14 މެއި 2018 - 15:39
ކުއާލަ ލަމްޕޫރު (މެއި 14) - މެލޭޝިއާގައި ނިމިގެން ދިޔަ އާއްމު އިންތިޚާބުގައި ކުރީގެ ބޮޑު ވަޒީރު ނަޖީބު ރައްޒާގަށް ތާއީދު ކުރެވުނީތީ އެއާ އޭޝިއާގެ ސީއީއޯ ޓޯނީ ފެނާންޑޭޒް މައާފަށް އެދިވަޑައިގެންފި އެވެ.
ފެނާންޑޭޒް ވިދާޅުވީ ނަޖީބަށް ތާއިދުކޮށް ވީޑިއޯއެއް ނެރުމަށް މެއި 9 ގެ ވޯޓުގެ ކުރިން، ކުރީގެ ސަރުކާރުން ވަރަށް ބޮޑަށް ޕްރެޝަރު ކުރި ކަމަށެވެ. އެކަމަކު މެލޭޝިއާގައި 61 އަހަރު ވެރިކަން ކުރި ބަރިސަން ނޭސަނަލް ކޯލިޝަނަށް ލިބުނު ނާކާމިޔާބީ އަށް ފަހު ފެނާންޑޭޒަށް ވެސް ވަނީ ވަރަށް ބޮޑަށް ފާޑުކިޔުންތައް އަމާޒުވެފަ އެވެ.
އިންތިޚާބުގެ ކެމްޕޭނުގެ ތެރޭގައި ވަނީ އެއާ އޭޝިއާގެ ބޯޓެއްގައި ނަޖީބާ އެކު ފެނާންޑޭޒް އިންނެވި ފޮޓޯއެއް ބޭނުން ކޮށްފަ އެވެ. އެ ބޯޓުގައި ވެސް ވަނީ ނަޖީބުގެ ކޯލިޝަނުގެ ކުލަ ކަމަށްވާ ނޫ ކުލަ ލައިފަ އެވެ. އެ ދަތުރުގައި ބޯޓުގެ އެޓެންޑެންޓުންގެ ރަތް ޔުނިފޯމް ވަނީ ނޫލަ އަށް ބަދަލުކޮށްފަ އެވެ.
ފޭސްބުކުގައި ފެނާންޑޭޒް އާއްމު ކުރި މެސެޖެއްގައި ވަނީ އޭނާ އަށް ހެދުނީ ގޯހެއް ކަމަށާއި އެކަމަށް މައާފަށް އެދޭ ކަމަށް ވިދާޅުވެފަ އެވެ.
ފެނާންޑޭޒް ވިދާޅުވީ އެއާ އޭޝިއާގެ ދިގު ދަތުރުތައް ކުރާ އެއާ އޭޝިއާ އެކްސްގެ ބޯޑުން ކުރީގެ ޓްރޭޑް މިނިސްޓަރު ރަފިދާ އަޒީޒް ވަކިކުރަން ވެސް ނަޖީބުގެ ސަރުކާރުން ޕްރެޝަރު ކުރި ކަމަށެވެ. ރަފިދާހު ވަނީ މަހާތިރު މުހައްމަދުގެ ކެމްޕޭނުގައި ބައިވެރިވެ ތަގްރީރުކޮށްފަ އެވެ. އެކަމާ ހިތްހަމަނުޖެހިގެން ބަރިސަން ނޭސަނަލް ކޯލިޝަނުން އޭނާ ވަނީ ވަކިކޮށްފަ އެވެ.
ފެނާންޑޭޒް ވިދާޅުވީ ނަޖީބަށް ތާއިދުކުރީ ސަރުކާރުން ކުރިމަތި ކުރި ޕްރެޝަރުން ކަމަށެވެ.
"އެކަމަކު އެ ގޯހަށް އަބަދަށް ވެސް އަޅުގަނޑު ހިތާމަ ކުރާނަން. އެކަމުގެ ސަބަބުން ގެއްލުން ލިބުނު އެންމެންގެ ކިބައިން މައާފަށް އެދެން،" ފެނާންޑޭޒް ވިދާޅުވި އެވެ.