24 ޖުލައި 2016 - 15:11
ވިކްޓަރީ އަށް މި ސީޒަނުގައި ދިމާވެފައިވާ މައްސަލަތަކަށް ހައްލެއް ގެނެސް ޓީމުގެ ހާލަތު ހަންގޭރީގެ ކޯޗު ލާސްލޯ ކިސް އަށް ބަދަލުކުރެވޭނެ ކަމުގެ ޔަގީންކަން އެބައޮތް ކަމަށް ވިކްޓަރީގެ ބޯޑު މެންބަރު އިބްރާހިމް ނަޒީމް ވިދާޅުވެއްޖެ އެވެ.
ކިސް ވިކްޓަރީގެ ކޯޗުކަމާ ހަވާލުވީ މި ސީޒަނުގެ ނިޔަލަށެވެ. އެހެން ނަމަވެސް ސީޒަނުގެ ބާކީ ބައިގައި ވިކްޓަރީގެ ނަތީޖާ ރަނގަޅުނަމަ ކިސް އަންނަ އަހަރު ވެސް ކިސް ބަހައްޓާނެ ކަމަށް ވިކްޓަރީން ބުނެ އެވެ.
"ކިސް އަކީ ރާއްޖެ އަށް މަޝްހޫރު ކޯޗެއް. އެތައް ފަހަރެއްގެ މަތިން ރާއްޖޭގެ އެކި ކްލަބްތަކަށް ކޯޗުކޮށްދިން ކާމިޔާބު ކޯޗެއް. ވިކްޓަރީ މި ވަގުތު ލީގުގައި އޮތް ހިސާބަށް ބަލާއިރު ލީގު ހޯދުމަކީ ފަސޭހަކަމެއް ނޫން. ވާނެ ކަމެކޭ އަދި ނުވާނެ ކަމެކޭ ވެސް ބުނަން ނޭނގޭ،" މިއަދު މެންދުރު ފަހު ސަލްސާ ރޯޔަލްގައި އޮތް ރަސްމިއްޔާތުގައި ވާހަކަ ދައްކަމުން ނަޒީމް ވިދާޅުވި އެވެ.
ވިކްޓަރީ މި ވަގުތު އޮތީ ލީގުގެ ހަތް ވަނައިގަ އެވެ. ކުޅުނު ނުވަ މެޗުން އެ ޓީމަށް ލިބިފައިވަނީ ހަތަރު ޕޮއިންޓެވެ. ނަޒީމް ވިދާޅުވީ ވިކްޓަރީން މި އަހަރަށް ކަނޑައަޅާފައިވާ ޓާގެޓަކީ ގަދަ ހަޔެއް ކަމަށެވެ.
"މި ސީޒަނަށް އަޅުގަނޑުމެން ކަނޑައެޅި ޓާގެޓަކީ ގަދަ ހަޔެއް. ލީގުގައި އޮތް ހިސާބަށް ބަލާއިރު އެންމެ ބޮޑު އިސްކަމެއް ދޭނީ އަންނަ އަހަރު ވެސް ފުރަތަމަ ޑިވިޝަންގައި އޮތުމަށް ކުރެވެން ހުރި މަސައްކަތެއް ކުރަން. ކިސްއާ އެކު އެކަން ކާމިޔާބުވާނެ ކަމުގެ ޔަގީންކަން އެބައޮތް. ކިސްއާ އެކު ޓީމުގެ ނަތީޖާ ރަނގަޅު ނަމަ އަންނަ ސީޒަނުގައި އިތުރު ޕްލޭނަކާ އެކު ކުރިއަށްދާން ކިސް ބަހައްޓާނަން،" ނަޒީމް ވިދާޅުވި އެވެ.
ވިކްޓަރީ އަށް މި ސީޒަނުގައި ކުރިން ކޯޗުކޮށްދިނީ އެ ޓީމަށް ކުރިން ކުޅުނު މިޑްފީލްޑަރު މުހައްމަދު ނަޒީހު އެވެ. ނަޒީހު ވަނީ އުރީދޫ ދިވެހި ޕްރިމިއާ ލީގުގައި ދެ ވަނަ ބުރުގެ ފުރަތަމަ މެޗާ ހަމަ އަށް ވިކްޓަރީ އަށް އިރުޝާދު ދީފަ އެވެ. ދެ ވަނަ ބުރުގެ ދެ ވަނަ މެޗުގައި މާޒިޔާއާ ދެކޮޅަށް އެޓީމުގެ ކޯޗުގެ ޒިންމާ ނެގީ އެސިސްޓަންޓް ކޯޗު އަހުމަދު ނާޝިދު (ނާދު) އެވެ.
ވިކްޓަރީގެ ޗެއާމަންގެ މަގާމުން މިދިޔަ ހަފްތާގެ ހޯމަ ދުވަހު ދާންދޫ ދާއިރާގެ މެމްބަރު އަހުމަދު އައްސަދު ވަނީ އިސްތިއުފާ ދެއްވައިފަ އެވެ.