03 އެޕްރީލް 2018 - 21:17
ވިލާ ކޮލެޖުން 400 އަށްވުރެ ގިނަ ދަރިވަރުން މިއަދު ދަސްވެނިވިއްޖެ އެވެ.
ހެނދުނާއި މެންދުރު ފަހުގެ ދަންފަޅިއަށް ބަހާލައިގެން ކުރިއަށްގެންދިޔަ އެ ދަސްވެނިވުމުގެ ހަފުލާގައި، 487 ދަރިވަރުން ދަސްވެނިވެފައި ވެ އެވެ. އެއީ އެ ކޮލެޖުގެ އަމިއްލަ ޕްރޮގްރާމްތަކާއި އޯޕަން ޔުނިވާސިޓީ އޮފް މެލޭޝިޔާ (އޯޔޫއެމް)ގެ ކޯސްތައް ވެސް ހިމަނައިގެންނެވެ.
އޯޔޫއެމްގެ ކޯސްތައް ނިންމައި 334 ދަރިވަރުން ވަނީ ހެނދުނު ބޭއްވި ހަފުލާގައި ދަސްވެނިވެފަ އެވެ. އެއީ 298 އަންޑަގްރެޖުއޭޓާއި 36 ޕޯސްޓްގްރެޖުއޭޓެވެ. އަދި ދަސްވެނިވި 58 ޕަސެންޓް ހިއްސާކުރަނީ އަންހެނުން ކަމަށް ވެސް ވިލާ އިން ބުންޏެވެ.
މެންދުރު ފަހު ބޭއްވި ހަފުލާގައި، ވިލާ ކޮލެޖުގެ އަމިއްލަ ޕްރޮގްރާމްތަކުން 153 ދަރިވަރުން ވަނީ ދަސްވެނިވެފަ އެެވެ.
އޭގެ އިތުރުން، އެ ކޯސްތަކުން އެންމެ ރަނގަޅު ނަތީޖާ ހޯދި 16 ދަރިވަރަކަށް ވަނީ އެ ކޮލެޖުގެ ޗެއާމަން، ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެވޯޑު ދެއްވައިފަ އެވެ.
އެ ރަސްމިއްޔާތުގައި ވާހަކަދައްކަވަމުން ވިލާ ކޮލެޖުގެ ރެކްޓާ ޑރ. އަހުމަދު އަންވަރު ވިދާޅުވީ އެ ކޮލެޖުން މަސައްކަތް ކުރަމުން އަންނަނީ އެންމެ ފެންވަރު ރަނގަޅު މަތީ ތައުލީމް، އެންމެ ޒަމާނީ ވަސީލަތްތަކުގެ އެހީގައި ފޯރުކޮށްދިނުމަށް ކަމަށެވެ.
އޭނާ ވިދާޅުވީ 2007 ވަނަ އަހަރު ހުޅުވި ރާއްޖޭގެ އެންމެ ފުރަތަމަ އަމިއްލަ ކޮލެޖުން އެތައް ދަރިވަރުންނެއް، ގައުމަށް ބޭނުންތެރި ދާއިރާތަކުން ދަސްވެނިވެފައިވާ ކަމަށެވެ. އިނގިރޭސިވިލާތާއި މެލޭޝިޔާގެ ޕްރޮގްރާމްތައް، ވިލާ ކޮލެޖުގެ އެހީގައި ރާއްޖޭގެ އެކި ހިސާބުތަކަށް ފޯރުކޮށްދެމުން އަންނަ ކަން ވެސް އޭނާ ފާހަގަކުރެއްވި އެވެ.
"އަޅުގަނޑުމެންގެ ކެމްޕަސްތަކާއި ލާނިން ސެންޓަރުތަކުގެ އެހީގައި މިވަނީ އިނގިރޭސިވިލާތާއި މެލޭޝިޔާގެ ޕްރޮގްރާމް ރާއްޖޭގެ އެކި ހިސާބުތަކަށް ފޯރުކޮށްދެވިފައި. އެކަންތަކަށް މަގުފަހިވެގެން މި ދަނީ، ވިސްނުންތޫނު، ގާބިލް ލެކްޗަރާއިންގެ ސަބަބުން،" އަންވަރު ވިދާޅުވި އެވެ.
