30 އެޕްރީލް 2018 - 06:35
"އެއާޕޯޓް" މަރުކާގެ ރައުޓާތައް ހުއްޓާލަން އުޅޭ ވާހަކަ އަކީ ތެދެއް ކަމަށް އެޕަލް އިން ބުނެފި އެވެ. އެ ކުންފުނިން ބުނީ ސްޓޮކްގައި މިހާރު ހުރި ރައުޓާތައް ހުސްވުމަށް ފަހު ދެން އެ ޑިވައިސްތައް ނުއުފައްދާނެ ކަމަށެވެ. ހުއްޓާލަން ނިންމާފައި ވަނީ "އެއާޕޯޓް އެކްސްޕްރެސް"، "އެއާޕޯޓް އެކްޓްރީމް" އަދި "އެއާޕޯޓް ޓައިމް ކެޕްސޫލް" އެވެ.
އެއާޕޯޓް މަރުކާގެ ރައުޓާތައް އުފައްދަން ފެށިއިރު، ވަޔަލެސް ނެޓްވޯކިން އާލާތްތައް ރަންގަނޑެއް ފަދަ އެވެ. އެއީ ވަރަށް މަދު ބަޔަކަށް ނޫނީ ބޭނުންކުރަން ލިބޭ އާލާތެއް ނޫނެވެ. އަނެއްކޮޅުން، އެވްރެޖް މީހުންނަށް ގަނެވޭ ވަރަށް ވުރެ ވަޔަލެސް ރައުޓާތައް އަގު ބޮޑެވެ.
ވަޔަލެސް ނެޓްވޯކިން ޑިވައިސްއެއް ގޮތުގައި އެޕަލު އިން އެއާޕޯޓް އުފެއްދީ 1999 ވަނަ އަހަރު އެވެ. އެ ރައުޓާތަކާ މެދު އެއިރު ބެލެވުނީ އެއީ އެޕަލްގެ ކޮމްޕިއުޓަރުތަކައް ޚާއްސަ އާލާތެއް ގޮތުގަ އެވެ. އަދި އެ ރައުޓާތައް ގިނަ ބަޔަކު ބޭނުންހިފައި އުޅުނީ ވެސް އެ އިހުސާސްގަ އެވެ.
މިހާރު ވަޔަލެސް ރައުޓާ ވެފައި ވަނީ ބޮޑުގުޅަ އަށެވެ. ކޮންމެ ގެއެއްގައި، ކޮންމެ ކޮޓަރިއެއްގައި އަދި ނުވިތާކަށް ގިނަ ބަޔަކު ޖީބުގައި ވެސް ވަޔަލެއް ރައުޓާތައް ގެންގުޅެ އެވެ.
އެޕަލްގެ ޒާތަށް ބަލާއިރު، އެ ކުންފުނިން ވިޔަފާރި އަމާޒުކުރަނީ އެވްރެޖަށް ވުރެ ތަނަވަސް މީހުންނަށެވެ. ވަޔަލެސް ނެޓްވޯކިން މާކެޓްގައި ރައުޓާތައް ގިނަވެ ވާދަވެރިކަން ނެތި ގޮސްފައިވުމުން ވަނީ އާލާތްތަކުގެ އަގުވެއްޓިފަ އެވެ. އެއާޕޯޓް މަރުކާގެ ރައުޓާތަކަށް ވުރެ ސްޕީޑް ބާރު ރައުޓާތައް، އެ އަށް ވުރެ ހެޔޮ އަގުގައި ލިބެން ހުރުމަކީ ވެސް އެޕަލްގެ ވިސްނުން ބަދަލުކުރި ސަބަބެއް ކަމަށް ބެލެވެ އެވެ.
އެއާޕޯޓް ރައުޓާތައް އެޕަލް ހުއްޓާލުމުން ދޭހަވަނީ ވަޔަލެސް ނެޓްވޯކިން ސިނާއަތުން އެ ކުންފުނި ބޭރުވަނީ ކަމަށެވެ. ނަމަވެސް، އެ ދާއިރާއިން މާކެޓް ތަޖުރިބާ ލިބިފައިވާ ކުންފުންޏަކަށް ވާތީ، އެ މަސައްކަތްތަކަށް އަލުން ރުޖޫއަވުމަކީ އެޕަލް އަށް ދަތިކަމަކަށް ނުވާނެ އެވެ.
އެޕަލްގެ ވިސްނުން ހުރި ގޮތެއް އަހަރެމެންނަކަށް ނޭނގެ އެވެ. ގޫގުލް އަދި "ލިންކްސިސް"އާ ވާދަކުރުމަށް ފުން ނޭވާއެއް ލަނީ ކަމަށް ވެސް ވެދާނެ އެވެ. ވަޔަލެސް ރައުޓާ މާކެޓްގައި މި ވަގުތު އެންމެ ބާރުގަދަކަމަށް ބެލެވެނީ "ގޫގުލް ވައިފައި" އަދި ލިންކްސިސް "ވެލޮޕް" ވައިފައި ސިސްޓަމް އެވެ.