18 އެޕްރީލް 2018 - 06:08
އާދިއްތަ ދުވަހާ ގުޅޭ
"ކިހިނެއް... ކިހިނެއް މިތަނަށް ތިއައީ؟" އަޔާންގެ މޫނު ފެނިފައި އަހަރެންނަށް ވާހަކަދެއްކުނީ އުދަނގުލުންނެވެ.
"ދެފައިން ހިނގާފައި." އަޔާން ދޮރުފަތުގައި އަތް އަޅާ ބޮޑަށް ހުޅުވާލައިފައި އެތެރެއަށް ވަންނަން އައެވެ.
އަހަންނަށް ފަހަތަށް ޖެހިލެވުމާ އެކު އޭނަ އެތެރެއަށް ވަދެގެން ދާން ފެށި އެވެ. އަވަސްއަވަހަށް ދޮރު ލައްޕާލުމަށް ފަހު އަހަރެން އަޔާން ފަހަތުން ހިނގައިގަތީމެވެ. އަހަރެން ފަހަތުގައި ޖައްސާފައި ހުއްޓާ އަޔާން ކުއްލިއަކަށް ހުއްޓުމުން ގައިގައި ލައިނުގަނެ ސަލާމަތްވީ ކިރިޔާ އެވެ.
"އަހަންނަށް ވެސް އެނގޭ އަޔާން މިތަނަށް އައީ ހިނގައިފަކަން. އަހަރެން މިއަހަނީ އަޔާން ރޭގަ ފުރަން އުޅެފަ ކިހިނެއްހޭ ވީ؟" ދެ ފިޔަވަޅު ފަހަތަށް އަޅާލައިފައި ހުއްޓެމުން އަހަރެން ސުވާލުކުރީމެވެ.
"އެ ވާހަކަ ދައްކަންވެގެން މިއައީ." އަޔާން އަހަރެންގެ މޫނަށް ބަލަން ފެށި އެވެ.
އަހަރެން އަޑުއަހަން ތައްޔާރުވެލަމުން ހަށަން ބަނދެލީމެވެ. އެ ވަގުތު އަޔާން ކުރިއަށް ފިޔަވަޅެއް އަޅާލައިފައި ހިފަހައްޓައިލީ އަހަރެންގެ ދެ އުޅަބޮށީގަ އެވެ. އެ ދެ ލޯ އަހަރެންގެ މޫނަށް ހުއްޓާލައިގެން ހުރި ގޮތުން ހިތުގެ ތެޅުން އަވަސްވި އެވެ.
"ސާޖީ އަހަރެން މި މަޑުކުރީ ސާޖީ އަށް ޓަކައި. އަހަރުމެން ދެ މީހުންނަށްޓަކައި. ސާޖީ ވާނީ އަހަންނަށް އެއް ޗާންސް ދޭން. އައި ޑިޒާވް ދެޓް މަޗް. އެތައް އަހަރަކަށްފަހު އަހަރުމެން ދެ މީހުން މިގޮތަށް ބައްދަލުވާނީ ކޮންމެވެސް ސަބަބެއް އޮވެގެން. އެއީ ކޮން ސަބަބެއްތޯ ބަލަން އަހަރެން ބޭނުން. އަހަރެން ނޭދޭނަން ސާޖީގެ މުޅި އުމުރު އަހަރެންނަށް އިތުބާރު ކުރުމަ ބޭކާރުކޮށްލާކަށް. އޯލް އައިމް އާސްކިން އިޒް އެ މަންތް. މަހެއްގެތެރޭ ސާޖީގެ އިތުބާރު ނުހޯދިއްޖެއްޔާ އަހަރެން މުޅި އުމުރަށް ސާޖީ ދޫކޮށްލައިފަ ދާނަން. ދެން ދުވަހަކު ވެސް މޫނު ދައްކައެއް ނުލާނަން. އައި ޕްރޮމިސް." އަޔާންގެ ޖުމްލަ ނިމުނުއިރު އުޅަބޮށިން ކަނާއަތް ވަކިކޮށްލައިފައި އަހަރެންގެ މޫނުގައި ހިފަހައްޓައިލި އެވެ.
އެ ދެ ލޮލުން އަހަންނަށް ތެދުވެރިކަން ނޫން އެހެން އެކައްޗެއް ވެސް ނުފެނުނެވެ. ކޮންމެ ލަފްޒެއްގެ ނިކުތީ އަޔާންގެ ހިތުގެ ފުނުންނެވެ. އަހަރެން ވާހަކަދައްކަން ވީއިރު ކަރުތެރެ ހުރީ ބެދިފަ އެވެ. އެސްފިޔަތަކުގެ ފުރަގަހަށް ކަރުނަ ޖަމާވާން ފެށުމުން ކޮންޓްރޯލް ހޯދަންވެގެން ތިރި ބަލަން ފެށީމެވެ.
"ސާޖީ ބޭނުމިއްޔާ ވިސްނާލަން އަހަރެން އެއްދުވަސް ދޭނަން..." އަޔާން ވާހަކަދައްކަން ފެށި އެވެ.
