30 މާޗް 2018 - 08:10
ލަންޑަން (މާޗް 30) - ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ފީފާ ވޯލްޑް ކަޕްގައި އޮފިޝަލްކަން ކުރާނެ ރެފްރީން ފީފާއިން ކަނޑައެޅިއިރު 80 އަހަރަށް ފަހު އިނގިރޭސިންނަށް ފުރަތަމަ ފަހަރަށް ފުރުސަތު ގެއްލިއްޖެ އެވެ.
ފީފާއިން ހޮވި 30 ރެފްރީންގެ ތެރޭގައި އިންގްލެންޑާއި ސްކޮޓްލެންޑް، ވޭލްސް އަދި ނޮދަން އަޔަލެންޑުގެ އެއްވެސް ރެފްރީއެއް ނުހިމެނެ އެވެ. ފީފާގެ މުބާރާތްތަކުގައި ބޭނުންކުރާނެ ރެފްރީންގެ ލިސްޓުގައި އެންމެ ފަހުން ހިމެނުނު އިނގިރޭސި ރެފްރީ އަކީ މާކް ކްލެޓެންބާގް އެވެ. އެހެން ނަމަވެސް މިދިޔަ އަހަރު އޭނާ އިނގިރޭސިވިލާތް ދޫކޮށް ސައުދި އެރޭބިއާގެ ރެފްރީސް ޑިޕާޓްމަންޓާ ހަވާލުވުމުން އޭނާ އަށް އެ ލިސްޓުގެ ޖާގަ ގެއްލުނެވެ.
ކްލެޓެންބާގްގެ ޖާގަ އަލުން ހޯދަން އިނގިރޭސި އެފްއޭ އިން ފީފާގައި އެދުނު ނަމަވެސް ފީފާއިން ވަނީ އެ ހުށަހެޅުމަށް ނޫނެކޭ ބުނެފަ އެވެ.
ކްލެޓެންބާގް ވަނީ ފާއިތުވި ހަތަރު ވަރަކަށް އަހަރަށް ބަލާއިރު ދުނިޔޭގެ ނަން މަޝްހޫރު ގިނަ މެޗުތަކުގައި ރެފްރީކަން ކޮށްފަ އެވެ. އޭގެ ތެރޭގައި 2016 ވަނަ އަހަރުގެ އަހަރުގެ އެފްއޭ ކަޕް ފައިނަލާއި ޗެމްޕިއަންސް ލީގު ފައިނަލުގެ އިތުރުން ޔޫރޯ ފުޓްބޯޅަ މުބާރާތުގެ ފައިނަލް މެޗު ހިމެނެ އެވެ.
އިނގިރޭސި ރެފްރީއެއް ނުލައި އެންމެ ފަހުން ކުރިއަށްދިޔަ ވޯލްޑް ކަަޕަކީ 1938 ވަނަ އަހަރުގެ މުބާރާތެވެ. އޭގެ ފަހުން 12 އަހަރު ވަންދެން ވޯލްޑް ކަޕް ނުބާއްވައި ދިޔަ އެވެ. އެއީ ދެ ވަނަ ބޮޑު ހަނގުރާމައިގެ ދުވަސްވަރުގަ އެވެ. އަލުން 1950 އިން ފެށިގެން ވޯލްޑް ކަޕް ބާއްވަން ފެށި ފަހުން ކޮންމެ ފަހަރަކު މަދު ވެގެން އިނގިރޭސި އެއް ރެފްރީއެއް ވޯލްޑް ކަޕްގައި ހިމެނެ އެވެ.
އެންމެ ފަހުން ދެ ވޯލްޑް ކަޕްގައި އޮފިޝަލްކަން ކުރި އިނގިރޭސި ރެފްރީ އަކީ ހޮވާޑް ވެބް އެވެ. އޭނާ ވަނީ 2010 ވަނަ އަހަރުގެ ވޯލްޑް ކަޕް ފައިނަލުގައި ސްޕެއިނާއި ނެދަލެންޑްސް ކުޅުނު މެޗުގެ ރެފްރީކަން ކޮށްފަ އެވެ. ހޮވާޑް ވެބް ރިޓަޔަކުރީ 2014 ވަނަ އަހަރު އެވެ.
އިނގިރޭސި ރެފްރީންގެ ފެންވަރު ދަށްވަމުންދާކަމުގެ ޝަކުވާ އިނގިރޭސި ޕްރިމިއާ ލީގުގެ ކްލަބްތަކުގެ ކޯޗުން އަންނަނީ ކުރަމުންނެވެ. އެގޮތުން މި ވަގުތު އިނގިރޭސި ޕްރިމިއާ ލީގުގައި އެންމެ ގިނަ ދުވަސްވީ ކޯޗު އާސެނަލްގެ އާސެން ވެންގާ ދާދި ފަހުން ބުނީ އިނގިރޭސި ރެފްރީން ހާލަތު މިހާރު އޮތީ މީގެ ކުރިން ނުވެއްޓޭހާ ދަށު ދަރަޖަ އަކަށް ވެއްޓިފައިކަމަަށެވެ.