ރަނގަޅު ނަތީޖާތަކެއް ނެރުން ކަމަށާއި ގްރޫޕް ސްޓޭޖުގެ ފަހު މެޗުން އިއްޔެ އިންޑިއާގެ އައިޒޯލް އަތުން 2-1 އިން ބަލިވެ މުބާރާތުން ކަޓައިގެންދާން ޖެހުމަކީ މުޅި ކްލަބަށް ލިބުނު ގެއްލުމެއް ކަމަށް ނިއުގެ ކޯޗު އޮސްކާ ބްރުޒޮން ބުނެފި އެވެ.
ގްރޫޕުގެ އެއް ވަނަ ޓީމަށް ދެ ވަނަ ބުރުން ފުރުސަތު ލިބޭއިރު ރޭ މޮޅުވެގެން ނިއު އަށް އެއް ވަނަ ހޯދުމުގެ ފުރުސަތު އޮތެވެ. އެއީ ހެޑް-ޓު-ހެޑް ގަވާއިދުން އެއް ވަނަ ނިއު އަށް ލިބޭތީ އެވެ. ރޭގެ މެޗަށް ނުކުތްއިރު ގްރޫޕުގެ އެއް ވަނައިގައި އޮތީ ވެސް ނިއު އެވެ. އެކަމަކު އެ ޓީމު ބަލިވެ، އަދި އަނެއް މެޗުން ބަންގްލަދޭޝްގެ ޑާކާ އަބަހާނީ އަތުން 4-0 އިން ބެންގަލޫރު މޮޅުވުމުން އެ ޓީމަށް ފުރުސަތު ލިބުނީ އެވެ.
މުބާރާތުގެ ދެ ވަނަ ބުރުން 2005 އާއި 2013 ވަނަ އަހަރު ޖާގަ ހޯދި ނިއު އިން މި ފަހަރު ޓީމު ވަރުގަދަކުރިއިރު އެންމެ ބޮޑު ސަމާލުކަމެއް ދިނީ ވެސް އޭއެފްސީ ކަޕަށެވެ.
"އަހަރެމެން ސީޒަނަށް ނުކުތްއިރު ރާއްޖޭގެ މުބާރާތްތަކަށް ވުރެން ބޮޑަށް އިސްކަންދިނިން އޭއެފްސީ ކަަޕަށް. މިއީ މި ކްލަބަށް ލިބިގެންދިޔަ ވަރަށް ބޮޑު ގެއްލުމެއް." ނިއުގެ ކޯޗު އޮސްކާ ބުންޏެވެ.
ރޭގެ މެޗުގައި އައިޒޯލުން ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ. ފުރަތަމަ ލަނޑަކީ މެޗުގެ 61 ވަނަ މިނިޓްގައި ލިބުނު ޕެނަލްޓީ އަކުން އައިވަރީ ކޯސްޓުގެ ފޯވާޑް ޑޯޑޯޒް ޖެހި ގޯލެކެވެ.
އޮސްކާ ވަނީ އައިޒޯލަށް ލިބުނު ޕެނަލްޓީގައި ސުވާލު އުފެދޭ ކަންތައްތަކެއް އެބަހުރި ކަމަށެވެ.
"މެޗުގެ ވީޑިއޯ ބަަލައިގެން އަހަންނަށް އެންމެ ރަނގަޅަށް އެއްޗެއް ބުނެވޭނީ. އެކަމަކު އަހަރެން ހުރި ހިސާބުން ފެނުނު ގޮތަށް ބަލައި އެއްޗެއް ބުނާނަމަ އެ ބޯޅަ ކުރިއަށް ދިޔައިރު އޮފްސައިޑް ވެދާނެ. އެކަހަލަ ނިންމުންތަކެއް ދިޔަ އަހަރެމެންނާ ދެކޮޅަށް. އެ ކަމުގެ ފުޓްބޯޅަ އަކީ އެ ކަހަލަ ކަމެއް. މަސައްކަތްކުރާ ޓީމަކަށް ކާމިޔާބު ލިބޭނެ. އަހަރެން ޝަކުވާ ކުރާކަށް ނެތިން،" އޮސްކާ ބުންޏެވެ.
އޮސްކާ ވަނީ ނިއުގެ ބޭނުންވާ ގޮތަށް އެންމެ ރަނގަޅަށް ނުކުޅެވުނީ އައިޒޯލުން ކުޅުނު ފިޒިކަލް ގޭމެއްގެ ސަބަބުން ކަމަށެވެ.
"މޮޅަށް ކުޅުނު ޓީމު މޮޅުވީ. ފަހަތަށް ގިނަ ކުޅުންތެރިންތަކެއް ލާން އައިޒޯލުން ރޭވި ރޭވުމުން އެ ޓީމަށް އަޖައިބުކުރުވަނިވި ފައިދާތަކެއްވީ. އަދި އެއާ އެކު ނިއުގެ ގޭމްޕްލޭން ހަލާކުވި،" އޮސްކާ ބުންޏެވެ.
އޭނާ ބުނީ ދެން އޮންނާނީ ރާއްޖޭގެ ލީގު ޗެމްޕިއަންކަން ހޯދަން ސަމާލުކަން ދިނުން ކަމަށާއި އަމާޒަކީ އަންނަ އަހަރުގެ އޭއެފްސީ ކަޕުން ޖާގަ ހޯދުން ކަމަށެވެ.
އައިޒޯލްގެ ކޯޗު ސަންޓޯޝް ކަޝިޔަޕް ބުނީ އޭނާގެ ޓީމުން ނުކުތީ މޮޅެއް ހޯދައިގެން މުބާރާތް ނިންމާލަން ކަމަށާއި އެކަން ހާސިލްކުރެވުމުން ހިތްހަމަ ޖެހޭ ކަމަށެވެ. އަދި މެޗަށް ނުކުތްއިރު ވެސް އެއްވެސް އިރެއްގައި ވެސް ބެންގަލޫރަށް ގޮތެއް ހޯދައިދޭން ނުކުޅޭ ކަމަށް އޭނާ ބުންޏެވެ. އެކަމު އައިޒޯލް މޮޅުވުމުން އޭގެ ފައިދާ އިންޑިއާގެ ޓީމަކަށް ކުރުމުން އެކަމާ ހިތްހަމަ ޖެހޭ ކަމަށް އޭނާ ބުންޏެވެ.