27 މާޗް 2018 - 22:53
ސިންގަޕޫރާ ދެކޮޅަށް ހުކުރު ކުޅުނު މެޗުގެ ސްކޮޑުން ވެސް ޖާގަ ނުދިން ނާއިޒް ހަސަން (ދާދު) އެނބުރި އައިސް ޖެހި ހަތަރު ގޯލާ އެކު އޭޝިއަން ކަޕް ކޮލިފައިންގެ ފަހު މެޗުގައި މިރޭ ރާއްޖޭން އަމިއްލަ ދަނޑުގައި ބޫޓާން އަތުން ފަސޭހަކަމާ އެކު 7-0 އިން މޮޅުވެއްޖެ އެވެ.
ކެޕްޓަން އަލީ އަޝްފާގް (ދަގަނޑޭ) ވަކިކޮށް އަދި ވައިސް ކެޕްޓަން އަސްހަދު އަލީ (އަޑުބަރޭ) ރިޓަޔާކޮށް، ގައުމީ ޓީމުގެ މައްސަލަގަނޑެއްގެ ތެރޭގައި އޮއްވާ ކުރިމަތިލީ މި މެޗަކީ ގައުމީ ޓީމުގެ ތާރީހުގައި އެންމެ މަދު ބަޔަކު ދަނޑަށް ވަން މެޗެވެ.
މިރޭގެ މެޗުގެ ފުރަތަމަ ހާފުގައި އަލީ ފާސިރު (ސެންޓޭ) އަތުން ޕެނަލްޓީއެއް ބޭކާރުވެފައިވަނިކޮށް ރާއްޖެ އަށް ކުރި ހޯދައިދިނީ ހަމްޒާ މުހައްމަދު (ހަމްޕު) އެވެ. ދެ ވަނަ ހާފުގައި ރާއްޖޭން ފަސް ގޯލް ޖެހިއިރު ދާދުގެ އިތުރުން ދެން ލަނޑު ޖެހީ އުއްމީދީ މިޑްފީލްޑަރު އިބްރާހިމް ވަހީދު ހަސަން (އިއްބެ ވަހީދު) އާއި ހުސެއިން ސިފާއު ޔޫސުފެވެ. ދެ ވަނަ ހާފުގައި ރާއްޖޭގެ ލަނޑުތައް ޖެހުމުގައި ބަދަލު ކުޅުންތެރިޔާ އިބްރާހިމް މަހުދީ (ފޭދޫ އިއްބެ) ގެ ދައުރު ބޮޑެވެ.
މި މެޗާ އެކު ރާއްޖޭން އޭޝިއަން ކަޕް ކޮލިފައިން ނިންމާލީ ހަ ޕޮއިންޓާ އެކު ތިން ވަނައިގަ އޮވެ އެވެ. ރާއްޖެ މޮޅުވީ ބޫޓާނާ ދެކޮޅަށް ކުޅުނު ދެ މެޗުންނެވެ. މި ގްރޫޕުގެ އެއް ވަނަ ފަލަސްތީން ހޯދިއިރު ދެ ވަނަ އަށް ދިޔައީ އޮމާނެވެ. ބޫޓާން އޮތީ ފުލުގަ އެވެ.
މިރޭގެ މެޗު ޖުމްލަކޮށް ކޮންޓްރޯލްކޮށްގެން ކުޅުނީ ރާއްޖޭންނެވެ. މުޅި މެޗުގައި ވެސް ބޫޓާން ކުޅުންތެރިންނަށް ރާއްޖޭގެ ގޯލްކީޕަރު މުހައްމަދު ފައިސަލް ހާސްކޮށްލެވުނީ އެންމެ ދެ ފަހަރު އެވެ. ފުރަތަމަ ހާފުގައި އެންމެ ލަނޑެއް ޖެހުނު ނަމަވެސް ރާއްޖޭން ވަނީ ގޯލް ޖަހާނެ ގިނަ ފުރުސަތުތަކެއް ހޯދައިފަ އެވެ.
އެގޮތުން މެޗުގެ ފަސް ވަނަ މިނެޓުގައި ސެންޓޭ އޭރިއާ ތެރެއިން ވަނީ ބޫޓާން ގޯލަށް ބާރު ހަމަލައެއް ފޮނުވާލައިފަ އެވެ. އެ ބޯޅަ އާއި އަށް ވަނަ މިނެޓުގައި ދާދު ފޮނުވާލި ބޯޅަ ވެސް ބޫޓާން ގޯލްކީޕަރު މަތަކުރި އެވެ. ރާއްޖެ އަށް ލީޑު ނަގަން ރަނުގެ ފުރުސަތެއް ލިބުނީ އޭރިއާ ތެރެއިން ބޫޓާން ކުޅުންތެރިޔަކު ދާދު ވައްޓާލުމުން ރެފްރީ ޕެނަލްޓީއެއް ދިނުމުންނެވެ. އެކަމަކު ސެންޓޭ ޖެހި ޕެނަލްޓީ ދިޔައީ ހުރަސް ދަނޑި މަތިންނެވެ.
