26 މާޗް 2018 - 06:28
ވިލް ސުމިތާއި ޓޮމީ ލީ ޖޯންސް މުހިއްމު ރޯލްތައް ކުޅުނު "މެން އިން ބްލެކް" ފްރެންޗައިޒްގެ ރިބޫޓިން ވާޝަނެއް އެ މީހުންނާ ނުލައި ގެނެސް ދޭން ސޮނީ ޕިކްޗާޒް އިން ނިންމައިފި އެވެ.
ފިލްމްގެ ކާސްޓްގައި ހިމެނޭ ބައެއް ތަރިން ވެސް މިހާރު ވަނީ އިއުލާންކޮށްފަ އެވެ. އޭގެ ތެރޭގައި "ތޯ: ރެގްނަރޮކް" ގެ ދެ ތަރިން ކަމަށްވާ ކްރިސް ހެމްސްވޯތާއި ޓެސާ ތޮމްޕްސަން ހިމެނެ އެވެ.
"މެން އިން ބްލެކް" މި ޒަމާނުގެ ޓެކްނޮލޮޖީ ތެރެއަށް ފައްތައިގެން، ކުރިއަށް ވުރެ ވަރުގަދަ ސައިންސް ފިކްޝަން ފިލްމެއްގެ ގޮތުގައި ގެނެސްދޭ އިރު، މީގެ ޑައިރެކްޝަން ހަވާލުކޮށްފައި ވަނީ "ފާސްޓް އެންޑް ފިއުރިއަސް" ގެ 8 ވަނަ ބައި "ފޭޓް އޮފް ދަ ފިއުރިއަސް" ގެ ޑައިރެކްޓަރު އެފް ގެރީ ގްރޭއާ އެވެ.
އަދި އިތުރު އާ ކެރެކްޓާތަޖެއް ހިމަނައިގެން ފިލްމްގެ ސްކްރީންޕްލޭ ލިޔަން ހަވާލުކޮށްފައި ވަނީ "އަޔަން މޭން" ލިޔުނު މެޓް ހޮލޮވޭ އާއި އާޓް މާކަމް އެވެ. ސިނަމާތަކަށް ފިލްމް ގެންނަން ނިންމާފައި ވަނީ ޖޫން، 14، 2019 ގަ އެވެ.
"މެން އިން ބްލެކް" ގެ ތިން ފިލްމެއް މިހާތަނަށް ގެނެސް ދީފައިވެ އެވެ. އެއީ 1997، 2002 އަދި 2012 ގަ އެވެ. އެ ތިން ފިލްމް ވެސް ޑައިރެކްޓް ކުރީ ބެރީ ސޮނެންފެލްޑް އެވެ.