20 މާޗް 2018 - 18:43
އިދިކޮޅު މެމްބަރުންތަކަކާއެކު، ވިލުފުށީ ދާއިރާގެ ޕީޕީއެމް މެމްބަރު ރިޔާޒް ރަޝީދު މިއަދު ނެންގެވި ފޮޓޯއެއް ސިޔާސީ ބޮޑު ބަހުސަކަށް ހިނގައްޖެ އެވެ.
އެކި ތުހުމަތުތަކުގައި ބަންދުގައި ތިބި ސިޔާސީ ބޭފުޅުން ކްރިމިނަލް ކޯޓަށް ހާޒިރު ކުރަމުން އަންނައިރު، އިދިކޮޅު ބައެއް ފަރާތްތަކުން ކްރިމިނަލް ކޯޓު ސަރަހައްދަށް ވަނީ ޖަމާވެފަ އެވެ. އޭގެ ތެރޭގައި، ބަންދުގައި ތިބި ބޭފުޅުންގެ އާއިލާތަކުގެ މެމްބަރުންނާއި ރައްޔިތުންގެ މަޖިލީހުގެ އިދިކޮޅު މެމްބަރުން ހިމެނިވަޑައިގަންނަވަ އެވެ.
ރިޔާޒް ފޮޓޯ ނެންގެވީ ކްރިމިނަލް ކޯޓު ސަރަހައްދަށް ވަޑައިގެންނެވި މަތިވެރި ދާއިރާގެ މެމްބަރު ހުސެއިން މުހައްމަދާއި ތިނަދޫ ދެކުނު ދާއިރާގެ މެމްބަރު އަބްދުﷲ އަހުމަދު (އަބުޅޯ) އާއި ފުވައްމުލަކު އުތުރު ދާއިރާގެ މެމްބަރު އަލީ ޝާހުއާ އެކުގަ އެވެ. އެ ފޮޓޯ ސޯޝަލް މީޑިއާގައި އަންނަނީ ދައުރުވަމުންނެވެ.
ޓްވިޓާގައި ބައެއް މީހުން ބުނި ގޮތުގައި، ރިޔާޒް ވަނީ އިދިކޮޅު ފަރާތްތަކާ ގުޅިވަޑައިގެން، ސަރުކާރާ ދެކޮޅަށް ކުރަމުން އަންނަ އިހްތިޖާޖްތަކުގައި ބައިވެރިވެވަޑައިގަންނަވަން ފައްޓަވައިފަ އެވެ. އަނެއް ބަޔަކު ބުނަނީ ރިޔާޒަށް ބަޔަކު މިއޮތީ ވަރުގަދަ "ބޮނޑިއެއް" ދީފައި ކަމަށެވެ.
އެމްޑީޕީގެ ސޯޝަލް މީޑިއާ އެކްޓިވިސްޓެއް ކަމަށްވާ ތޮއްޔިބު ޝަހީމް ބުނި ގޮތުގައި ރިޔާޒް އިހްތިޖާޖްގައި ބައިވެރިވެވަޑައިގެންނެވީ ދަނގެތި ދާއިރާގެ މެމްބަރު އިލްހާމް އަހުމަދު ކޯޓަށް ހާޒިރު ކުރާތީ އެވެ. އެކަމަކު، އިދިކޮޅު ފަރާތްތަކުން ދައްކަމުން އަންނަ ވާހަކަތައް ރިޔާޒް ދޮގުކުރެއްވި އެވެ.
ޕީޕީއެމް ޕާލަމެންޓްރީ ގްރޫޕްގެ ޑެޕިއުޓީ ލީޑަރުކަން ކުރައްވާ ރިޔާޒް ކުރެއްވި ޓުވީޓެއްގައި ވިދާޅުވީ މަގުމަތިން ހިނގާފައި ދާ މީހުން ހިފަހައްޓައިގެން ފޮޓޯ ނަގާފައި އެއީ އެމީހުންގެ ހަރަކާތްތަކުގައި ބައިވެރިވާ މީހުން ކަމަށް ދައްކަން އުޅުމަކީ ސިޔާސީ ގޮތުން ތަސައްރަފު ނުފުދޭ މީހުން ކުރާ ކަހަލަ ކަންތައް ކަމަށެވެ. އެކަމަކު ބައެއް މީހުން ބުނީ ރިޔާޒް ފޮޓޯގައި ފެންނަނީ ބަޔަކު ހިފަހައްޓާފައި ފޮޓޯ ނަގާފައި ހުރި ކަހަލަ ގޮތަކަށް ނޫން ކަމަށެވެ.
ރިޔާޒް "މިހާރު" އަށް ވިދާޅުވީ އޭނާ ބާޒާރުމައްޗަށް ވަޑައިގެންނެވީ އިހްތިޖާޖް ކުރައްވަން ނޫން ކަމަށެވެ. އިދިކޮޅު ފަރާތްތަކާ ރިޔާޒް ގުޅިވަޑައިގެންނެވި ކަމަށް ބުނެ، ދައްކަނީ ދޮގު ވާހަކަތަކެއް ކަމަށް އޭނާ ވިދާޅުވި އެވެ.
"އަޅުގަނޑުގެ ފިހާރައެއް ހުންނާނެ ބާޒާރުމަތީގައި. އެ ފިހާރަ އަށް ދިޔަ މީހެއް އަޅުގަނޑަކީ. އެތަނުން ނިކުތް ތަނުން، މެމްބަރު އަބުޅޯމެން އަޅުގަނޑު ގެންގޮސްފައި ސަލާންކޮށް ފޮޓޯ ނަގައި ހެދީ. އެމީހުން ކުރާ ކަމެއްގައި ބައިވެރިވީކީ ނޫން،" ރިޔާޒް ވިދާޅުވި އެވެ.
"އަޅުގަނޑަށް ގަބޫލު ކުރެވޭ ހަގީގަތަކީ އަޅުގަނޑު ކޯޓަށް ގެންގޮސްފި ނަމަ، އަބުޅޯމެން ބޭފުޅަކު ނުފެންނާނެ ކޯޓު ކައިރިންނެއް، ދެން ކީއްކުރަން އެބޭފުޅުންނާއެކު ނިކުންނަންވީ؟"
ރިޔާޒްގެ ޓްވީޓަށް އެންމެ ވަރުގަދަ ރައްދެއް ދެއްވީ އަދާލަތު ޕާޓީގެ ނައިބު ރައީސް އަލީ ޒާހިރެވެ. އޭނާ ރިޔާޒް އަރިހު އެއްސެވީ "ޑިކްޓޭޓަރު" އިންޒާރެއް ދެއްވީތޯ؟ އެވެ.