02 އެޕްރީލް 2018 - 13:42
އިސްލާމްއާބާދު (އެޕްރީލް 2) - ޕާކިސްތާނަށް ކުރި ހަތަރު ދުވަހުގެ އުފާވެރި ދަތުރަކަށް ފަހު މަލާލާ ޔޫސުފްޒައި އިނގިރޭސި ވިލާތަށް މިއަދު ފުރައިފި އެވެ.
ތާލިބާނުން ހަމަލާ ދިންތާ ފަސް އަހަރު ފަހުން މަލާލާ ޕާކިސްތާނަށް ޒިޔާރަތް ކުރީ މިދިޔަ ހަފުތާގަ އެވެ. އޭނާ އަށް ހަމަލާ ދިނީ އަންހެނުންގެ ތައުލީމް ޕްރޮމޯޓް ކުރާތީ އެވެ.
ސަރުކާރުގެ އޮފިޝަލަކު ބުނީ މަލާލާ އާއި އޭނާގެ އާއިލާ މިއަދު ފުރާފައިވާ ކަމަށެވެ. އަދި އެއާޕޯޓުގެ އޮފިޝަލަކު ވެސް ވަނީ މަލާލާ ފުރިކަން ޔަގީންކޮށްދީފަ އެވެ.
ބޮޑު ވަޒީރުގެ އޮފީހުގައި ބުރާސްފަތި ދުވަހު އޮތް ރިސެޕްޝަނެއްގައި މަލާލާ ވަނީ އަސަރުން ފުރިފައިވާ ތަގްރީރެއް ދީފަ އެވެ. މަލާލާ ބުނެފައި ވަނީ ޕާކިސްތާނަށް އެނބުރި އައުމަކީ ހުވަފެނެއް ސީދާވުން ކަމަށާއި އޭނާ ވަރަށް އުފާވެއްޖެ ކަމަށެވެ.
"ބިރެއް ނެތި ހަމަހިމޭން ކަމާ އެކު ޕާކިސްތާނުގައި އުޅުމަކީ ހުވަފެނެއް،" މަލާލާ ބުންޏެވެ.
މަލާލާގެ ދަތުރުގައި ވަނީ އޭނާގެ އުފަން ޓައުން ސްވަޓް ވެލީ އަށް ވެސް ޒިޔާރަތްކޮށްފަ އެވެ.
މަލާލާ އަށް 2012 ވަނަ އަހަރު ހަމަލާ ދިނީ ސްކޫލް ނިންމާފައި ގެއަށް ދިޔަ މަގުމަތީގައި ބަހުގައި އިންދަ އެވެ. އޭރު މަލާލާގެ އުމުރަކީ 15 އަހަރެވެ. އޭނާގެ ފުރާނަ ސަލާތަވީ ކިރިޔާ އެވެ. ޕާކިސްތާނުގައި ފަރުވާ ދިނުމަށް ފަހު، މަލާލާ ވަނީ އިތުރު ފަރުވާ އަށް އިނގިރޭސި ވިލާތަށް ގެންގޮސްފަ އެވެ. މަލާލާ މިހާރު ދިރިއުޅެނީ ބާމިންހަމްގަ އެވެ. އުމުރުން މިހާރު 20 އަހަރުގެ މަލާލާ މިހާރު ދަނީ ޕޮލިޓިކްސް، ސައިކޮލޮޖީ އަދި އިކޮނޮމިކްސް އިން އޮކްސްފޯޑް ޔުނިވާސިޓީގައި ޑިގްރީ އަށް ކިޔަވަމުންނެވެ. ތާލިބާނުން ބުނެފައި ވަނީ މަލާލާ އަށް ހަމަލާ ދިނީ އޭނާ އަކީ ހުޅަނގުގެ އެޖެންޓަކަށް ވާތީ ކަމަށެވެ. އިސްލާމްދީނާ ތަފާތު ގޮތްތަކެއް ޕްރޮމޯޓް ކުރާ ކަމަށް ބުނެ ޕާކިސްތާނުގެ ބައެއް މީހުން ވެސް މަލާލާ އަށް ފާޑުކިޔަމުންދެ އެވެ.
އެންމެ ހަގު އުމުރުގައި ނޯބެލް ސުލްހައިގެ އިނާމު މަލާލާ ހޯދާފައި ވަނީ 2014 ވަނަ އަހަރު އެވެ. އޭރު އޭނާގެ އުމުރަކީ 17 އަހަރެވެ.