އޭގެ ފަހުން ރާއްޖޭން ލަނޑެއް ޖެހުމާ ގާތަށް އަނެއްކާ ވެސް ޖެހިލި އެވެ. އެގޮތުން 15 ވަނަ މިނެޓުގައި ދާދު ހުރަހެއް ބޫޓާން ކުޅުންތެރިޔެއްގެ ފައިގައި ޖެހި ބްލޮކްވެ ލިބުނީ ހުސްކޮށް ހުރި އިއްބެ ވަހީދަށެވެ. އެކަމަކު އެ ބޯޅަ އޭނާގެ ފަޔަށް ރަނގަޅަށް ނޭރުމުން ފޮނުވައެއް ނުލެވުނެވެ.
ރާއްޖެ އަށް ހަމްޕު ލީޑު ނަގައިދިނީ 34 ވަނަ މިނެޓުގަ އެވެ. އޭރިއާ ބޭރުން ބޯޅަ ހޯދައިގެން އެތެރެއަށް ވަދެ ބޫޓާނުގެ ޑިފެންޑަރެއް ކައިރިން ދެމި ގަނެ އޭނާ ވަނީ ބޯޅަ ގޯލުގެ ތިރީ ކަނަށް ވައްދާލައިފަ އެވެ.
ދެ ވަނަ ހާފުގައި ރާއްޖޭން ވަނީ ލިބުނު އަށް ފުރުސަތުގެ ތެރެއިން ހަ ފުރުސަތުގެ ބޭނުން ހިފައިފަ އެވެ. ރާއްޖޭގެ ދެ ވަނަ ލަނޑު 65 ވަނަ މިނެޓުގައި ޖެހީ ދާދު އެވެ. އޭރިއާ ބޭރުން ލިބުނު ބޯޅައާ އެކު މަޑުމަޑުން އެތެރެއަށް ވަދެ އޭނާ ވަނީ ބޫޓާނުގެ ޑިފެންޑަރާއި ގޯލްކީޕަރަށް އެއްވެސް ފުރުސަތެއް ނުދީ ތިރީ ކަނަށް ބޯޅަ ވައްދާލައިފަ އެވެ.
ރާއްޖޭގެ އެޓޭކްތައް އިތުރަށް ވަރުގަދަ ވެގެންދިޔައީ ފޭދޫ އިއްބެ އެރުމާ އެކު އެވެ. ފުރަތަމަ ފައިގައި ޖެހުނު ބޯޅައިން ވެސް އޭނާ ނުރައްކާކުރި އެވެ. އަދި 68 ވަނަ މިނެޓުގައި އަރިމަތިން ލިބުނު ބޯޅަ ހިފައިގެން އޭރިއާ ތެރެއަށް ވަދެ ހުސްކޮށް ހުރި އިއްބެ ވަހީދަށް ދިން ބޯޅަ އޭނާ ވަނީ ފަސޭހަކަމާ އެކު ގޯލަށް ވައްދާލައިފަ އެވެ. ރާއްޖޭގެ ހަތަރު ވަނަ ގޯލް ދާދު ޖެހީ 76 ވަނަ މިނެޓުގަ އެވެ. މި ފަހަރު އޭނާ ގޯލް ޖެހީ އޭރިއާ ތެރެއަށް ވަދެ ބާރު ޝޮޓަކުން ބޯޅަ ގޯލުގެ ތިރީ ކަނަށް ވައްދާލައިގެންނެވެ.
އޭނާ އަނެއް ދެ ގޯލް ޖެހީ ފުލުފުލުގަ އެވެ. އެގޮތުން 79 ވަނަ މިނެޓުގައި ރާއްޖޭގެ ފަސް ވަނަ ގޯލް ޖެހިއިރު ހަ ވަނަ ގޯލް ޖެހީ 81 ވަނަ މިނެޓުގަ އެވެ. މިއީ އަކްރަމް އަބްދުލްގަނީ ހިލޭ ޖެހުމަކުން ފޮނުވާލި ބޯޅައެއް ބޫޓާން ކީޕަރު އަތުގައި ޖެހިފައި ނުކުތް ވަގުތު ބޯޅަ ގޯލުގެ ތެރެއަށް ވައްދާލައިގެން ޖެހި ލަނޑެކެވެ. ރާއްޖޭގެ ހަތް ވަނަ ލަނޑު ސިފާއު ޖެހީ އިތުރު ވަގުތުގެ ތެރޭގަ އެވެ.