19 މާޗް 2018 - 07:26
ގޭތެރޭގައި ހުންނަ ބޮކިތައް، ބުނެލާއިރަށް ދިއްލިފައި ބުނެލާއިރަށް ނިވެނީ އާންމުކޮށް ފިލްމުތަކުގައެވެ. އެކަމަކު އެކޯބީ ސުވިޗް ޕްލަސްއަކީ އާދައިގެ ސުވިޗުގެ ބަދަލުގައި ގޭގައި ހަރުކުރަން ވަރަށް ރަނގަޅު، "ބަސްއަހާ" ސުވިޗެކެވެ.
ވައިފައިއާ ގުޅުވާލުމުން މި ސުވިޗުތަކަށް އަނގަބަހުން އިރުޝާދު ދީގެން އަދި މިއާ ގުޅޭ ސްމާޓްފޯނު އެޕް މެދުވެރިކޮށް ވެސް އިރުޝާދު ދެވޭނެ އެވެ.
އެކޯބީ ސުވިޗު ޕްލަސްއަށް އިރުޝާދު ދިނުމުގެ ކުރިން އެޕްގައި އެ ސުވިޗަށް ނަމެއް ދޭން ޖެހެއެވެ. ގޭގެ ހުރިހާ ކޮޓަރިތަކެއްގައި މީގެ ސުވިޗު ހަރުކޮށްފި ނަމަ އަންގާ އެންގުންތައް ފުރަތަމަ ތަންފީޒުކުރާނީ އެންމެ ކައިރީގައި ހުންނަ ސުވިޗެކެވެ. މިއަށް ހުއްދަ ދީފައި އޮންނަ މިންވަރަކުން އަމިއްލައަށް ނިވި، ދިއްލައިދިނުމުގެ ބާރު ވެސް މިއަށް ލިބިފައިވެއެވެ. ކޮޓަރިތެރޭ އެކަކުވެސް ނެތްކަމަށް އެކޯބީއަށް އިހުސާސް ކުރެވުމުން ބޮކި ނިވައިދެއެވެ. ރޭވެ އަނދިރިވެއްޖެކަމަށް ސުވިޗަށް ރޭކާލުމުން ފެންޑާމަތީގެ ބޮކިތައް ދިއްލައިދެއެވެ.
އެކޯބީ ސުވިޗު ޕްލަސް ފަރުމާކޮށްފައިވަނީ ބުނާ ގޮތަކަށް ބޮކި ނިވިދިއްލައިދޭން އެކަންޏެއް ނޫނެވެ. ގޭތެރޭގެ ފަޅުކަން ފިލުވައިދޭން ލަވަ ޖަހައިދެއެވެ. ލިބުނު މެއިލްތައް ބަލައިދީ، އެންމެ ފަހުގެ ޚަބަރުތައް ކިޔައިދެއެވެ. އަދި ގޭތެރޭގައި ގެންގުޅޭ ސްމާޓް އެހެން ޑިވައިސްތަކާ ވެސް ކުޅެވެއެވެ.