09 އެޕްރީލް 2018 - 17:49
މި އަހަރުގެ ރޯދަ މަހު ސްކޫލްތަކުގައި ކިޔަވައިދޭނީ ހެނދުނު 9:00 އިން މެންދުރު ފަހު 3:00 އަށް ކަމަށް އެޑިއުކޭޝަން މިނިސްޓްރީން ހަމަޖައްސައިފި އެވެ.
އެ މިނިސްޓްރީން އިއްޔެ ނެރުނު ސާކިއުލާގައި ވާ ގޮތުން ސްކޫލްތަކުގެ ހެނދުނުގެ ދަންފަޅި ރޯދަ މަހު ފަށާނީ ހެނދުނު 8:40 އާއި 9:00 އާ ދެމެދު އެވެ. މެންދުރުގެ ދަންފަޅީގައި ކިޔަވައިދޭނީ ހެނދުނު 11:30 އިން މެންދުރު 1:00 އަށް ކަމަށް ސާކިއުލާގައި ވެ އެވެ.
އެޑިއުކޭޝަން މިނިސްޓްރީން ބުނީ ރޯދަ މަހު ކިޔަވައި ދިނުމުގެ ވަގުތު ކަނޑައަޅަން ވާނީ ކޮންމެ ދުވަހެއްގެ ވެސް މެންދުރު ފަހު 3:00 ގެ ކުރިން އެ ދުވަހެއްގެ ސެޝަން ނިންމާ ގޮތަށެވެ.
އެޑިއުކޭޝަން މިނިސްޓްރީން ނިންމާފައި ވަނީ ޕްރީ ސްކޫލްގެ ކުދިންގެ ކިޔެވުން ދޮޅުގަޑިއިރަށް ވުރެ ކުރު ނުވާނެ ގޮތަކަށް ރޯދަ މަހު ކުރިއަށް ގެންދިއުމަށެވެ. ގްރޭޑް 1-7 ގެ ދަރިވަރުންގެ ކިޔެވުން ދެ ގަޑިއިރާއި 30 މިނިޓަށް، ގްރޭޑް 8-10 ގެ ކިޔެވުން ތިން ގަޑިއިރަށް އަދި ގްރޭޑް 11-12 ގައި އުޅޭ ދަރިވަރުންނަށް ރޯދަ މަހުގެ ތެރޭގައި ހަތަރު ގަޑިއިރު ކިޔަވައި ދިނުމަށް އެޑިއުކޭޝަނުން ވަނީ ނިންމައިފަ އެވެ.
ސާކިއުލާގައި ބުނެފައިވާ ގޮތުން ރޯދަ މަހު އެކި މާއްދާތައް ކިޔަވައިދޭން ލިބޭ ވަގުތަށް ބަލައި، ކޮންމެ މާއްދާ އަކަށް އަދި ކޮންމެ ގްރޭޑަކަށް ޚާއްސަ ޕްރޮގްރާމެއް އެކުލަވާލަން ޖެހެ އެވެ. އަދި އެންމެ މަދުވެގެން ދެ ހަފުތާގެ ތެރޭގައި ހުރިހާ މާއްދާއެއް ކިޔަވައިދެވޭނެ ގޮތަކަށް ޓައިމްޓޭބަލް އެކުލަވާލަން ވެސް އެޑިއުކޭޝަނުން އަންގާފައިވެ އެވެ.
ސްކޫލުގެ ކިޔެވުމުގެ ދަންފަޅިތައް ރޯދަ މަހަށް ރާވާއިރު، ވަގުތަށް ނަމާދު ކުރެވޭނެ ގޮތަށް ހަމަޖެއްސުމާއި ދަރިވަރުންނަށް ދީނީ މައުލޫމާތު ދިނުން އަދި މަޣްރިބް ނަމާދާއި އިޝާ ނަމާދާ ދެމެދު، ސްކޫލުތަކުގައި އެއްވެސް ހަރަކާތެއް ނުހިންގަން އެޑިއުކޭޝަނުން ވަނީ އެދިފަ އެވެ.
ކަލަންޑަރުގައިވާ ގޮތުން ނަމަ މި އަހަރުގެ ރޯދަ މަަސް ފެށޭނީ އަންނަ މަހުގެ 16 ގަ އެވެ.