22 ޖުލައި 2016 - 01:13
ރާއްޖޭގައި އިންތިގާލީ ވެރިކަމެއް ކުރުން ނޫން ގޮތެއް ނެތް ކަމަށާއި އެކަން ވަރަށް އަވަހަށް ވެގެންދާނެ ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އިދިކޮޅު ފަރާތްތައް ގުޅިގެން މިރޭ ބޭއްވި ޖަލްސާގައި، އިނގިރޭސިވިލާތުގައި ހުންނަވައިގެން ވާހަކަ ދައްކަވަމުން ނަޝީދު ވިދާޅުވީ ރާއްޖޭގައި އިންތިގާލީ ވެރިކަމެއް ގާއިމް ކުރުން ނޫން ގޮތެއް ނެތް ކަމަށާއި އެކަން ލަސްތަކެއް ނުވެ ވެގެންދާނެ ކަމަށެވެ. އިދިކޮޅު އިއްތިހާދުން މަސައްކަތް ކުރަނީ އެކަމަށް ކަމަށާއި ރަައްޔިތުން އުއްމީދު ގެއްލުވާލައިގެން ނުވާނެ ކަމަށް އެމަނިކުފާނު ވިދާޅުވި އެވެ.
"ވެރިކަން ބަދަލުވާންޖެހޭ، ހެޔޮ ވެރިކަމެއް ރައްޔިތުންނަށް ލިބެންޖެހޭ. ގުޅިފައިވާ އެންމެހައި ސިޔާސީ ވާދަވެރިން ގުޅިގެން މި ނިކުންނަނީ އިންތިގާލީ ސަރުކާރެއް ރައްޔިތުންނަށް ހޯދައިދޭން، އަޅުގަނޑުމެންގެ އުއްމީދު ނަގާލައިގެނެއް ނުވާނެ، އަދި ނަގާލާކަށް ވެސް ނުޖެހޭ." ވީޑިއޯ ކޮންފަރެންސްކޮށް ވާހަކަ ދައްކަވަމުން ނަޝީދު ވިދާޅުވި އެވެ.
އިންތިގާލީ ވެރިކަމެއް ގާއިމްވުމުން ވެރިކަމުގެ ނިޒާމު ސާފުކޮށް، ރާއްޖޭގައި މިނިވަން ޖުޑިޝަރީ އަކާއި މިނިވަން އިލެކްޝަންސް ކޮމިޝަނަކާއި މިނިވަން މުއައްސަސާތަކެއް ގާއިމް ކުރާނެ ކަމަށް ނަޝީދު ވިދާޅުވި އެވެ. އަދި މިހާރު ގިނަ ރައްޔިތުން ނިކުމެ ތިބީ، އެކަކު އަނެކެއްގެ ކިބައިން ހިތްވަރު ލިބިގެން ކަމަށް ނަޝީދު ވިދާޅުވި އެވެ.
"އިންތިގާލީ މަރުހަލާ މިއޮތީ. އެ މަރުހަލާގައި ބޭނުންވާ ކަންކަން ފުރިހަމަ ނުވެ، ދިވެހިންގެ އުއްމީދުތައް ފުރިހަމަ ނުވާނެ ކަން އަޅުގަނޑުމެންގެ ތަޖުރިބާއިން އެނގޭ. އަޅުގަނޑުމެން އެނބުރި އަންނާނެ، ރައްޔިތުންނަށް ހެޔޮ ވެރިކަމެއް ކޮށްދޭނެ،" އިދިކޮޅު އިއްތިހާދު އުފެދުނު ފަހުން ބޭއްވި ފުރަތަމަ ޖަލްސާގައި ވާހަކަ ދައްކަވަމުން ނަޝީދު ވިދާޅުވި އެވެ.
ރައްޔިތުންގެ އުއްމީދުތައް ހަގީގަތަކަށް ވާންޖެހޭނެ ކަމަށް ވިދާޅުވެ، ނަޝީދު ވިދާޅުވީ އާމްދަނީ އިތުރުވެ، އާއިލާއާ އެކު އުފަލުގެ ކޮންމެ ރައްޔިތަކަށް އުޅެވެންޖެހޭނެ ކަމަށެވެ. ދިވެހިންނަށް އަލުން ރާއްޖެ އަނބުރާ ހޯދައިދޭނެ ކަމަށާއި އެކަމުގެ ޔަގީންކަން ދެއްވާ ކަމަށް ނަޝީދު ވިދާޅުވި އެވެ.
އެމްޑީޕީ އާއި އަދާލަތު ޕާޓީގެ އިސްވެރިން ވެސް ބައިވެރިވި އެ ޖަލްސާގައި ބާއްވަން ތަނެއް ނުދިނުމުން އެ ޖަލްސާ ބާއްވާފައިވަނީ އާޓިފިޝަލް ބީޗް ސަރަހައްދުގައި ހުންނަ އެމްޑީޕީގެ ހަރުގެ ކުރިމަތީގަ އެވެ.