09 މެއި 2018 - 16:03
ރަހުމަތްތެރިއެއްގެ ސައިކަލެއް ދުއްވާލަން ގެންގޮސްފައި ވަނިކޮށް، އެ ސައިކަލް ގެއްލުނު މައްސަލައެއްގައި ސައިކަލްގެ ފުރިހަމަ އަގު އޭގެ ވެރި ފަރާތަށް ދިނުމަށް ސައިކަލާ ހަވާލުވި މީހާގެ މައްޗަށް ސިވިލް ކޯޓުން ހުކުމްކޮށްފި އެވެ.
މިދިޔަ އާދިއްތަ ދުވަހު، އެ ގޮތަށް ހުކުމް ކުރީ މިދިޔަ އަހަރުގެ އޮގަސްޓް މަހު މީހަކު އޭނާގެ ރަހުމަތްތެރިއެއްގެ އަތަށް އޭނާގެ ސައިކަލް ދުއްވާލަން ދީފައި ހުއްޓާ އެ ސައިކަލް ވަގަށް ނެގި މައްސަލައިގައި އެ މީހާ ދައުވާ ކުރުމުންނެވެ. އެ މައްސަލަ ބެލުމަށް ފަހު، ސައިކަލާ ހަވާލުވި މީހާގެ މައްޗަށް ކޯޓުން ހުކުމް ކުރީ އެ ސައިކަލްގެ ފުރިހަމަ އަގަށްވާ 94،000ރ. ސައިކަލްގެ ވެރި މީހާ އަށް ދެއްކުމަށެވެ.
ސައިކަލް ގެއްލިފައި ވަނީ ސައިކަލާ ހަވާލުވި މީހާ އެ ސައިކަލް ދުއްވުމަށް ފަހު ފެރީ ޓާމިނަލް ސަރަހައްދުގައި ބަހައްޓާފައި ހުއްޓަ އެވެ. އެކަން އޭނާ ފުލުހުންނަށް ވެސް ހުށަހެޅި އެވެ. ސައިކަލް ގެއްލުމަށް ޒިންމާވާން ނުޖެހޭނެ ކަމަށް ބުނެ އެ މީހާގެ ފަރާތުން ކޯޓުގައި ބުނެފައި ވަނީ ސައިކަލްގެ ވެރިމީހާގެ އަތުގައި އޭގެ ދެ ވަނަ ތަޅުދަނޑިއެއް އޮންނަ ކަމަށާއި އަދި ސައިކަލް ގެއްލުނީ ވެސް ގަވާއިދާ އެއްގޮތަށް އޭނާ ސައިކަލް ބަހައްޓާފައި ހުއްޓާ ކަމަށެވެ.
ހުކުމުގައި ވަނީ ސައިކަލުގެ ދެ ވަނަ ތަޅުދަނޑިއެއް ވެރިމީހާގެ އަތުގައި އޮތަސް އަދި ގަވާއިދާ އެއްގޮތަށް އެ ސައިކަލު ބަހައްޓާފައި ހުއްޓަސް، އެކަމަކީ ސައިކަލާ ހަވާލުވި މީހާގެ ބެލުމުގެ ދަށުގައި ހުއްޓާ ދިމާވާ ކަންކަމަށް އޭނާ ޒިންމާ ނަގަން ނުޖެހުމަށް އޮތް ހުއްޖަތެއް ނޫން ކަމަށެވެ.
ހުކުމުގައިވާ ގޮތުން، ސައިކަލު ފަދަ ތަކެތި އެހެން މީހުންނާ ހަވާލު ކުރަނީ ދެ ފަރާތުގެ ދެމެދުގައި އޮންނަ އިތުބާރެއްގެ މައްޗަށް ބިނާކޮށްގެންނެވެ. އަދި އެކަމަކީ ދިވެހިންގެ އާދަކާދައިގެ ތެރޭގައި ހިމެނޭ މުއާމަލާތެއް ކަން ވެސް ހުކުމުގައި ފާހަގަ ކޮށްފައިވެ އެވެ. އެފަދަ މުއާމަލާތްތަކުގައި މުދާ ގެންދިއުމުގެ ކުރިން ދެ ފަރާތުން ވަކި ޝަރުތުތަކަށް އެއްބަސްވެފައި ނުވިޔަސް، އެފަދަ މުދަލެއް ގެންދެވެނީ ބޭނުން ކުރުމަށް ފަހު ރައްކާތެރިކަމާ އެކު މުދާ އަނބުރާ ގެންނަ ގޮތަށް ކަމަށް އެ ހުކުމުގައިވެ އެވެ.
މީގެ އިތުރުން އެ ސައިކަލު ހަވާލުކުރީ އަނބުރާ ގެންނަ ގޮތަށް ކަން ފާހަގަކޮށް، އެ ހުކުމުގައިވަނީ އެގޮތަށް ހަވާލުކުރާ މުދަލަށް ލިބޭ ގެއްލުންތަކަށް ޒިންމާ ކުރުވޭނެ އުސޫލެއް ނެތް ނަމަ މުޖްތަމައުގެ ތެރޭގައި ނުރަނގަޅު އާދަތަކެއް އާންމުވެގެން ހިނގައިދާނެ ކަމަށެވެ.
ސައިކަލާ ހަވާލުވި މީހާގެ މައްޗަށް ކޯޓުން ހުކުމްކުރީ ސައިކަލުގެ އަގަށްވާ 94،000ރ. އެއް މަސް ތެރޭގައި ކޯޓަށް ދެއްކުމަށެވެ. އެކަމަކު ސައިކަލު ވަގަށް ނެގި މީހެއްގެ މައްޗަށް ޖިނާއީ ދައުވާއެއް އުފުލައި، ކުށް ސާބިތުވެއްޖެ ނަމަ އެ މީހެއްގެ އަތުން ސައިކަލުގެ އަގު ހޯދުމަށް ދައުވާ ކުރުމުގެ ހައްގު ސައިކަލާ ހަވާލުވި މީހާ އަށް އޮންނާނެ ކަމަށް ހުކުމުގައިވެ އެވެ.