25 އެޕްރީލް 2018 - 06:13
މި އަހަރަކީ މަޝްހޫރު ބައެއް ފިލްމީ ތަރިންގެ ދަރިންނާއި އެފަދަ މީހުންގެ އާއިލާ އަށް ނިސްބަތްވާ ޒުވާނުންތަކެއް ބޮލީވުޑަށް ނުކުންނަ އަހަރެކެވެ. މި ލިސްޓްގައި ހިމެނޭ ސްރީދޭވީގެ ދޮށީ އަންހެން ދަރިފުޅު ޖާންވީ ކަޕޫރާއި ސައިފް އަލީ ހާންގެ ދަރިފުޅު ސާރާ އަލީ ހާންގެ ނަން ވަކިން ފާހަގަކޮށްލެވެ އެވެ.
މީގެ އިތުރުން މަޝްހޫރު އެކްޓަރު ޗަންކީ ޕާންޑޭގެ ދަރިފުޅު އަނަންޔާ ޕާންޑޭއަކީ ވެސް، ޖާންވީ އާއި ސާރާ ގޮތަށް، ކަރަން ޖޯހަރް ޕްރޮޑިއުސް ކުރާ ފިލްމަކުން ތައާރަފު ވާނެ ބަތަލާއެކެވެ. އެއީ މިހާރު ޝޫޓިން މަރުހަލާގައި އޮތް، އަންނަ ނޮވެމްބަރު 23 ގައި ރިލީޒް ކުރާ "ސްޓޫޑަންޓް އޮފް ދި އިޔާ 2" އެވެ. މި ފިލްމަކީ ކަރަން 2012 ގައި ޑައިރެކްޓް ކުރި "ސްޓޫޑަންޓް އޮފް ދި އިޔާ" ފްރެންޗައިޒްގެ ދެވަނަ ބައެވެ. ތަފާތު ކާސްޓަކާ އެކު، މި ފަހަރު ފިލްމް ޑައިރެކްޓް ކުރަނީ ޕުނިތު މަލްއޫރާ އެވެ.
ފިލްމް ލޯންޗްކޮށް، މީގެ މަސައްކަތް ފެށި ފަހުން ޗަންކީ އަށް މިހާރު ދަރިފުޅުގެ ފިލްމްގެ ވާހަކަ ނޫން ވާހަކައެއް ނުދެއްކެ އެވެ. އޭނާ ހުރީ ދަރިފުޅު ބޮލީވުޑަށް ތައާރަފުވާތީ ވަރަށް އުފަލުންނެވެ. ކުރިން ބެލެވުނު ގޮތަށް އަނަންޔާ ފިލްމީ ތަރިއަކަށްވާތީ ބައްޕައެއްގެ ހައިސިއްޔަތުން ޗަންކީ ދައްކަން ހުރީ ހުސް ފޮނި ވާހަކަ އެވެ.
މީގެ ކުރިން ޗަންކީ ދިން އިންޓަވިއުއެއްގައި އަނަންޔާ، 19، ގެ ވާހަކަ ދައްކަމުން ބުނީ ދަރިފުޅު ރީތިކަމުން، ޑައިރެކްޓަރު/ކޮރިއޮގްރާފަރު ފަރާ ހާން އޭނާ އަށް ޖޯކު ވެސް ޖަހާ ކަމަށެވެ. އެގޮތުން އަނަންޔާ، އޭނާގެ ދަރިއެއްހެން ހީނުވާ ކަމަށް ވެސް ފަރާ ބުނާ ކަމަށް ޗަންކީ ބުންޏެވެ.
މިހާރު އޭނާ އެންމެ އުފާވަނީ ކަރަން ކަހަލަ ވަރުގަދަ ޕްރޮޑިއުސަރެއްގެ ފިލްމަކުން ދަރިފުޅު ފިލްމީ ދުނިޔެ އަށް ނެރެވޭތީ އެވެ. ޗަންކީ ބުނީ އަނަންޔާގެ ފުރަތަމަ ފިލްމް ރިލީޒްވުމާ އެކު، އޭނާއާ ދޭތެރޭ މީހުން ދެކޭ ގޮތް ވެސް ބަދަލުވެގެން ދާނެ އެވެ.
"ދަރިފުޅު ސްކޫލަށް ދިޔަ ޒަމާނުގައި ސްކޫލް ދޮށަށް ދިޔައިމަ މީހުން ކިޔާނެ ޗަންކީ ޕާންޑޭއޭ އެހެރީ. ދެން އަނަންޔާ ފިލްމް ކުޅެން ފެށީމަ މީހުން އަހަރެން ދެން ސިފަކުރާނީ އަނަންޔާގެ ބައްޕަގެ ގޮތުގައި އެކަނި ކަންނޭނގޭ،" ގިނަ އަދަދެއްގެ ފިލްމްތައް ކުޅެފައިވާ 55 އަހަރުގެ އެކްޓަރު ބުންޏެވެ. "ޔަގީނުން ވެސް އެކަމާ އަހަރެން ވަރަށް ފަހުރިވެރި ވާނަން."
އަނަންޔާގެ ވާހަކަ ދައްކަމުން ޗަންކީ ބުނީ "ސްޓޫޑަންޓް އޮފް ދި އިޔާ 2" ލޯންޗް ކުރި ދުވަހު، އެކަނި ވެސް އަނަންޔާގެ އިސްޓަގްރާމް ފޮލޯވަރުންގެ އަދަދު ލައްކައަކަށް އަރާފައިވާ ކަމަށެވެ. އެހެންވެ އެއީ ދަރިފުޅު މަގުބޫލު ބަތަލާއަކަށް ވާނެ ކަމުގެ ސިގްނަލެއް ކަމަށް ބުންޏެވެ.
"އަހަންނަށް ވަރަށް ޔަގީން ކަރަންގެ މި ފިލްމުން އަނަންޔާ ވަރަށް ވިދާލާނެކަން. މިހާރު ވެސް މި ހުންނަނީ ފިލްމީ ރިލީޒް ކުރާ ދުވަސް ވެސް ލަސްވެފައި، އެ ބަލާ ހިތުން،" ޗަންކީ ބުންޏެވެ. "އަނަންޔާ މިހާރު އެ ހުރީ ވަރުގަދަ ޓީމެއްގެ ތެރޭގައި. އެހެންވީމާ އޭނަގެ ބެސްޓް އެ މީހުން ނެރޭނެ."
ޓައިގާ ޝްރޮފް ބަތަލުގެ ރޯލް ކުޅޭ ފިލްމުން ދެ ބަތަލާއިން ފެނިގެން ދާނެ އެވެ. އެއީ އަނަންޔާ އާއި ތާރާ ސުތާރިއާ އެވެ.