07 މެއި 2018 - 06:15
އެވެންޖާޒް ސީރީޒްގެ އެންމެ ފަހުގެ ފިލްމް "އިފިނިޓީ ވޯ" ގެ އާމްދަނީ އެއް ބިލިއަން ޑޮލަރު ފަހަނައަޅައިފި އެވެ.
މިދިޔަ މަހުގެ 27 ގައި ރިލީޒް ކުރި މި ފިލްމް ދުނިޔޭގެ އެކި ކަންކޮޅުތަކުގައި ދައްކައިގެން ބިލިއަން ޑޮލަރު ކުލަބުން ޖާގަ ހޯދީ ރިލީޒް ކުރިތާ އެންމެ 11 ދުވަހުގެ ތެރޭގަ އެވެ.
ކުރިން އެންމެ އަވަހަށް ބިލިއަން ޑޮލަރުގެ އާމްދަނީއެއް ހޯދި ފިލްމްގެ ރެކޯޑް އޮތީ 2015 ގައި ރިލީޒް ކުރި "ސްޓާ ވޯސް: ފޯސް އެވެކޭން" އަށެވެ. އެއީ 12 ދުވަހުން ލިބުނު ބިލިއަން ޑޮލަރުގެ އާމްދަނީއާ އެކުގަ އެވެ. ހަމައެއާ އެކު "އިންފިނިޓީ ވޯ" ވަނީ "ފޯސް އެވޭކަންސް" ގެ އެހެން ރިކޯޑެއް ވެސް މުގުރާލައިފަ އެވެ. އެއީ ރިލީޒް ކުރި ދުވަހު ހޯދި 250 މިލިއަން ޑޮލަރުގެ އާމްދަނީއާ އެކުގަ އެވެ.
މި އަހަރުގެ މިހާތަނަށް ރިލީޒް ކުރި ފިލްމްތަކުގެ ބިލިއަން ޑޮލަރުގެ އާމްދަނީއެއް ހޯދާފައި ވަނީ ފެބްރުއަރީ މަހު ރިލީޒް ކުރި "ބްލެކް ޕެންތާ" އެވެ. އެ ފިލްމަށް ވަނީ 1.366 ބިލިއަން ޑޮލަރުގެ އާމްދަނީއެއް ލިބިފަ އެވެ.
މާވެލް އާއި ޑިޒްނީ ގުޅިގެން 300-400 މިލިއަން ޑޮލަރުގެ ދެމެދުގެ ބަޖެޓަކުން ހެދި "އިންފިނިޓީ ވޯ" އާ އެކު، މި ސީރީޒްތަކުން ލިބުނު އާމްދަނީ މިހާރު ވަނީ 3 ބިލިއަނަށް ވުރެ މައްޗަށް އަރައިފަ އެވެ. ދެހާސް ފަނަރައިގައި ރިލީޒް ކުރި "އޭޖް އޮފް އަލްޓްރޯން" އަށް 1.405 ބިލިއަން ޑޮލަރު ލިބިފައިވާ އިރު، 2012 ގައި ރިލީޒް ކުރި "ދި އެވެންޖާޒް" އަށް 1.519 ބިލިއަން ޑޮލަރު ލިބިފައިވެ އެވެ.
އެންތަނީ އާއި ޖޯއީ ރުސޯ ޑައިރެކްޓްކޮށް ގެނެސް ދިން "އެވެންޖާޒް: އިންފިނިޓީ ވޯ" ގައި ވަނީ ބޮޑު ސްކްރީންގެ ގިނަ ސްޕަހީރޯއިންތަކެއްގެ ކުރިމަތިލުންތަކެއް ދައްކުވައި ދީފަ އެވެ.
މި ފިލްމްގެ ކާސްޓުންގެ ތެރޭގައި ކްރިސް ހެމްސްވޯތު (ތޯ)، ރޮބަޓް ޑައުނީ ޖޫނިއާ (އަޔަން މޭން)، މާކް ރަފަލޯ (ހަލްކް)، ކްރިސް އެވަންސް (ކެޕްޓަން އެމެރިކާ)، ޓޮމް ހޮލަންޑް (ސްޕައިޑަ މޭން)، ބެނެޑިކްޓް ކަމްބަބެޗް (ޑރ. ސްޓްރޭންޖް)، ޗާޑް ބޯޒްމަން (ބްލެކް ޕެންތާ) އަދި ސްކާލެޓް ޖޮހަންސަން (ބްލެކް ވިޑޯ) ފަދަ އެތައް ތަރިންނެއް ހިމެނެ އެވެ.
"އެވެންޖާޒް" ގެ އިތުރު ފިލްމެއް އަންނަ އަހަރު ވެސް ގެނެސް ދޭ ވަނީ ނިންމައިފަ އެވެ.