17 އެޕްރީލް 2018 - 13:06
ރިޔާޒް (އެޕްރީލް 17) - އީރާނުން ފޯރުކޮށްދޭ ޑްރޯންތައް ބޭނުންކޮށްގެން ސައުދީ އަރަބިއާ އަށް ޔަމަނުގެ ހޫތީން ދެން އިތުރު ހަމަލާއެއް ދީފި ނަމަ ވޭންހުރި ރައްދެއް ދޭނެ ކަމަށް ސައުދީ ކޯލިޝަނުން އިންޒާރުދީފި އެވެ.
ސައުދީން ބުނީ އެ ގައުމުގެ ދެކުނުން ދެ މިސައިލް މިދިޔަ ހަފުތާގައި ވައްޓާލާފައިވާ ކަމަށެވެ. އަދި ޔަމަނުން ފޮނުވާލި ބެލެސްޓިކް މިސައިލެއް ވައްޓާލާފައިވާ ކަމަށް ވެސް ސައުދީން ބުނެފައިވެ އެވެ.
"ސައުދީގެ ސިނާއީ އަދި މީހުން ދިރިއުޅޭ ސަރަހައްދުތަކަށް ޔަމަނުގެ ހޫތީން ދެން އިތުރު ހަމަލާއެއް ދީފި ނަމަ އޭގެ ރައްދު ވަރަށް ބޮޑަށް ހިތިވާނެ،" ކޯލިޝަނުގެ ތަރުޖަމާން ތުރްކީ އަލް މާލިކީ ވިދާޅުވި އެވެ.
އެކަމަކު ހޫތީން އިއްޔެ ވެސް ވަނީ ސައުދީގެ ދެކުނުގެ ނަޖްރާން ޕްރޮވިންސަށް މިސައިލް ހަމަލާއެއް ފޮނުވާލައިފައިވާ ކަމަށް އަލް އަޚްބާރިއްޔާ ޓީވީން ބުނެފައިވެ އެވެ.
އިރުމަތީގެ އަލް ޚުބަރު ސިޓީގައި ނޫސްވެރިންނާ ވާހަކަ ދައްކަވަމުން މާލިކީ ވިދާޅުވީ ސައުދީ އަށް ޑްްރޯން ހަމަލާ ދިނުމަށް ހޫތީން ބޭނުން ކުރަނީ ޔަމަނުގެ ވެރިރަށް ސަންއާގެ އެއާޕޯޓް ކަމަށެވެ.
ސައުދީގެ މަދަދު ލިބޭ ޔަމަނުގެ ސަރުކާރުން މިދިޔަ ހަފުތާގައި ބުނެފައި ވަނީ ސައުދީ އަށް ހަމަލާ ދޭން ބޭނުންކުރާ ޑްރޯން އުފައްދަނީ އީރާނުގައި ކަމަށާއި ޔަމަނުގެ އަސްކަރިއްޔާ އިން އެ ބާވަތުގެ ޑްރޯން ނުގެންގުޅޭ ކަމަށާއި އެއީ އެ ގައުމުގައި އުފެއްދޭނެ އެއްޗެއް ވެސް ނޫން ކަމަށެވެ.
އީރާނުގެ އެހީތެރިކަން ލިބޭ ހޫތީން ސަންއާ ހިފީ 2014 ވަނަ އަހަރު އެވެ. ސައުދީ ކޯލިޝަނުން ޔަމަނަށް ވައިގެ ހަމަލާތައް ދޭން ފަށާފައިވަނީ މާޗް 2015 ގަ އެވެ. ޔަމަނުގެ ދާޚިލީ ހަނގުރާމައިގައި މިހާތަނަށް ވަނީ 10،000 މީހުން މަރުވެފަ އެވެ.