01 އެޕްރީލް 2018 - 06:48
އެމެރިކާގެ ނިއު ޖާޒީގެ މީހަކު ބަރުދަން ލުއިކޮށް، ބަނޑު ހިންދަން ބުރަކޮށް މަސައްކަތްކޮށް އެކަން ކާމިޔާބުވާ ގޮތް ނުވެގެން ބެލި އިރު، ބަނޑު ފުފިފައި ހުންނަނީ ބޮޑު ޓިއުމަރެއްގެ ސަބަބުންކަން އެނގިއްޖެ އެވެ.
ކެވިން ޑޭލީ، 63، ބަރުދަން ލުއިކުރުމުގެ މަސައްކަތް ފެށީ 2015 ވަނަ އަހަރު ކުރި ހިތުގެ އޮޕަރޭނަކަށް ފަހު ޑޮކްޓަރުން ލަފާ ދިނުމުންނެވެ.
ޕީޕަލް މެގަޒިންގައި ބުނެފައިވާ ގޮތުގައި، މިދިޔަ ދެ އަހަރު ތެރޭ ޑޭލީގެ ހަށިގަނޑުން 15 ކިލޯ ލުއިވި އެވެ. އެކަމަކު ބަނޑު ހިނދޭ ގޮތެއް ނުވި އެވެ. ބަނޑުގައި ޖަހާފައި ހުރި މަސްތައް ނުގޮސްގެން އެންމެފަހުން ނިންމީ ޑޮކްޓަރަށް ދައްކާށެވެ.
ޓެސްޓްތަކުން އެނގުނީ ބަނޑު އެހާ ބޮޑީ 13 ކިލޯގެ ޓިމަރެއްގެ ސަބަބުން ކަމެވެ.
"ޓިއުމަރުގެ ފޮޓޯ ފެނުމާ އެކު ވަރަށް ކަންބޮޑުވި. އެއީ އެ ޓިއުމަރު އެހާ ބޮޑުކަމުން،" ލެނޮކްސް ހޮސްޕިޓަލުން ޕީޕަލް މަޖައްލާއަށް ވާހަކަ ދެއްކެވި ޑޮކްޓަރު ހޫލިއޯ ޓެއިޒޭރާ ވިދާޅުވެފައިވެ އެވެ.
ޑޮކްޓަރު ވިދާޅުވެފައިވާ ގޮތުގައި، ޓިއުމަރެއް އެހާ ބޮޑުވާނީ ނުރައްކާތެރި ކަމެއް އޭގައި ހުރުމުން ކަމަށް ވުމީ އެކަށީގެންވާ ކަމެކެވެ.
މިދިޔަ އަހަރުގެ ފަހުކޮޅު، އޮޕަރޭޝަންކޮށް ޓިއުމަރު ވަނީ ނަގައިފަ އެވެ. އޮޕަރޭޝަން ކުރުމުގެ ކުރިން ޑޮކްޓަރުން ލަފާކުރީ ޓިއުމަރުގައި ހުންނާނީ ފަސް ވަރަކަށް ކިލޯ ކަމަށެވެ.
ޓިއުމަރު ނެގުމުން ޑޭލީގެ ބަރުދަން ވަނީ ކުރިއަށްވުރެ ވެސް ބޮޑަށް ލުއިވެފަ އެވެ. އޭނާ ބުނި ގޮތުގައި މިހާރު ހުރީ ކޮލެޖްގައި އުޅުނު އިރު ހުރި ބަރުދަނެވެ.
"ވަރަށް އުފާވޭ، މިހާރު އިހްސާސްވަނީ އުމުރުން 35 އަަހަރުގެ މީހެކޭ،" ޑޭލީ ބުނެފައިވެ އެވެ.