21 މާޗް 2018 - 10:28
މެޑްރިޑް (މާޗް 21) - ޗެލްސީގެ ފޯވާޑް އަލްވާރޯ މޮރާޓާ އަށް ސްޕެއިން ގައުމީ ޓީމުގެ ދޮރު ބަންދު ނުވާ ކަމަށް އެ ޓީމުގެ ކޯޗު ޖޫލެން ލޮޕެޓެގީ ބުނެފި އެވެ.
ޖަރުމަނާއި އާޖެންޓީނާއާ ދެކޮޅަށް ކުޅޭ އެކުވެރިކަމުގެ ދެ މެޗަށް ނެގި ސްކޮޑުން މޮރާޓާ ބާކީކުރިއިރު، އޭނާގެ ބަދަލުގައި ނަގާފައިވަނީ ފަހަކަށް އައިސް އެތުލެޓިކޯ މެޑްރިޑަށް މޮޅު ކުޅުމެއް ދައްކަމުން އަންނަ ޗެލްސީގެ ކުރީގެ ފޯވާޑް ޑިއޭގޯ ކޮސްޓާ އެވެ.
ފަހަކަށް އައިސް މޮރާޓާގެ ފޯމު ވަނީ ވަރަށް ބޮޑަށް ދަށްވެފަ އެވެ. އެހެން ނަމަވެސް އެފްއޭ ކަޕް ކުއާޓާ ފައިނަލްގައި މިދިޔަ އާދިއްތަ ދުވަހު ލެސްޓާ ސިޓީ ކޮޅަށް ލަނޑު ޖަހައި މޮރާޓާ ވަނީ ހަމަޖެހުމެއް ހޯދައިފަ އެވެ. މިއީ 14 މެޗުގެ ތެރޭގައި މޮރާޓާ ޖެހި ފުރަތަމަ ލަނޑެވެ.
ލޮޕެޓެގީ ބުނީ މޮރާޓާ އަށް އަދިވެސް ފުރުސަތު އެބައޮތް ކަމަށެވެ.
"ޔަގީނުން ވެސް މިއީ ރަޝިއާ އަށްދާނެ ސްކޮޑެއް ނޫން. އެހެންވީމަ މޮރާޓާ އަށް ވެސް އަދި ދޮރު ބަންދެއް ނުވޭ. ފުރުސަތު އެބައޮތް އެހެން ކުޅުންތެރިންނަށް ވެސް. މި ވަގުތު މޮރާޓާ ސްކޮޑުން އުނިކުރީ އޭނާގެ ފޯމު ދަށްވުމުން،" ލޮޕެޓެގީ ބުންޏެވެ.
ލޮޕެޓެގީ އަކީ ސްޕެއިނުގެ 21 އަހަރުން ދަށުގެ ގައުމީ ޓީމަށް މޮރާޓާ ކުޅުނުއިރު އެ ޓީމުގެ ކޯޗެވެ. ލޮޕެޓެގީ ބުނީ މޮރާޓާ އަކީ ސްޕެއިނުގެ ފުރަތަމަ އެގާރައިގައި ކުޅެވޭ ފެންވަރު ކުޅުންތެރިން ކަމަށާއި އެހެން ނަމަވެސް ގައުމީ ޓީމަށް އަރާނީ އެ ވަގުތެއްގައި އެންމެ ރަނގަޅު ފޯމެއްގައި ތިބި ކުޅުންތެރިން ކަމަށެވެ.
ޗެލްސީގެ ކޯޗު އެންޓޯނިއޯ ކޮންޓޭ ފަހަކަށް އައިސް މޮރާޓާގެ ފޯމު ދަށްވުމުގެ ސަބަބުން އެ ޓީމުގެ ފުރަތަމަ އެގާރައިގައި އެންމެ ކުރިއަށް ބޭނުންކުރީ އެޑެން ހަޒާޑް އެވެ. އެހެން ނޫން ނަމަ ޖެނުއަރީ ޓްރާންސްފާގައި ޗެލްސީ އަށް ބަދަލުވި ފްރާންސްގެ ފޯވާޑް އޮލިވިއޭ ޖިރޫ އެވެ.
މި ސީޒަނުގައި ރެއާލް މެޑްރިޑް ދޫކޮށް ޗެލްސީއާ ގުޅުމަށް ފަހު ފުރަތަމަ މެޗުތަކުގައި މޮރާޓާގެ ފަރާތުން ރަނގަޅު ކުޅުމެއް ފެނުނެވެ. އެހެން ނަމަވެސް ލިބުނު އަނިޔާ އަކަށް ފަހު އަލުން ކުޅުމަށް އެނބުރި އައި ފަހުން މޮރާޓާ އަށް ކުރީގެ ކުޅުން ދައްކަން ވަނީ އުނދަގޫވެފަ އެވެ.