06 އެޕްރީލް 2018 - 12:46
ސޯލް (އެޕްރީލް 6) - ކޮރަޕްޝަނާއި ވެރިކަމުގެ ބާރު ނަހަމަގޮތުގައި ބޭނުން ކުރިކަމުގެ ކުށުގައި ސައުތު ކޮރެއާގެ ކުރީގެ ރައީސް ޕާކް ގުއެން-ހައި 24 އަހަރަށް ޖަލަށްލާން އެ ގައުމުގެ ކޯޓަކުން މިއަދު ހުކުމް ކޮށްފި އެވެ.
ސައުތު ކޮރެއާގެ ޓީވީތަކުން ވަގުތުން ދައްކަމުން ދިޔަ ޝަރީއަތަށް ފަހު ފަނޑިޔާރުން އިއްވި ހުކުމުގައި ޕާކް ވަނީ 18 ބިލިއަން ވޮން (17 މިލިއަން ޑޮލަރު) އިން ޖޫރިމަނާކޮށްފަ އެވެ. ހުކުމް އިއްވި އިރު ޕާކް ކޯޓުގައެއް ނެތެވެ.
ޕާކް ވަނީ އެކަމަނާ ގާނޫނާ ޚިލާފު އެއްވެސް ކަމެއް ނުކުރައްވާ ކަމަށް ވިދާޅުވެފަ އެވެ. އަދި ޝަރީއަތް ކުރިއަށް ދަނީ ބޭއިންސާފުން ކަމަށް ވިދާޅުވެ ކޯޓުގެ އަޑުއެހުންތައް ވަނީ ބޮއިކޮޓް ކުރައްވައިފަ އެވެ.
ޕާކުގެ މައްޗަށް ތުހުމަތު ކޮށްފައި ވަނީ ބޮޑެތި ކުންފުނިތަކުން ރިޝްވަތުގެ ގޮތުގައި ދިން ކަމަށް ތުހުމަތުކުރެވޭ އެތައް މިލިއަން ޑޮލަރެއް ރައީސް ޕާކުގެ އެކުވެރިއެއްގެ ޖަމިއްޔާއެއް މެދުވެރިކޮށް ރައީސް ނަންގަވާފައިވާ ކަމަށެވެ. ޕާކް މަގާމުން ދުރު ކުރުމުގެ މެދުވެރިއަކަށްވި އެކަމަނާގެ ގާތް އެކުވެރިޔާ ޗޮއި-ސޫން ވަނީ 20 އަހަރަށް ޖަލަށްލާން ފެބްރުއަރީ މަހު ހުކުމްކޮށްފަ އެވެ. ޗޮއި ވަނީ ޕާކުގެ އެޑްވައިޒަރެއްގެ ގޮތުގައި ގިނަ އަހަރުތަކެއް ވަންދެން މަސައްކަތް ކޮށްފަ އެވެ. އަދި ޕާކްއާ އޮތް ގާތް ގުޅުމުގެ ނާޖާއިޒް ފައިދާ ނަގާ ޗޮއި ވަނީ ސައުތު ކޮރެއާގެ ބޮޑެތި ކުންފުނިތަކުން ބޮޑެތި އަދަދުތަކުން ފައިސާ ނަގައިފަ އެވެ. އޭގެ ތެރޭގައި އެ ގައުމުގެ އިލެކްޓްރޯނިކް ކުންފުނި ސެމްސަން ވެސް ހިމެނެ އެވެ. އެ ތުހުމަތުގައި ސެމްސަންގެ ވެރިޔާގެ މައްޗަށް ވަނީ ފަސް އަހަރުގެ ޖަލު ހުކުމެއް އިއްވައިފަ އެވެ.
ސަރުކާރުގެ އެއްވެސް މަގާމެއް ނެތް ޗޮއި ވަނީ މަގާމުތަކަށް މީހުން ހަމަޖައްސާ ޕާކް ދައްކަވަން ޖެހޭ ވާހަކަތައް ތައްޔާރުކޮށްދީ އަދި ހެދުން އަޅުއްވަންވީ ގޮތް ވެސް ކިޔައިދީފަ އެވެ.
ޕާކު މަގާމުން ދުރުކުރުމުގެ މައްސަލަ ޕާލަމެންޓަށް ވައްދާ އޭނާ މަގާމުން ދުރުކޮށްފައި ވަނީ މިދިޔަ އަހަރުގެ މާޗު މަހު އެވެ.