13 އެޕްރީލް 2018 - 08:02
ޖިއްދާ (އެޕްރީލް 12) - ސައުދީ އަރަބިއާގައި ފުރަތަމަ ފަހަރަށް އަންހެނުންގެ ބައިސްކަލް ރޭހެއް ބާއްވައިފި އެވެ.
އަންހެނުންގެ ބައިސްކަލް ރޭސް ބާއްވާފައި ވަނީ ޖިއްދާގަ އެވެ. ދިހަ ކިލޯ މީޓަރުގެ ރޭހުގައި 47 އަންހެނުން ބައިވެރިވި އެވެ. ރޭސް އިންތިޒާމް ކޮށްފައި ވަނީ "ބީ އެކްޓިވް" ކިޔާ ގްރޫޕަކުންނެވެ.
ރޭސް އިންތިޒާމްކުރުމުގައި އިސްކޮށް އުޅުނު ނާދިމާ އަބޫ އަލް އީނައިން ބުނީ ރޭހުގައި ބައިވެރިވި އަންހެނުންގެ އަދަދު އިތުރުވުމުން އޭނާ ވެސް ހައިރާންވި ކަމަށެވެ. އެންމެ ފުރަތަމަ ނިންމީ 30 އަންހެނުން ބައިވެރިކުރަން ކަމަށް އޭނާ ބުންޏެވެ.
ސައުދީގައި އަންހެނުންގެ ބައިސްކަލް ރޭހެއް ބޭއްވުމުން އެ ގައުމުގެ ބައެއް މީހުން ވަނީ ހިތްހަމަނުޖެހުން ފާޅުކޮށް ޓްވީޓްކޮށްފަ އެވެ. އެކަކު ބުނި ގޮތުގައި އަންހެނުން ބައިސްކަލް ދުއްވަން ޖެހޭނީ އެންމެންގެ ތެރޭގައި ނޫން ކަމަށެވެ. އަނެކަކު ޓްވީޓްކުރި ގޮތުގައި އަންހެނުން ކުޅިވަރުތަކުގައި ބައިވެރިވި ނަމަވެސް އެކަން ކުރަން ޖެހޭނީ ވަކި ހުދޫދެއްގެ ތެރޭގައި ކަމަށެވެ. އަނެއް ބަޔަކު ވަނީ އެ އިވެންޓަށް ތައުރީފް ކޮށްފަ އެވެ.
މުނިފޫހިފިލުވުމުގެ އޭރިއާތަކުގައި އަންހެނުންނަށް ބައިސްކަލް ދުއްވުން ސައުދީގައި ހުއްދަކޮށްފައި ވަނީ 2013 ވަނަ އަހަރު އެވެ. އެ ފަހަރު ހުއްދަ ދީފައި ވަނީ މަހްރަމަކާ އެކު ބައިސްކަލް ދުއްވުމަށެވެ.
ސައުދީގައި ފަހަކަށް އައިސް ވަނީ އަންހެނުންނަށް ކުރިން މަނާ ބައެއްކަން ހުއްދަ ކުރަން ފަށައިފަ އެވެ. މި ގޮތުން އަންހެނުން ކާރު ދުއްވުން ކުރިން މަނާ ނަމަވެސް މި އަހަރުގެ ޖޫން މަހުން ފެށިގެން އަންހެނުންނަށް ކާރު ދުއްވުމުގެ ހުއްދަ ދޭނެ އެވެ. އަދި ދާދި ފަހުން ވަނީ އަންހެނުން ސްޓޭޑިއަމްތަކަށް ގޮސް ކުޅި ބެލުމުގެ ހުއްދަ ދީފަ އެވެ.