16 އެޕްރީލް 2018 - 00:00
ސިވިލް ސާވިސްގެ ތިން ވަނަ ކޮންފަރެންސް ކާމިޔާބު ކަމަށާއި އެ ކޮންފަރެންސުން ވަރުގަދަ ފިލާވަޅުތަކެއް ލިބިއްޖެ ކަމަށް ސިވިލް ސާވިސް ކޮމިޝަން (ސީއެސްސީ) ގެ ރައީސް ޑރ. އަލީ ޝަމީމް މިއަދު ވިދާޅުވެއްޖެ އެވެ.
ކޮންފަރެންސް ނިންމުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޝަމީމް ވިދާޅުވީ އިއްޔެ އިން ފެށިގެން މިއަދުގެ ނިޔަލަށް ބޭއްވި މަޝްވަރާ ބައްދަލުވުމުގައި ވަރަށް އުއްމީދީ އާ ކަންތައްތަކެއް ނިންމާފައިވާ ކަމަށެވެ. އެ ކަންތައްތަކަށް، ހަތަރު ވަނަ ކޮންފަރެންސްގެ ކުރިން އަމަލީ ސިފައެއް ގެންނަން މަސައްކަތް ކުރާނެ ކަމަށް ވިދާޅުވި އެވެ.
އޭނާ ވިދާޅުވީ ސިވިލް ސާވިސްގެ ދާއިރާއާ ގުޅޭ ގޮތުން ރައްޔިތުންނާއި ސަރުކާރުންގެ ޑިމާންޑުތައް ވެސް ހުރީ ވަރަށް މަތީގައި ކަމަށެވެ. އެހެންވެ އެންމެން ގުޅިގެން މަސައްކަތް ކޮށް 21 ވަނަ ގަރުނަށް ފެތޭ ގޮތަށް މަސައްކަތް ކުރަންޖެހޭ ކަމަށް ވިދާޅުވި އެވެ.
"ހެޔޮ ވިސްނުމާ އެކީގައި އިސްނަގާ ބަޔަކަށް ޒިންމާދަރާއި ނަޒާހަތްތެރި ބަޔަކަށް ވާން ސިވިލް ސާވެންޓުން މަސައްކަތް ކުރަންޖެހޭ. ފުރިހަމަ ރޭވުންތެރިކަމާއި އެ އޮންނަ އިޖުރާއަތުގެ ތެރެއިން، އެ އޮންނަ ގާނޫނާއި ގަވާއިދުގެ ތެރެއިން ހަލުއިކޮށް، އަދި އަވަސްކޮށް ކަންކަން ކުރަން މަސައްކަތް ކުރަންޖެހޭ. އެއީ އަޅުގަނޑުމެން ދެ ދުވަސް ވަންދެން ބޭއްވި ބައްދަލުވުމުން އެއްބަސްވެވިފައިވާ ކަންކަން،" ދަރުބާރުގޭގައި ބޭއްވި ހަފުލާގައި ޝަމީމް ވިދާޅުވި އެވެ.
އޭނާ ވިދާޅުވިގޮތުގައި، ސިވިލް ސާވިސްގެ އަޒުމަކީ، ސަރުކާރާ އެކު ރައްޔިތުންނަށް ޚިދުމަތް ދޭން ތައްޔާރަށް އޮތުމެވެ. އެކަމަށް ސަރުކާރާއި ސިޔާސީ މުވައްޒަފުންގެ ފަރާތުން ވެސް އެއްބާރުލުމާއި އެހީތެރިކަން ލިބޭނެ ކަމަށް އުއްމީދު ކުރައްވާ ކަމަށް ސީއެސްސީގެ ރައީސް ވިދާޅުވި އެވެ.
މިއަދުގެ ރަސްމިއްޔާތު ޝަރަފުވެރި ކޮށްދެއްވައި ވާހަކަ ދައްކަވަމުން ޓޫރިޒަމް މިނިސްޓަރު މޫސާ ޒަމީރު ވިދާޅުވީ ރާއްޖެ އަށް ތަރައްގީ ގެނައުމުގައި އެންމެ އިސްދައުރެއް އަދާކުރަމުން އަންނަނީ ސިވިލް ސާވެންޓުން ކަމަށެވެ.
އޭނާ ވިދާޅުވީ މަސައްކަތް ކުރުމުގެ އިތުރުން ސިވިލް ސާވެންޓުންގެ ވެސް އަމިއްލަ ބޭނުންތަކެއް ހުންނާނެ ކަމަށެވެ. އެގޮތުން މުސާރަ ބޮޑުވުމާއި ބޯހިޔާވަހި ކަމަށް ލުއިތަކެއް ލިބުމަކީ ސިވިލް ސާވިސް މުވައްޒަފުންގެ ވަރަށް ބޮޑު އުއްމީދެެއް ކަމަށާއި، ރައީސް އަބްދުﷲ ޔާމީން އެ މައްސަލަތަކަށް ހައްލު ހޯއްދަވައި ދެއްވާފައިވާ ކަމަށް ވިދާޅުވި އެވެ.
ޒަމީރު ވިދާޅުވީ ޕޮލިސީ ލެވެލްގެ ބޭފުޅުން ބަދަލު ވިޔަސް، އެ މަސައްކަތްތައް ބަދަލުކުރެވޭނެ ގޮތެއް މިހާރަށް ވުރެ ހަރުދަނާކޮށް ރޭވުމަކީ މުހިއްމު ކަމެއް ކަމަށެވެ.
"މި ދެންނެވީ މިހާރު ނުކުރާ ވާހަކައެއް ނޫން. އެކަމަކު އެހާ ބޮޑު ޖަމްޕެއް ނަގައިގެން ދާއިރު ޕްރެޑިކްޓެބްލް ވިސްނުމުގައި ތިބިގެން އަޅުގަނޑުމެންނަށް ލަނޑުދަނޑިތައް ހާސިލް ކުރަން ދާ ވަގުތު ގިނަ. އެހެންވެ އެ ބަދަލު ގެންނަން ޖެހޭ،" ޒަމީރު ވިދާޅުވި އެެވެ.
ދެ ދުވަހަށް ބޭއްވި ސިވިލް ސާވިސް ކޮންފަރެންސްގައި ޖަމިއްޔާތަކާއި ސަރުކާރުގެ އޮފީސްތަކުން 180 އެއްހާ މީހުން ބައިވެރިވި އެވެ. އެ ބައްދަލުވުމަށް ހަތަރު ދާއިރާއަކުން ނުވަ ކަރުދާހެއް ހުށަހަޅައި މަޝްވަރާ ކުރި އެވެ.