24 އެޕްރީލް 2018 - 06:14
ސްމާޓްފޯން މާކެޓްގައި މައިކްރޮސޮފްޓްގެ ނަން ހިފަހައްޓައިދޭ ވަރުގެ ފޯނެއް ނެތެވެ. އެކަން ނުވެގެން އުޅެނީ އެ މީހުންގެ ވިސްނުން ހުރި ގޮތުންނެވެ. މައިކްރޮސޮފްޓް ބޭނުންވަނީ، ޑިވައިސްތަކުގެ މެދުގައި ބޭނުންކުރެވޭ އޮޕަރޭޓިން ސިސްޓަމަކަށް، ވިންޑޯޒް 10 ހަދާށެވެ. އެކަމެއް ނުވި އެވެ.
މައިކްރޮސޮފްޓުން ވިންޑޯޒް 10 އުފެއްދިއިރު، މޮބައިލް ފޯނުތައް ހިންގަން ބޭނުންވާ ފީޗާތައް، އޮޕަރޭޓިން ސިސްޓަމްގައި ހިމެނި އެވެ. އެ އަށް ފަހު ދުވަސްތަކެއް ފަހުން ވިންޑޯޒް 10 އިން އެ ފީޗާތައް އުނިކުރި އެވެ. ނަމަވެސް، ވިންޑޯޒް 10 އަށް ދާދި ފަހުން ގެނައި ބަދަލުތަކުގައި އެ ފީޗާތައް އަލުން ވަނީ ހިމަނައިފަ އެވެ. އެއާ އެކު ސަޕޯޓަރުންނާއި ވަފާތެރިން ދަނީ މައިކްރޮސޮފްޓުން ސާފަސް ފޯނު ނެރެން ތައްޔާރުވަނީ ކަމަށް ބުނަމުންނެވެ.
މައިކްރޮސޮފްޓުން ސާފަސް ފޯނު ނެރެން އުޅޭ ކަމަށް ބުނެ ކޮންމެ އަހަރަކު ވެސް މި ހިސާބުގައި ވާހަކަތައް ދެކެވެ އެވެ. އެ އުންމީދުގައި ސާފަސް ފޯނަށް އެދި ތިބި މީހުންނަށް އަދި ވެސް ފުލެއް މެދެއް ނޭނގެ އެވެ. ސާފަސް ފޯނު ނެރޭނެ ދުވަހެއް މައިކްރޮސޮފްޓުން އަދި އިއުލާނެއް ނުކުރެ އެވެ.
މޮބައިލް ޑިވައިސްތަކަށް ބައިތައް އުފައްދައިދޭ ކުންފުނިތަކާ އެކު މައިކްރޮސޮފްޓުން ބަދަހި ގުޅެއް ބާއްވަ އެވެ. މައިކްރޮސޮފްޓް އެދޭހާ ގޮތަކަށް ބައިތައް އުފައްދައިދިނުމަށް ކުންފުނިތައް ކެތްމަދުވެފައި ތިބިކަން ވެސް އެނގެ އެވެ. ނަމަވެސް، ވިންޑޯޒް މޮބައިލް އަކީ ފޭލިވެފައި އޮތް ޕްރޮޖެކްޓެކެވެ. އެއީ ސާފަސް ފޯނު ކަމަށް ވި ނަމަވެސް، ވިންޑޯޒް 10ން ހިންގާ ނަމަ ޑިވެލޮޕަރުންގެ ފުރިހަމަ އެއްބާރުލުން ލިބޭނެ ކަމަކަށް ނުބެލެވެ އެވެ.
ސްމާޓްފޯން މާކެޓުން ގޮނޑިއެއް ކާމިޔާބުކުރުމަށް މައިކްރޮސޮފްޓް ކުރި މަސައްކަތް އަބަދު ވެސް ފޭލިވެފައި ވަނީ ވިންޑޯޒްގެ ސަބަބުންނެވެ. ވިންޑޯޒް މޮބައިލް އޮޕަރޭޓިން ސިސްޓަމްގައި ބޭނުންކުރާނެ ޒަމާނީ އެޕްލިކޭޝަންތައް ނެތުމުންނެވެ. ވިންޑޯޒް 10 އެޕްލިކޭޝަން އުފެއްދުމަކީ ގޫގުލުން ކުރަން ބޭނުންކަމެއް ގޮތުގައި ނުފެނެ އެވެ. ވާދަވެރި އެހެން ކުންފުނިތަކުން ވެސް ވިންޑޯޒް ފޯނަކަށް އެޕްލިކޭޝަން ލިޔޭދޭން ޝައުގުވެރިއެއް ނުވެ އެވެ. އެހެންކަމުން، ސާފަސް ފޯނަކީ ވިންޑޯޒުން ހިންގާ ފޯނަކަށް ހަދައިފި ނަމަ ދެން ވެސް ވާނީ އަލުން ކުރަން އޮތް މަސައްކަތަކަށެވެ.