15 މާޗް 2018 - 10:30
ސިފައިންގެ ސްޕެޝަލް ޕްރޮޓެކްޝަން ގްރޫޕް (އެސްޕީޖީ) ގައި ބޮޑީގާޑުންގެ ގޮތުގައި މަސައްކަތްކުރަނިކޮށް ކަނޑާލި ތިން މީހުން ފުލުހުން ރޭ ހައްޔަރުކޮށްފި އެވެ.
"މިހާރު" އަށް އެނގިފައިވާ ގޮތުގައި ފުލުހުން ހައްޔަރުކުރީ ސިމާދު އަހުމަދާއި އަހުމަދު ޝާނީޒް އަދި އަހުމަދު ފައްތާހު އެވެ. އެ މީހުން ހައްޔަރުކުރީ ބޮޑުތަކުރުފާނު މަގުން، ގާޑިޔާތައް ބަހައްޓާފައި ހުންނަ ސަރަހައްދުގައި ތިއްބާ އެސްއޯ ފުލުހުން ކަމަށްވެ އެވެ. ހައްޔަރުކުރުމަށް ފަހު އެ އެންމެން ވަނީ ދޫނިދޫ ޖަލުގައި ހައްޔަރުކޮށްފަ އެވެ.
ސިމާދަކީ ކުރީގެ ރައީސް މައުމޫން އަބްދުލް ގައްޔޫމާއި ކުރީގެ ރައީސް މުހައްމަދު ނަޝީދާއި މަޖިލިސް ރައީސް އަބްދުﷲ މަސީހުގެ އިތުރުން ބައެއް މިނިސްޓަރުންގެ ވެސް ބޮޑީގާޑެއްގެ ގޮތުގައި މަސައްކަތްކުރި މީހެކެވެ. އަދި ހައްޔަރުކުރި ޝާނީޒާއި ފައްތާހަކީ ވެސް ރައީސް ނަޝީދާއި ބައެއް މިނިސްޓަރުންގެ ބޮޑީގާޑުންގެ ގޮތުގައި މަސައްކަތްކުރި ދެ މީހުންނެވެ.
ސިމާދާއި ޝާނީޒް، މިދިޔަ މަހު 23ގަ އި ހައްޔަރުކުރީ ސިފައިންގެ ތެރޭގައި ފިތުނަ ފަސާދަ އުފައްދައި، އެނގެން ނުޖެހޭ މައުލޫމާތު ބަޔަކަށް ފޯރުކޮށްދިންކަމުގެ ތުހުމަތުގަ އެވެ. އަދި އެ ދެ މީހުން މިމަހުގެ ހަވަނަ ދުވަހު ވަޒީފާއިން ވަކި ކުރީ، އަމިއްލައަށް ކެނޑެން އެންގުމަށް ފަހު އެކަން ނުކުރުމުން ކަމަށް ވެސް އެނގިފައި ވެ އެވެ.
އިދިކޮޅު ސިޔާސީ އިސް ބޭފުޅުންތަކެއް ހިމެނޭ ގޮތަށް ނުވަ ގައިދީއަކު ދޫކޮށްލަން މިދިޔަ މަހުގެ 1 ގައި ސުޕްރީމް ކޯޓުން ނެރުނު އަމުރާ ގުޅިގެން ސިޔާސީ މަސްރަހުގައި ހިނގި ހަމަނުޖެހުންތަކުގެ ތެރޭގައި މި ދެ މީހުން ހައްޔަރުކުރުމަށް ފަހު އެންމެ ފުރަތަމަ ގެންދިޔައީ ގިރިފުއްޓަށެވެ. ނަމަވެސް އިސްތިއުފާ ދޭން އަންގައި، އެކަން ނުކުރުމުން، ދެން ބަންދުކުރީ ހުޅުލޭގައި ހުންނަ ސިފައިންގެ މަރުކަޒަށެވެ.
މިދިޔަ މަހު 1 ގައި ސުޕްރީމް ކޯޓުން ނެރުނު އަމުރަށް ފަހު ފުލުހުންގެ ތެރޭގައި ހަމަނުޖެހުން ހިންގި ކަމުގެ ތުހުމުގައި ބައެއް ފުލުހުން ވެސް ވަނީ ހައްޔަރުކޮށްފަ އެވެ. އޭގެ ތެރޭގައި ފުލުހުންގެ ސްޕެޝަލިސްޓް އޮޕަރޭޝަންސް (އެސްއޯ)ގެ ކުރީގެ ކޮމާންޑަރު އަބްދުﷲ އިބްރާހިމް(ޑީޑީ) އާއި ސްޕެޝަލް ވެޕަންސް އެންޑް ޓެކްޓިކްސް (ސްވޮޓް) ގެ ކުރީގެ ކޮމާންޑަރު ހުސައިން ސައިފް އާއި އިތުރު ފަސް ފުލުހަކު ހިމެނެ އެވެ.