21 ޖުލައި 2016 - 15:04
ބޭނުން ނުކޮށް އުކާލާ ޕްލާސްޓިކް ފެން ފުޅީގެ މަތިގަނޑުތައް ބޭނުންކޮށްގެން ރާއްޖޭގެ ފެން ކުންފުނި، އެމްޑަބްލިއުއެސްސީން ރާއްޖޭގެ ރީތިކަން ދައްކާލައިފި އެވެ.
ގާތްގަނޑަކަށް 5000 މަތިގަނޑު ބޭނުންކޮށްގެން ރާއްޖޭގެ ކަނޑުތަކާއި ރަށްތައް ދައްކުވައިދޭގޮތަށް ތައްޔާރުކުރި ބިލްބޯޑު މިހާރު ވަނީ ފެން ބިލްޑިންގެ ކަންމަތީގައި އާއްމުންނަށް ފެންނާނެހެން ބަހައްޓައިފަ އެވެ.
މި ބޯޑުގައި ބޭނުންކޮށްފައިވަނީ އައިލެންޑް ބެވްރޭޖަސް މޯލްޑިވްސް (އައިބީއެމް) އިން އުފައްދާ ތާޒާ ފެންފުޅީގެ މަތިގަނޑުތަކެވެ. އެ ފެން ފުޅީގައި ބޭނުންކުރަނީ ހަމައެކަނި ފެހިކުލައިގެ މަތިގަނޑަށް ވުމުން ރާއްޖޭގެ ކަނޑުތައް ދައްކުވައިދޭން ބޭނުންކޮށްފައިވަނީ ނޫ ކުލައިގެ ސްޕްރޭ ކޮށްފައިވާ މަތިގަނޑުތަކެކެވެ.
ރާއްޖޭގެ ރީތިކަން ދައްކުވައިދީފައިވަނީ ތެރަސް ބޭނުންކޮށްގެން، ބޯޑުގައި މަތިގަނޑުތައް ތަތްކޮށްގެންނެވެ. ހުދާއި ފެހި އަދި ނޫކުލައިގެ މަތިގަނޑުތަައް ބޭނުންކޮށްގެން ބޯޑު ތައްޔާރުކުރީ އެ ކުންފުނީގެ މެނޭޖިން ޑިރެކްޓަރު ފަޒުލް ރަަޝީދުގެ ހިޔާލަށް އެމްޑަބްލިއުއެސްސީގެ މާކެޓިން އެންޑް ޕަބްލިކް ރިލޭޝަންގެ މުވައްޒަފުންނެވެ.
ހަފުތާއެއްހާ ދުވަހުގެ މި މަސައްކަތުން ރީޔޫސް ކުރަން އެމްޑަބްލިއުއެސްސީން ކުރާ މަސައްކަތް ފެނިގެންދާ ކަމަށާއި ބޭނުމަކީ ތިމާވެށި ރައްކާތެރި ކުރުމާއި ރީޔޫސް ކުރަން ހިތްވަރު ދޭން ކަމަށް ފަޒުލް ވިދާޅުވި އެވެ.
އެމްޑަބްލިއުއެސްސީން އަންނަނީ 2013 ވަނަ އަހަރުން ފެށިގެން ގޭގެއިން ހުސްކުރާ ތާޒާ ފެންފުޅި އެއްކޮށް ރީސައިކަލް ކުރަމުންނެވެ.