19 ޖުލައި 2016 - 09:21
އިބީޒާ، ސްޕެއިން (ޖުލައި 19) - ޔޫރޯ ފުޓްބޯޅަ މުބާރާތުގެ ފައިނަލް މެޗުގައި ކަކުލަށް ސީރިއަސް އަނިޔާއެއް ލިބުނު ނަމަވެސް، އަނިޔާ އިން ސަލާމަތްވެ ކުރިއަށް ވުރެ ވަރުގަދަކަމާ އެކު، އާ ސީޒަނާ ކުރިމަތިލާނެ ކަމަށް ޕޯޗުގަލް އާއި ރެއާލް މެޑްރިޑުގެ ފޯވާޑް ކްރިސްޓިއާނޯ ރޮނާލްޑޯ ބުނެފި އެވެ.
ފްރާންސް އަތުން 1-0 އިން މޮޅުވެ ޕޯޗުގަލް ތަށި ހޯދި މެޗުގެ ކުރީކޮޅު ރޮނާލްޑޯގެ ފަޔަށް ލިބުނު އަނިޔާއާ ގުޅިގެން އޭނާ ވަނީ ބާލައިފަ އެވެ. ފްރާންސުގެ ޑިމިޓްރީ ޕަޔެޓުގެ ހަމަލާއަކުން، ފަޔަށް ލިބުނު އަނިޔާ އިން ސަލާމަތްވެގެން އޭނަ އަށް ކުޅެން ނުކުމެވޭނީ އާ ސީޒަން ފަށާތާ ދެ ހަފުތާ ފަހުން ކަމަށް ރިޕޯޓްތައް ބުނެ އެވެ.
"އަހަރެން ބޭނުން ސަޕޯޓަރުންނަށް ޝުކުރުއަދާކުރަން،" އިންސްޓަގްރަމްގައި ޕޯސްޓްކޮށްފައިވާ ވީޑިއޯއެއްގައި ރޮނާލްޑޯ ބުންޏެވެ. "އަހަރެން ބުނެލަން ބޭނުންވަނީ، ހުރިހާ ކަމެއް ވެސް ރަނގަޅޭ. އަހަރެން އެނބުރި އަންނާނަން ކުރިއަށް ވުރެ ވަރުގަދަކޮށް."
ރޮނާލްޑޯ މި ވަގުތު އަންނަނީ އާއިލާއާ އެކު ސްޕެއިނުގެ އިބިޒާގައި ޗުއްޓީ ހޭދަކުރަމުންނެވެ. ރެއާލް މެޑްރިޑާ އެކު، މިދިޔަ ސީޒަނުގެ ޗެމްޕިއަންސް ލީގު ކާމިޔާބުކުރި ރޮނާލްޑޯ އަކީ މި ފަހަރުގެ ބެލޮންޑިއޯ އެވޯޑަށް ވެސް އެންމެ ބޮޑަށް ވާދަކުރާނެ އެއް ކުޅުންތެރިޔާ އެވެ.