06 އެޕްރީލް 2018 - 10:08
އެމްބީސީން 2016 ގައި ދައްކަން ފެށި ޖެނިފާ ލޮޕެޒްގެ ޓީވީ ސިލްސިލާ "ޝޭޑްސް އޮފް ބްލޫ" ތިން ވަނަ ސީޒަނާ އެކު ނިންމާލަން ހަމަޖެހިފައިވާކަން އިއުލާންކޮށްފި އެވެ.
އެމްބީސީން ބުނި ގޮތުގައި ތިން ވަނަ ސީޒަން ދައްކަން ފަށާނީ އަންނަ ޖޫން މަހުގެ 17 އިން ފެށިގެންނެވެ. މި ސީޒަނުގައި ހިމެނެނީ 10 އެޕިސޯޑެވެ.
ލޮޕެޒް ޑިޓެކްޓިވެއްގެ ރޯލް ކުޅޭ "ޝޭޑްސް އޮފް ބްލޫ" އަކީ އަދީީ ހެސަކް ޑައިރެކްޓްކޮށް ގެނެސްދޭ ކްރައިމް ޑްރާމާއެކެވެ. މީގެ ފުރަތަމަ ދެ ސީޒަންގައި 26 އެޕިސޯޑް ހިމެނެ އެވެ.
ދެހާސް ސޯޅަ ވަނަ އަހަރުގެ ޖެނުއަރީ 7 ގައި ޕްރިމިއާ ކުރި "ޝޭޑްސް އޮފް ބްލޫ" ގެ ދެވަނަ ސީޒަން ނިންމައިލީ މެއި 21 ގަ އެވެ.
ޝޯ ނިންމައިލާކަން އިއުލާން ކުރުމާ އެކު، ލަވަކިޔުންތެރިއެއްގެ ގޮތުގައި މަޝްހޫރު ބަތަލާ ބުނީ "ޝޭޑްސް އޮފް ބްލޫ" ގައި ނިއު ޔޯކް ޕޮލިސް ޑިޕާޓްމަންޓް (އެންވައިޕީޑީ) ގެ ޑިޓެކްޓިވްއެއް ކަމަށްވާ ހާލީ ސެންޓޯޒްގެ ކެރެކްޓާ ކުޅެން ލިބުމަކީ ވަރަށް ފުރިހަމަ ތަޖުރިބާއެއް ކަމަށެވެ.
"މީގައި އެކްޓަރެއްގެ ގޮތުގައި މަސައްކަތްކޮށްލަން ލިބުމަކީ އަހަރެން ވަރަށް ގަޔާވި ކަމެއް،" ލޮޕެޒް ޕްރޮޑިއުސް ވެސް ކުރި ސިލްސިލާއާ ބެހޭ ގޮތުން ބުންޏެވެ.
"އެނަކޮންޑާ" އާއި "މެއިޑް އިން މެންހަޓަން" ފަދަ ފިލްމްތައް ވެސް ކުޅެފައިވާ ލޮޕެޒް، 48، ގެ ފިލްމެއް ވެސް މި އަހަރު ރިލިޒް ވާން އެބަ އޮތެވެ.
އެއީ މި އަހަރުގެ ނޮވެމްބަރުގައި 21 ގައި ރިލީޒް ކުރާ "ސެކަންޑް އެކްޓް" އެވެ. އެމްބީސީގެ ސިލްސިލާ ނިންމައިލި ނަމަވެސް އެ ޗެނެލުން ދައްކަމުން އަންނަ ރިއަލިޓީ ޝޯ "ވޯލްޑް އޮފް ޑާންސް" ގެ ޖަޖެއްގެ ގޮތުގައި ވެސް ލޮޕެޒް ފެންނާނެ އެވެ.