24 ޖުލައި 2016 - 17:38
ތެހެރާން (ޖުލައި 24) - އީރާނުން ލައްކައަކަށް ވުރެ ގިނަ ޑިޝް އެންޓަނާ އާއި ރިސީވަރު މިއަދު ނައްތާލައިފި އެވެ.
އީރާނުން ވަނީ ޑިޝް އެންޓަނާ ބޭނުން ކުރުމަކީ މަނާ ކަމެއް ކަމަށް ކަނޑައަޅައިފަ އެވެ. އަދި ސެޓެލައިޓް ޓީވީގެ ސަބަބުން މީސް މީހުންގެ އުޅުމަށާއި މިޒާޖަށް ބޮޑު ބަދަލެއް އަންނަ ކަމަށް އީރާނުން ބުނެ އެވެ.
"ހަގީގަތަކީ ސެޓެލައިޓް ޗެނަލްތަކުގެ ސަބަބުން މުޖްތަމައުގެ އަޚްލާގަށާއި ސަގާފަތަށް ނޭދެވޭ އަސަރު ކުރާކަން،" އީރާން ސިފައިންގެ އިސް ޖެނެރަލެއް ކަމަށްވާ މުހައްމަދު ރިޒާ ވިދާޅުވި އެވެ. "މި ޗެނަލްތަކުގެ ސަބަބުން ވަރިވެސް ދަނީ ގިނަވަމުން."
ރިޒާ ވިދާޅުވީ އީރާނުގެ މިލިއަނަކަށް ވުރެ ގިނަ މީހުން ވޮލަންޓިއާކޮށްގެން ވަނީ ސެޓެލައިޓް އެންޓަނާ ކަމާބެހޭ ފަރާތްތަކާ ހަވާލުކޮށްފައި ކަމަށެވެ.
އީރާނުގެ ގާނޫނުތަކުގެ ސަބަބުން ސެޓެލައިޓް ޑިޝް ވިއްކާ މީހުންނާއި މަރާމާތުކޮށްދޭ މީހުން 2،800 ޑޮލަރާ ހަމައަށް ޖޫރިމަނާ ކުރެވެ އެވެ. އީރާން ފުލުހުން ދޭތެރެ ދޭތެރެ އިން އޮޕަރޭޝަންތައް ހިންގާ ގޭގޭގައި ހަރުކޮށްފައިވާ ސެޓެލައިޓް ޑިޝް އެންޓަނާތައް ނައްޓަ އެވެ.
އީރާނުގެ ކަލްޗާ މިނިސްޓަރު އަލީ ޖަންނަތީ ވިދާޅުވީ ސެޓެލައިޓް ޑިޝް މަނާ ކުރުމުގެ ގާނޫނު މިހާރު މުރާޖައާ ކުރަން ޖެހޭ ކަމަށެވެ. ސަބަބަކީ ވަރަށް ހަރުކަށިކޮށް ސެޓެލައިޓް ޑިޝް މަނާކޮށްފައިވީ ނަމަވެސް ގިނަ ބަޔަކު ބޭނުން ކުރަމުންދާތީ ކަމަށެވެ.
"އީރާނުގެ 70 ޕަސެންޓް މީހުން ދަނީ މި ގާނޫނާ ޚިލާފުވެ ސެޓެލައިޓް ޑިޝް ބޭނުން ކުރަމުން،" ޖަންނަތީ ވިދާޅުވި އެވެ.
މެދު މިނުގެ ސިޔާސަތެއް ގެންގުޅުއްވާ އީރާނުގެ ރައީސް ހަސަން ރޫހާނީ ވިދާޅުވީ ސެޓެލައިޓް ޑިޝް މަނާ ކުރުމަކީ ބޭނުންހުރި ކަމެއް ނޫން ކަމަށެވެ.