"އުހު. އަހަރެން މިހާރު އަޔާން އަށް ޖަވާބުދޭނަން..." އަހަރެން އަޔާންގެ ވާހަކަ މެދުކަނޑާލައިފައި ބުނެލީމެވެ.
އެ ޖުމްލައިން އަޔާން ކުޑަކޮށް ސިހުނެވެ. އަހަރެންގެ މޫނުން އަތް ވަކިކޮށްލާފައި ފަހަތަށް ފިޔަވަޅެއް އަޅާލައިގެން ހުރެ ބަލަން ފެށީ ނުތަނަވަސްވެފައި ހުރި ފަދަ ނަޒަރަކުންނެވެ.
"އަހަރެން އަޔާން ތިއެދޭ ފުރުސަތު ދޭނަން." ހަތަރުކަޅި ހަމަކޮށްލައިގެން ހުރެ އަހަރެން އިއްވާލީމެވެ.
އަޔާންގެ ނުތަނަވަސްކަން އުފާވެރި ކަމަށް ބަދަލުވީ އަހަރެންގެ ލޯ ކުރިމަތީގަ އެވެ. އެ ހިތް ކަތިލާ ފަދަ ހިނިތުންވުމާއެކު އިޚުތިޔާރަކާ ނުލައި ދެއަތް އުފުލި އަހަރެންގެ މޫނުގައި ހިފަހައްޓާލަން އައެވެ. ދެން ކުއްލިއަކަށް ހުއްޓާލައިފައި ތުންފަތް ޖައްސައިލީ އަހަރެންގެ ނިތުގަ އެވެ.
އެ ވަގުތު އަހަރެންގެ ގައިން ހީބިހި ނަގައިގަތެވެ.
"ތެންކިއު ސާޖީ." އަޔާން ތުންފަތް ވަކިކޮށްލާފައި ދުރަށް ޖެހިލުމުގެ ކުރިން އިއްވައިލި އެވެ.
ގަނޑުވެފައި ހުރި ބުދެއްހެން އަހަރެން ހުއްޓާ ފަހަތަށް ޖެހިލާފައި ގޮސް ހުއްޓުނެވެ. ގެއަށް ދާ ވާހަކަ ބުނުމުން އަހަންނަށް ބޯޖަހައިލެވުނެވެ. އަޔާން ހަނާ އަޅާލައިފައި ގޮސް ނިކުންނަމުން އަދި އެއްފަހަރު އެނބުރި ބަލައިލި އެވެ. ދެން ލޯމަތިން ގެއްލިއްޖެ އެވެ.
ދޮރު ލެއްޕުނު އަޑާއެކު އަހަރެންގެ ހަށިގަނޑަށް ހަރަކާތް އައެވެ. ވާގި ހުސްވާން ކައިރިވެފައިވާ ދެފައި ދަމަމުން ގޮސް އެންމެ ގާތުގައި ހުރި ސޯފާއަށް ވެއްޓިގަނެވުނެވެ. ދެކޮޅުވެރި ހިޔާލުތައް އައިސް ސިކުނޑި ފަތަހަ ނުކުރަނީސް އަހަރެން އަމިއްލަ ނަފްސަށް ވިސްނަދިނީމެވެ. އަހަރެންގެ ނިންމުމަކީ ހަމައެކަނި އަޔާން އަށް ޓަކައި އަހަރެން ނިންމި ނިންމުމެއް ނޫނެވެ. އެއީ އަހަރެންނަށްޓަކައި ވެސް މެއެވެ. ކުރިއަށް އޮތް 30 ދުވަސް ކޮންމެ ގޮތަކަށް ދިޔަސް އަހަރެން ފަހުން ހިތާމައެއް ނުކުރާނަމެވެ.
ފޯނު މަތިން ހަނދާންވެގެން ގޮސް ނެގިއިރު ސަބާގެ ދެ މިސް ކޯލު އިނެވެ. އަހަރެން ސަބާ އަށް ގުޅަން އުޅެނިކޮށް ގޭގެ ބެލްޖެހި އަޑު އައެވެ. އެ ވަގުތު ހިތް ތެޅިގަތީ ވަކިވަރެއް ބަލައިފައެއް ނޫނެވެ.
އެއީ އަޔާންއަކަށް ނުވާނެ އެވެ. އެއީ އެހެން މީހެކެވެ. އަހަރެން އަމިއްލަ ހިތަށް ވިސްނައިދީފައި ގޮސް ދޮރު ހުޅުވާލިއިރު އަތްފައި ހުރީ ފިނިވެފަ އެވެ. ކުރިމަތިން ސަބާ ފެނުމާ އެކު ހަމަޖެހުމުގެ ނޭވައެއް ދޫކޮށްލެވުނެވެ.
"އަހަރެންނަށް ހީވި އަޔާން މިދިމާއިން ނިކުމެގެން ދިޔަހެން. އެއީ އަޅެ މަށަށް ހީވިގޮތެއްތަ؟" ސަބާ އެތެރެއަށް ވަދެގެން ދަމުން ސުވާލުކުރި އެވެ.
