24 އެޕްރީލް 2018 - 14:17
ޒިމްބާބުވޭ (އެޕްރީލް 24) - ޒިމްބާބުވޭގައި ހަޅުތާލު ކުރަމުން ދިޔަ ގާތްގަނޑަކަށް 15،000 ނަރުހުން އަލުން މަސައްކަތަށް ނުކުމެއްޖެ ކަމަށް އެ މީހުން ތަމްސީލްކުރާ ޔޫނިއަން އިން ބުނެފި އެވެ.
ނަރުހުންގެ ހަޅުތާލު ހުއްޓާލީ މައްސަލަ ހައްލު ކުރަން މަޝްވަރާ ކުރަން ސަރުކާރުން އެއްބަސްވުމުންނެވެ. ނަރުހުން ޑިމާންޑް ކުރަމުން ދިޔައީ މަސައްކަތުގެ މާހައުލު ރަނގަޅުކޮށްދީ މުސާރަ ބޮޑުކޮށްދިނުމަށެވެ. ހަޅުތާލު ކުރި ނަރުހުން މީގެ ހަފުތާއެއްހާ ދުވަސްކުރިން ވަނީ މަސައްކަތް ހުއްޓާލައިފަ އެވެ.
ސަރުކާރުން ކުރިން ވަނީ މަސައްކަތް ހުއްޓާލި ނަރުހުން ވަޒީފާ އިން ވަކިކުރިކަން އިއުލާންކޮށްފަ އެވެ. އަދި އެއީ ސިޔާސީ ގޮތުން އުފައްދާފައިވާ މައްސަލައެއް ކަމަށް ސަރުކާރުން ތުހުމަތުކޮށްފައިވެ އެވެ.
"މައްސަލަތައް ހުރި ނަމަވެސް ނަރުހުން މިހާރު ވަނީ މަސައްކަތަށް ނުކުމެފައި،" ޒިމްބާބުވޭގެ ނާސަސް އެސޯސިއޭޝަންގެ ތަރުޖަމާން އެނޮޗް ޑޮންގޯ ވިދާޅުވި އެވެ. "ބައެއް މީހުންނަށް ވަނީ ވަޒީފާ އިން ވަކިކުރި ކަމުގެ ލިޔުމުގައި ސޮއިކުރަން އަންގާފައި. އަދި އޭގެ ފަހުން ވަނީ ވަޒީފާ ދިން ކަމުގެ ލިޔުމުގައި އެ މީހުން ލައްވާ ސޮއިކުރުވާފައި."
ޒިމްބާބުވޭގެ ރައީސް އެމާސަން ނަންގަގްވާ ދާދި ފަހުން ވަނީ، ޑޮކްޓަރުންގެ ހަޅުތާލަކާ ގުޅިގެން، މުސާރަ ބޮޑުކޮށް ދެއްވާނެ ކަމަށް ވިދާޅުވި އެވެ.