19 އެޕްރީލް 2018 - 06:21
ކަރަން ޖޯހަރް 2001 ގައި ގެނެސް ދިން ފިލްމް "ކަބީ ހުޝީ ކަބީ ޢަމް" ގެ ހުވަފެނީ ކާސްޓަށް ފަހު، އޭނާގެ ކުންފުނި ދަރްމާ ޕްރޮޑަކްޝަނުން އަންނަ އަހަރު ގެނެސްދޭ ފިލްމް "ކަލަންކް" ގައި ވެސް ބެލުންތެރިން މޮޔަކޮށްލާ ވަރުގެ ކާސްޓެއް ހިމަނައި، އެކަން އިއުލާންކޮށްފި އެވެ.
މީޑިއާތަކުން "ޝިއްދަތު" ގެ ނަމުގައި ރިޕޯޓް ކުރަމުން ދިޔަ ފިލްމް "ކަލަންކް" އަކީ 2014 ގައި ދަރްމާ އަށް "2 ސްޓޭޓްސް" ޑައިރެކްޓްކޮށް ދިން އަބިޝެކް ވަރްމަން ލިޔެ، ޑައިރެކްޓް ކުރާ ޕީރިއަޑް ޑްރާމާއެކެވެ. މީގެ ކާސްޓުންނަކީ 1990 ގެ އެންމެ ވިދާލި އެއް ޖޯޑު ކަމަށްވާ ސަންޖޭ ދަތާއި މަދޫރީ ޑިކްސިޓް، މިހާރު އެންމެ ކާމިޔާބު ޖޯޑުންގެ ތެރޭގައި ހިމެނޭ ވަރުން ދަވަން އާއި އާލިއާ ބަޓް އަދި ސޮނާކްޝީ ސިންހާ އާއި އަދިތިޔާއޯ ރޯއި ކަޕޫރެވެ.
ކުރިން ލޯބީގެ ގުޅުމެއް ވެސް ބޭއްވި މަދޫރީ އާއި ސަންޖޭ އަލުން ފިލްމަކަށް އެއްބަސް މިވީ އެކުގައި މަސައްކަތް ނުކުރާތާ 21 އަހަރު ފަހުންނެވެ. "ސާޖަން" އާއި "ކަލްނަޔަކު" ފަދަ ކާމިޔާބު އެތައް ފިލްމެއް އެކުގައި ކުޅެފައިވާ މަދޫރީ އާއި ސަންޖޭ އެންމެ ފަހުން އެކުގައި ކުޅުނު ފިލްމަކީ 1997 ގެ "މަހާނަތީ" އެވެ.
"ކަލަންކް" ވެގެން ދާނީ ކަރަންގެ ޕްރޮޑިއުސް ކުރާ ފިލްމެއް މަދޫރީ ކުޅޭ ފުރަތަމަ ފަހަރަށް ވެސް މެ އެވެ. އޭނާ އަށް މި ފިލްމުން ދިން ރޯލް ކުރިން ކުޅެން އޮތީ ދާދި ފަހުން މަރުވި ބަތަލާ ސްރީދޭވީ އެވެ.
އާލިއާ އާއި ވަރުންއަކީ މި ފަހުން ދަރްމާގެ އެންމެ ފެވަރިޓް އެއް ޖޯޑެވެ. އެ ދެ ތަރިން އެކުގައި އެންމެ ފަހުން ފެނިގެން ދިޔައީ މިދިޔަ އަހަރު ރިލީޒް ކުރި "ބަދްރީނާތު ކީ ދުލްހަނިޔާ" އެވެ. އަދި "ކަލަންކް" ވެގެން ދާނީ އާލިއާ އާއި ވަރުން އެކުގައި ކުޅޭ ހަތަރު ވަނަ ފިލްމަށެވެ.
ކަރަން މިދިޔަ އަހަރު ގެނެސް ދިން ފިލްމް "އިއްތިފާގް" ގެ ބަތަލާއަކީ ސޮނާކްޝީ އެވެ. އަދި އަދިތިޔާ ވަނީ ކުރިން ކަރަން ގެނެސް ދިން ދެ ފިލްމެއް ކުޅެފަ އެވެ. އެއީ ޔެ ޖަވާނީ ހޭ ދީވާނީ (2013) އާއި އޯކޭ ޖާނޫ (2017) އެވެ.
މަދޫރީ ފިޔަވައި "ކަލަންކް" ގެ އެހެން ހުރިހާ ތަރިން ވަނީ ދަރްމާގެ ފިލްމްތައް ކުޅެފަ އެވެ. ސަންޖޭ ކުޅުނު އެ ސްޓޫޑިއޯގެ ފިލްމަކީ އުނގްލީ (2014) އެވެ.
މިހާރު ފަސްޓްލުކް ވެސް ދައްކާލައި، ޝޫޓިން ފަށަން ތައްޔާރުވަމުން އަންނަ "ކަލަންކް" ސިނަމާތަކަށް އަންނާނީ އެޕްރީލް، 19، 2019 ގަ އެވެ.
"ކަބީ ހުޝީ ކަބީ ޢަމް" އަކީ ކަރަން ގެނެސް ދިން ފިލްމްތަކުގެ ތެރެއިން އެ ފިލްމްގެ ވަރުގަދަ ކާސްޓާ އެކު ވަރަށް މަޝްހޫރުވި ފިލްމެކެވެ. އޭގެ ތަރިންގެ ތެރޭގައި އަމީތާބް ބައްޗަން އާއި ޖާޔާ ބައްޗަން، ޝާހްރުކް ހާނާއި ކާޖޮލް އަދި ކަރީނާ ކަޕޫރާއި ރިތިކް ރޯޝަން ހިމެނެ އެވެ. އަދި "ކަލަންކް" ވެސް ވެގެން ދާނީ "ކަބީ ހުޝީ ކަބީ ޢަމް" ދެއްކި ފަދަ ޖާދޫއެއް ދައްކުވައި ދޭނެ ފިލްމެއް ކަމަށް ގަބޫލު ކުރެވެ އެވެ.