އަހަރެން ދޮރު ލައްޕާފައި އެނބުރުނުއިރު އޭނަ އިނީ ސޯފާގައި އަހަރެންގެ މޫނަށް ބަލާށެވެ.
"ރަނގަޅަށް ތި ހީވީ. އޭނަ މިތާ ހުރެފައި އެ ދިޔައީ." އަހަރެން ޖަވާބުދީ ނިމުނުއިރު ސަބާ ތެދުވެ ހުރީ ކޮޅަށެވެ.
އަހަންނަށް އެތަނަށް ދެވެންދެން ވެސް ލަސްވެގެން ފުމެމުން ކަހަލަ ގޮތަކަށް އައިސް ކައިރި އަށް ހުއްޓުނެވެ.
ސަބާ ކެތްމަދުވެފައި ކުރި ސުވާލުތަކުގެ ޖަވާބުގައި އަހަރެން ހުރިހާ ވާހަކައެއް ކިޔައިދިނީމެވެ. ސަބާ އިރުކޮޅެއް ވަންދެން ހިމޭންކަން އިޚުތިޔާރުކުރި އެވެ. ސަބާ ހިތްހަމަ ނުޖެހުނުހެން ހީވުމުން ހިތް ތެޅިލި އެވެ.
"ޕްލީޒް ޓެލްމީ އަހަރެން ކަންތައް މިކުރީ ރަނގަޅަށޭ." ސަބާގެ މޫނަށް ބަލަން ހުރެގެން އަހަރެން އެހީމެވެ.
ސަބާ ފުން ނޭވައެއް ދޫކޮށްލައިފައި ހިނިތުންވެލި އެވެ. އަހަންނަށް ހީވީ ބޮލުން ބަރެއް ނެގުނުހެންނެވެ. ސަބާ އުފާ ނުވަންޏާ އަހަރެންގެ އެއްވެސް އުފަލެއްގައި އޭގެ އެންމެ ފުރިހަމަ ހަމަޖެހުމެއް ނުވާނެ އެވެ. ސަބާއަކީ ފެށުނީއްސުރެ އަހަރެންގެ ކޮންމެ އުފަލަކާއި ހިތާމައެއްގައި އަހަރެންގެ ބައިވެރިޔާ އެވެ. އަޔާންއާ ދުރުން އުޅެވުނަސް އަހަންނަށް ސަބާގެ އެކުވެރިކަމާ ނުލައެއް ނޫޅެވޭނެ އެވެ.
ހަވީރު ލީނާ ގުޅާފައި ސައިބޯން ދާން އެދުނެވެ. ވާރޭ ވެހޭތީ އަހަރެން ހުރީ ގެއިން ނުނިކުމެވިފަ އެވެ. ލީނާ ކުރުނުކޮށްގެން އަހަރެން އެ ގެއަށް ދާން އެއްބަސްވީމެވެ. ޓެކްސީއެއް ހޯދައިގެން ދެވުނުއިރު ހިތް އޮތީ ތެޅިތެޅި އެވެ. އަޔާންގެ ހުށައެޅުމަށް އެއްބަސްވި ފަހުން އޭނަ ކުރިމައްޗަށް މި ދެވެނީ ފުރަތަމަ ފަހަރަށެވެ.
ލީނާ އައިސް ދޮރު ހުޅުވާލައިފައި އަހަރެން ފެނިގެން ހިނިތުންވެލި އެވެ. އެތެރެއަށް ވަނުމާއެކު އަހަރެންގެ ލޯ ހޯދައިލީ އަޔާން އެވެ. އޭނަ ފެންނަން ނެތުމުން ކުޑަ މާޔޫސްކަމެއް ލިބުނެވެ.
ސިޓިންރޫމް ސޯފާގައި ލަޔާލް އާއި ޒައިދުބެ ތިބީ ޓީވީ ބަލާށެވެ. ކުރިމަތީ ހުރި މޭޒުމަތީ ޕޮޕްކޯން ބޯތަށްޓަކާއި ކަވާބު ތަށްޓެއް ހުއްޓެވެ.
"ސާޖީ އަށް މި ގުޅީ ވާރޭވެހޭ ގަޑީގައި ކަވާބު ތެލުލައިގެން ކާންވެގެން. ސާޖީގެ ފޭވަރިޓެއްނު." ލީނާ އަހަރެންގެ އަތުގައި ހިފަހައްޓާލައިގެން ހުރެ އެތެރެއަށް ދަމުން ކިޔައިދިނެވެ.
ގޮސް އިށީންތަނާ ބަދިގެއާ ދިމާއިން ހިޔަނިވެގެން ބަލައިލެވުނެވެ. އަޔާން އަންނަ ތަން ފެނުނީ ތަބަކެއްގައި ހަތަރު ޖޯޑު ހޮޓް ޗޮކްލެޓް ބަހައްޓައިގެންނެވެ. ފަހަރަކު މީހަކަށް އެ މީހެއްގެ ޖޯޑު ދީފައި އަހަރެންނަށް ދިއްކޮށްލިއިރު ހަތަރުކަޅި ބައްދަލުވި އެވެ.
ނުނިމޭ