31 މާޗް 2018 - 16:05
ޖަލު ހުކުމް ތަންފީޒުކުރައްވަމުން ގެންދަވާ ކުރީގެ ނައިބު ރައީސް އަހުމަދު އަދީބަށް އާއިލާއާ ބައްދަލުކުރަން ފުރުސަތު ދިނުން މެދުކަނޑާލިތާ ދެމަސް ފަހުން އެ ފުރުސަތު މިއަދު ދީފި އެވެ.
އަދީބަށް އާއިލާއާ ބައްދަލުކުރެއްވުމުގެ ފުރުސަތު ނުދީގެން އޭނާގެ އާއިލާއިން ޝަކުވާކުރަމުން ދަނިކޮށް ކަރެކްޝަނަލް ސާވިސް އިން ހަމަޖައްސައިދިނީ އަދީބުގެ އަނބިކަނބަލުން މަރިޔަމް ނަޝްވާ އާއި އަދީބުގެ މަންމަ އާއި އާއިލާގެ ދެ މީހަކަށް އޭނާއާ ބައްދަލުކުރެވޭނެ އިންތިޒާމެވެ.
އަދީބަށް އާއިލީ ބައްދަލުވުންތައް ނުދޭތާ މަހަކަށް ވުރެ ގިނަ ދުވަސްވެ، އެ މައްސަލަ އާއިލާގެ ފަރާތުން އެޗްއާރުސީއެމަށް ވެސް ހުށަހެޅި އެވެ.
އެޗްއާރުސީއެމްގެ ރައީސް އައިމިނަތު އީނާސް އަށް ނަޝްވާ ފޮނުއްވި ސިޓީގައި ބުނެފައިވަނީ މިދިޔަ ފެބްރުއަރީ 20 ގައި އަދީބު މާފުށީ ޖަލަށް ބަދަލުކުރި ފަހުން މިހާތަނަށް އާއިލީ ބައްދަލުވުންތަކާއި އެކަހެރި ބައްދަލުވުންތައް ލިބިފައި ނުވާ ކަމަށެވެ.
އާއިލީ ބައްދަލުވުންތައް އަދީބަށް ނުދިނަސް، ވަކީލުންނާ ބައްދަލުކުރެއްވުމުގެ ފުރުސަތު ދޭތެރެ ދޭތެރެއިން ލިބިވަޑައިގަނެ އެވެ.
ޖުމްލަ 33 އަހަރުގެ ޖަލު ހުކުމް އިއްވާފައިވާ އަދީބުގެ ސިއްހީ މައްސަލަތަކުގެ ތެރޭގައި ގްލުކޮމާ ޖެހުމާއި އެތެރެހަށީގައި ސިސްޓެއް އުފެދިފައިވުން ހިމެނެ އެވެ. އެހެންވެ، ބޭސްފަރުވާ އަށް ރާއްޖެ އިން ބޭރަށް ވަޑައިގަތުމުގެ ހުއްދަ އަށް އަދީބު އެދިވަޑައިގެންފައިވެ އެވެ. އެކަމަކު ސަރުކާރުން އެ ހުއްދައެއް ނުދެ އެވެ.