10 އެޕްރީލް 2018 - 21:33
ސުޕްރީމް ކޯޓުން ފެބްރުއަރީ 1ގައި ނެރުނު އަމުރަށްފަހު ހައްޔަރުކޮށްފައިވާ ސިޔާސީ ބޭފުޅުންނާ މެދު އަމަލުކުރާ ގޮތާ ބެހޭ ގޮތުން އިދިކޮޅު ސިޔާސީ ޕާޓީތަކުން ކަރެކްޝަނަލް ސާވިސްއާ ބައްދަލުކުރަން ނިންމައިފި އެވެ.
އިދިކޮޅު މައި ޕާޓީ، އެމްޑީޕީން ބުނީ ސިޔާސީ ބޭނުމަށް ހައްޔަރުކޮށްފައިވާ ފަރާތްތަކާމެދު އަމަލުކުރާ ގޮތާއި ޖަލުގެ ހާލަތާ ގުޅޭ ގޮތުން ޕާޓީތަކުގެ ލީޑަރުންނާއި މަޖިލިސް މެމްބަރުން މާދަމާ މެންދުރު 1:00ގައި ކަރެކްޝަނަލް ސާވިސްއަށް ވަޑައިގަތުމަށް ހަމަޖެހިފައިވާ ކަމަށެވެ.
ސިޔާސީ ބައެއް އިސް ލީޑަރުން ހިމެނޭ ގޮތަށް ނުވަ ބޭފުޅަކު ވަގުތުން މިނިވަންކުރަން ސުޕްރީމް ކޯޓުން ފެބްރުއަރީ 1ގައި ނެރުނު އަމުރު ތަންފީޒުނުކޮށް ދިގު ދެންމުމަށްފަހު، ފެބްރުއަރީ ފަސްވަނަ ދުވަހު ރައީސް އަބްދުﷲ ޔާމީން ކުއްލި ނުރައްކަލުގެ ހާލަތު އިއުލާންކުރައްވައި ކުރީގެ ރައީސް މައުމޫން އަބްދުލް ގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދުގެ އިތުރުން މަޖިލީހުގެ ބައެއް މެމްބަރުން ވެސް ހައްޔަރުކޮށްފައިވެ އެވެ. އަދި ކުއްލި ހާލަތާ ގުޅިގެން ހައްޔަރުކުރި މީހުންގެ ތެރެއިން މިހާރު ޖަލުގައި ތިބި އެންމެންގެ މައްޗަށް ދައުވާ އުފުލައި، ޝަރީއަތް ނިމެންދެން ވަނީ ބަންދުކޮށްފަ އެވެ.