22 މާޗް 2018 - 06:41
ވޯކިން ޓައިޓްލްއަކަށް "ޓްރިޕްލް ފްރޮންޓިއާ" ގެ ނަން ދީފައިވާ ކްރައިމް ތުރިލާގެ މަސައްކަތް މި މަހުގެ 26 ގައި ފަށަން ތައްޔާރުވެފައިވާ އިރު ފިލްމްގެ ކާސްޓުން ވަރަށް ވެސް ސަޅި އެވެ. މި ފިލްމްގެ ވާހަކައާ އެކު، މިއަށް ޝައުވެރިކަން ދެވޭ އެއް ސަބަބަކީ ވެސް ފިލްމްގެ ވަރުގަދަ ކާސްޓެވެ.
ކާސްޓުންގެ ތެރޭގައި ބެން އެފްލެކް، އޮސްކާ އިސާކް، ޖެރެޓް ހެޑްލަންޑް ޕެޑްރޯ އަދި އެޑްރިއޯ އަޖޯނާ ހިމެނެ އެވެ. މި މީހުން މިހާރު ވަނީ ފިލްމްގެ ޝޫޓިން ފެށުމުގެ ކުރިން ބައެއް ޓްރޭނިންތައް ވެސް ހަދައިފަ އެވެ. އެގޮތުން މޫދުގައި ކާސްޓުން އުޅެނިކޮށް ނަގާފައިވާ ފޮޓޯތަކެއް މި ހަފުތާގައި މީޑިއާތަކަށް އާންމުވި އިރު، އެންމެ ބޮޑަށް އަޅައިގަތީ އެފްލެކްގެ ބުކަށީގައި އިން ބޮޑު ޓެޓޫ އެވެ.
ފަސް އެކުވެރިޔަކުވެގެން ވަރުގަދަ ޑްރަގް ލޯޑެއް "ސައިޒްކޮށްލަން" ކުރާ މަސައްކަތުގެ ތެރޭގައި ދިމާވާ ހާދިސާތައް ދައްކުވައިދޭ "ޓްރިޕްލް ފްރޮންޓިއާ" ޝޫޓް ކުރަން ހަމަޖެހިފައި ވަނީ ހަވާއީ، ކޮލަމްބިއާ އަދި ކެލިފޯނިއާގަ އެވެ. ފިލްމްގެ ޑައިރެކްޓަރަކީ "އޯލް އިޒް ލޮސްޓް" އާއި "އަ މޯސްޓް ވައިލަންޓް އިޔާ" ފަދަ ފިލްމްތައް ގެނެސް ދިން ޖޭސީ ޗެންޑޯ އެވެ.
ފިލްމްގެ ސްކްރިޕްޓް ލިޔެފައި ވަނީ އޮސްކާ އަށް ވާދަ ކުރި "ޒީރޯ ޑާކް ތާޓީ" އާއި "ދަ ހާޓް ލޮކާ" ފަދަ ފަދަ ފިލްމްތަކުގެ ސްކްރީން ރައިޓަރު މާކް ބޯއަލް އެވެ.
"ޓްރިޕްލް ފްރޮންޓިއާ" ގެ މަސައްކަތް ވަރުގަދަ ކާސްޓަކާ އެކު، ހަދަން ތައްޔާރުވާއިރު، ފާހަގަކޮށްލެވޭ އެއް ކަމަކީ މީގެ ކުރިން ވެސް އޭ ލިސްޓް ތަރިންތަކެއް އެއްކޮށް މި ފިލްމް ވޯނާ ބްރަދާޒް އިން ހަދަން އުޅުނު ކަމެވެ. އޭރު ކާސްޓަށް އައި ނަންތަކުގެ ތެރޭގައި ލިއޮނާޑޯ ޑޮ ކެޕްރިއޯ، ޓޮމް ހޭންސްކް، ޖޯނީ ޑެޕް، ޓޮމް ހާޑީ، ޗެނިން ޓެޓަމް އަދި މެހެރްޝާ އަލީ ހިމެނެ އެވެ.
އެކަމަކު މި ފަހަރު "ޓްރިޕްލް ފްރޮންޓިއާ" ގެ ބަލަދުވެރިއަކީ ނެޓްފްލިކްސް އެވެ.