24 ޖުލައި 2016 - 05:49
ވާވޭ ގޮވައިގެން ކޯޓަށް ދާން ސެމްސަންގުން ނިންމައިފި އެވެ. ސެމްސަންގުން ތުހުމަތުކުރާ ގޮތުގައި ވާވޭ ވަނީ އެ ކުންފުނީގެ ފިކުރީ މުދަލުން ވައްކަންކޮށްފަ އެވެ. ވާވޭއާ ދެކޮޅަށް ބީޖިންގެ ކޯޓަކަށް ހުށަހެޅި މައްސަލާގައި ސެމްސަންގުން ބަދަލުހޯދައި ދިނުމަށް އެދިފައި ވަނީ "މޮބައިލް އިމޭޖިން އާއި ޑާޓާ ސްޓޯރޭޖް" ޓެކްނޮލޮޖީން ވާވޭ ވައްކަންކުރި ކަމަށް ބުނެ އެވެ.
ސެމްސަންގުން ބުނި ގޮތުގައި މައްސަލަ ކޯޓަށް ހުށަހަޅަން ޖެހުނީ އެކުވެރިކަމާ އެކު ދެއްކި ވާހަކައިން އެދެވޭ ނަތީޖާއެއް ނުނިކުތުމުންނެވެ. އެކަމާ ހިތާމަކުރާ ކަމަށް ބުނަމުން އެ ކުންފުނިން ބުނީ ފަރުދީ ހައްގުތައް ހޯދުމަށް އެ ނޫން ގޮތެއް މި ވަގުތު ރަނގަޅުވާނެ ކަމަށް ލަފާނުކުރެވުނު ކަމަށެވެ.
ސެމްސަންގް އަކީ ކޯޓުތަކުގައި މައްސަލަ ގިނަ ކުންފުންޏެކެވެ. އެޕަލުން ސެމްސަންގްއާ ދެކޮޅަށް މައްސަކަތަކެއް ކޯޓަށް ވައްދައި ވަނީ ކާމިޔާބު ވެސް ކޮށްފަ އެވެ. އަނެއްކޮޅުން ސެމްސަންގުން ވެސް ވަނީ އެޕަލް ގޮވައިގެން ދުނިޔޭގެ ހަތަރު ބިތުގައި ހުރި ކޯޓުތަކަށް ދުވެފަ އެވެ.
ވާވޭ ވެސް ވަނީ ސެމްސަންގްއާ ދެކޮޅަށް އެމެރިކާ ކޯޓަށް ވަދެފަ އެވެ. އެ ކުންފުނިން ދައުވާކުރަނީ، ނަކަލުކޮށް ބޭނުންކުރުމަށްޓަކައި ވާވޭގެ ރުހުން ހޯދަންޖެހޭނެ ކަމަށް ބުނާ "ވަޔަލެސް ޓެކޮނޮލޮޖީ"އަކުން ސެމްސަންގް ވައްކަންކޮށްފައި ވާ ކަމަށް ބުނެ އެވެ.
ދުނިޔޭގެ ސްމާޓްފޯން މާކެޓްގައި އަދި ވެސް ރަސްކަންކުރަނީ ސެމްސަންގް އެވެ ވާވޭ ގުނެނީ ތިންވަނާގަ އެވެ. އެޕަލް އަށް ދެވަނަ އެވެ.