05 އެޕްރީލް 2018 - 22:28
ލެކިއުޓުން ވިއްކާ އުފެއްދުންތައް ކަސްޓަމަރުންނަށް ވީހާ ވެސް ފަސޭހައިން ލިބޭނެ ގޮތް ހެދުމަށް މޮބައިލް އެޕްލިކޭޝަނެއް މިރޭ ލޯންޗުކޮށްފި އެވެ.
ރާއްޖޭގައި އެންމެ ފުޅާ ދާއިރާއެއްގައި ސެންޓުގެ ވިޔަފާރި ކުރަމުން އަންނަ ލެކިއުޓް ފިހާރައިގެ އެޕް ލޯންޗުކުރީ މަޖީދީމަގުގައި ހުންނަ އެ ކުންފުނީގެ ފިހާރައިގައި ބޭއްވި ހަފުލާއެއްގަ އެވެ. ލައިވް މިއުޒިކާ އެކު ކުރިއަށް ގެންދިޔަ ހަފުލާގައި ވަނީ އެޕާ ގުޅޭ މައުލޫމާތުތައް ދީފަ އެވެ.
އެންޑްރޮއިޑާއި އައިއޯއެސްގެ ފޯނުތަކުން އެ އެޕް މިހާރު އިންސްޓޯލް ކުރެވޭނެ އެވެ.
ލެކިއުޓުގެ އޮފިޝަލަކު ވިދާޅުވީ އެޕެއް ލޯންޗުކުރީ، ރާއްޖޭގެ ކޮންމެ ހިސާބެއްގައި ހުރި ކަމުގައި ވިއަސް، އެ ކުންފުނިން ވިއްކާ އުފެއްދުންތައް ލިބޭނެ ގޮތް ހެދުމަށް ކަމަށެވެ. އެގޮތުން އެޕް މެދުވެރިކޮށް އިލެކްޓްރޯނިކްސް އާއި ސެންޓު ފަދަ އެއްޗެހި ގަނެވޭއިރު، އެ މީހަކު ހުރި ހިސާބަކަށް އެ ތަކެތި ޑެލިވާ ކޮށްދޭނެ އެވެ.
އެ ކުންފުނީގެ ފިހާރައަށްވުރެ، އެޕް އިން އެއްޗެހި ގަނެވޭ އަގު ހެޔޮ ވާނެ ކަމަށް ވެސް އޮފިޝަލް ވިދާޅުވި އެވެ.
"އިންޓަނެޓް ބޭންކު މެދުވެރިކޮށް ވެސް ފައިސާ ދެއްކޭނެ. އަދި މާލެ ނޫން ރަށްރަށުން ގަންނަ އެއްޗެހި ގިނަ ވެގެން 7-10 ދުވަސް ތެރޭ ޑެލިވާ ކޮށްދޭނަން. މާލެ އާއި ހުޅުމާލެ އަދި ވިލިމާލެ އަށް ދެ ގަޑިރުގެ ތެރޭގައި ޑެލިވާކޮށްދެވޭނެ. ބޭނުމަކީ ރާއްޖޭގެ ކޮންމެ ހިސާބެއްގައި އުޅުނުކަމުގައި ވިއަސް ލެކިއުޓުން ވިއްކާ ތަކެތި ވީހާ ވެސް ފަސޭހައިން، ހެޔޮ އަގެއްގައި ފޯރުކޮށްދިނުން،" އޮފިޝަލް ވިދާޅުވި އެވެ.
ލެކިއުޓުން ވަނީ 2015 ވަނަ އަހަރު ވެބްސައިޓް ވެސް ލޯންޗުކޮށްފަ އެވެ. އެ ވެބްސައިޓުން ލެކިއުޓުގެ ފިހާރަތަކުގައި ވިއްކަން ހުންނަ އުފެއްދުންތަކާ ބެހޭ މައުލޫމާތުތައް ލިބެން ހުރެ އެވެ.