30 އެޕްރީލް 2018 - 14:43
ދިމިޝްގު (އެޕްރީލް 30) - ސީރިއާގެ އުތުރުގެ އަސްކަރީ ބައެއް ތަންތަނަށް އަނެއްކާވެސް މިސައިލް ހަމަލާދީފި އެވެ.
ސީރިއާގެ އަސްކަރިއްޔާ އިން ބުނީ މިސައިލް ހަމަލާދީފައި ވަނީ ހަމާ އަދި ހަލަބް ޕްރޮވިންސަށް ކަމަށެވެ. ހަމަލާތަކުގައި މަރުވީ ކިތައް މީހުން ކަމެއް ނޭނގެ އެވެ. ނަމަވެސް އިނގިރޭސި ވިލާތުގައި ހިންގާ ސީރިއަން އޮބްޒަވޭޓަރީން ބުނީ ސީރިއާ ސަރުކާރަށް ތާއީދުކުރާ 26 ހަނގުރާމަވެރިން މަރުވެފައިވާ ކަމަށެވެ. އޭގެ ތެރެއިން ގިނައީ އީރާން މީހުން ކަމަށް ވެސް ބުނެފައިވެ އެވެ.
ސީރިއާ އަށް އެންމެ ފަހުން މިސައިލް ހަމަލާ މިދިނީ ކޮން ބައެއް ކަމެއް ނޭނގެ އެވެ. ނަމަވެސް މީގެ ކުރިން މިސައިލް ހަމަލާދީފައި ވަނީ އިޒްރޭލާއި އެމެރިކާ އަދި ހުޅަނގުގެ ގައުމުތަކުންނެވެ.
އިޒްރޭލުން މީގެ ކުރިން ވަނީ ސީރިއާގައި ހިންގާ އީރާނުގެ ޑްރޯން މަރުކަޒަކަށް ހަމަލާދީފަ އެވެ. އެ ހަމަލާގައި މަރުވި 14 މީހުންގެ ތެރޭގައި އީރާނުގެ ހަތް މީހުން ހިމެނެ އެވެ.
އިރުމަތީ ޣޫތާގެ ދޫމާގައި ދާދި ފަހުން ދިން ކެމިކަލް ހަމަލާ އަށް ރައްދު ދިނުމުގެ ގޮތުން އެމެރިކާ، އިނގިރޭސި ވިލާތް އަދި ފްރާންސުން ވަނީ ސީރިއާ އަށް ވައިގެ ހަމަލާދީފަ އެވެ.