24 މެއި 2016 - 15:56
ލޮނުޒިޔާރަތްކޮޅުން މިހާރު ފެންނަނީ އަސްލު ބްރިޖްގެ ބައިތަކެއް ކަމަށް ބަައެއް މީހުންނަށް ހީވިޔަސް އެއީ މާލެ އާއި ހުޅުލެއާ ދެމެދު އަޅާ ބްރިޖްގެ ފައުންޑޭޝަނަށް ވާ ތައްޔާރީތަކެވެ.
ޗައިނާ ސަރުކާރުގެ އެހީގައި އަޅާ ބްރިޖުގެ މަސައްކަތަށް ބޭނުންވާ ގިނަ އަދަދެއްގެ ސާމާނު ޗައިނާ އިން ގެނެސް ފައުންޑޭޝަން އަޅަން މިހާރު ވަނީ ތައްޔާރުވެފަ އެވެ.
ބްރިޖްގެ މަސައްކަތް ޝެޑިއުލްކޮށްފައިވާ ގޮތަށް ކުރިއަށްދާއިރު، އިއްޔެ ވެސް ޗައިނާ އިން ގިނަ އަދަދެއްގެ ސާމާނު ގެނެސް އެ ސަރަހައްދަށް ވަނީ ޖަމާކޮށްފަ އެވެ. އޭގެ ތެރޭގައި ފްލޯޓިން ކްރޭނާއި ބާޖުތައް ހިމެނެ އެވެ. އަދި ގިނަ އަދަދެއްގެ ސާމާނު މިއަދު ވެސް ގެންނަން ވަނީ ނިންމައިފަ އެވެ.
ހައުސިން މިނިސްޓްރީގެ ސްޓޭޓް މިނިސްޓަރު އަބްދުﷲ މުއްތަލިބް މިއަދު ވިދާޅުވީ ލޮނުޒިޔާރަތްކޮޅު އިރުދެކުނު ކަންމަތީގައި ދަގަނޑުން އަޅާފައިވާ ފަދަ ފާލަމެއް ހުޅުލޭ ކޮޅުގައި ވެސް އަޅާނެ ކަމަށެވެ. އަދި އެ ދެ ފާލަން ގުޅުވާލާނީ މިހާރު ކަނޑުގައި ޖަހަމުން އަންނަ ޕްލެޓް ފޯމާ ކަމަށް ވެސް އޭނާ ވިދާޅުވި އެވެ.
"އެ ގުޅުވާލުންތަކަށް ފަހު އަސްލު ޕައިލް ފައުންޑޭޝަން މަސައްކަތް ފަށާނީ. ޖުލައި ނުވަތަ އޮގަސްޓުގައި ފައުންޑޭޝަންގެ މަސައްކަތް ފަށާނެ،" މުއްތަލިބް ވިދާޅުވި އެވެ.
ހުޅުލެ އާއި މާލެއާ ދެމެދު ބްރިޖް އަޅަން ގާތްގަނޑަކަށް 200 މިލިއަން ޑޮލަރު ހަރަދުވާނެ ކަމަށް ލަފާކޮށްފައިވެ އެވެ. އޭގެ ތެރެއިން 100 މިލިއަން ޑޮލަރު ހިލޭ އެހީގެ ގޮތުގައި ދެނީ ޗައިނާ ސަރުކާރުންނެވެ. އަނެއް ބައި ލޯނެއްގެ ގޮތުގައި ދޭ އިރު ދިވެހި ސަރުކާރުން ވެސް އެ މަޝްރޫއުއަށް ހޭދަކުރެ އެވެ.