23 އެޕްރީލް 2018 - 17:02
ކުރީގެ ރައީސް މައުމޫން އަބްދުލްގައްޔޫމާއި އުއްތަމަ ފަނޑިޔާރު އަބްދުﷲ ސައީދުގެ އިތުރުން ފަނޑިޔާރު އަލީ ހަމީދަށް ކުރާ ދައުވާގެ މިއަދު ބާއްވަން ހަމަޖެއްސި އަޑުއެހުން ކެންސަލްކޮށްފި އެވެ.
މިދިޔަ ފެބްރުއަރީ މަހުގެ ފުރަތަމަ ދުވަހު ސުޕްރީމް ކޯޓުން ނެރުނު އަމުރަށް ފަހު އިއުލާންކުރި ކުއްލި ނުރައްކަލުގެ ހާލަތުގެ ދަށުން ހައްޔަރުކުރި މައުމޫނާއި އުއްތަމަ ފަނޑިޔާރާއި ފަނޑިޔާރު އަލީ ހަމީދަށް ކުރާ ދައުވާތަކުގެ ތެރެއިން މިއަދު ބާއްވަން އޮތީ އެ ބޭފުޅުންނަށް އަދުލު އިންސާފު ގާއިމްކުރަން ހުރަސް އެޅިކަމުގެ ދައުވާގެ އަޑުއެހުމެވެ. އެ ދައުވާކުރަނީ އެ ބޭފުޅުންނަށް ކުރެވޭ ތުހުމަތުތަކާ ގުޅޭ ހެކިތައް އެ ބޭފުޅުންގެ ފޯނުގައި ހުރި ކަމަށް ބެލެވިގެން ފޯނު ދޭން އެންގުމުން ފޯނު ދީފައި ނުވާތީ ކަމަށް ބުނެ އެވެ.
އެ މައްސަލައިގެ ދެވަނަ އަޑުއެހުން މިއަދު މެންދުރު ބާއްވަން ހަމަޖެއްސުމަށް ފަހު ކެންސަލްކުރި ސަބަބެއް އަދި ސާފެއް ނުވެ އެވެ. އަޑުއެހުން ކެންސަލްކުރީ އަޑުއެހުން ބާއްވާ ވަގުތު ވެސް ފަސް ކުރި ފަހުންނެވެ.
މިވަގުތު ބަންދުގައި ތިއްބެވި އެ ތިން ބޭފުޅުންގެ މައްޗަށް އަދުލު އިންސާފު ގާއިމްކުރަން ހުރަސް އެޅުމުގެ ދައުވާގެ އިތުރުން ޓެރަރިޒަމްގެ ދައުވާ އާއި އެހެން ބައެއް ދައުވާތައް ވެސް ކުރެ އެވެ. އެކަމަކު ޓެރަރިޒަމްގެ ދައުވާގެ އަޑުއެހުންތައް އަދި ނުފަށަ އެވެ.
މައުމޫނާއި އުއްތަމަ ފަނޑިޔާރާއި ފަނޑިޔާރު އަލީ ހަމީދުގެ އިތުރުން ކުރީގެ ޕޮލިސް ކޮމިޝަނަރު އަހުމަދު އަރީފާއި ރައްޔިތުންގެ މަޖިލީހުގެ ހަތަރު މެމްބަރަކާއި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ދަރިކަލުން ސިޔާދް ގާސިމާއި ޖުޑިޝަލް އެޑްމިނިސްޓްރޭޓާ ހަސަން ސައީދުގެ އިތުރުން ޔުމްނާ މައުމޫންގެ ފިރިކަލުން މުހައްމަދު ނަދީމްގެ މައްޗަށް ވެސް ދައުލަތުން ދައުވާ ކުރެ އެވެ.