01 މާޗް 2018 - 06:27
ދީޕިކާ ޕަދުކޯން އާއި ރަންވީރު ސިންގް އަދި ޝާހިދު ކަޕޫރުގެ "ޕަދްމާވަތު" ގެ ހިނގުމަށް އަދިވެސް ހުއްޓުމެއް ނާދެ އެވެ. ޑޮމެސްޓިކް އަދި ގްލޯބަލް ބޮކްސް އޮފީހުގައި މި ފިލްމަށް މިހާރު ވެސް ވަރަށް ބޮޑު އަދަދުތަކެއް ލިބިފައި ވާއިރު މި ފިލްމު މިހާރު ވަނީ ސަލްމާން ޚާނާއި ކެޓުރީނާ ކައިފްގެ ބްލޮކްބަސްޓާ ފިލްމު "ޓައިގާ ޒިންދާ ހޭ"ގެ ބޮކްސް އޮފީސް ރެކޯޑް މުގުރާލައިފަ އެވެ.
"ޕަދްމާވަތު" އަށް މިހާތަނަށް 564 ކްރޯޑު (5.64 ބިލިއަން ރުޕީސް) ލިބިފައިވާއިރު "ޓައިގާ ޒިންދާ ހޭ" އަށް ލިބިފައިވަނީ 562 ކްރޯޑު (5.62 ބިލިއަން ރުޕީސް) އެވެ.
މުޅި ދުނިޔޭން އެންމެ ގިނަ ފައިސާ ލިބުނު ހަތް ފިލްމުގެ ތެރޭގައި ވެސް މިހާރު "ޕަދްމާވަތު" ވަނީ ހިމެނިފަ އެވެ. މި ފިލްމު އަދިވެސް ބައެއް ސިނަމާތަކުގައި ދައްކަމުން އަންނާތީ ކުރިޔަށް އޮތް ތަނުގައި އިތުރު ފިލްމުތަކުގެ ރެކޯޑްތައް މުގުރާލުމަކީ ވެސް އެކަށީގެންވާ ކަމެކެވެ.
"ޕަދްމާވަތު" އަކީ އިއުލާން ކުރީންސުރެ ވަރަށް ގިނަ މައްސަލަތަކާ ކުރިމަތިވި ފިލްމެކެވެ. ފިލްމުގެ ޑައިރެކްޓަރު ސަންޖޭ ލީލާ ބާންސާލީ ވަނީ މި ފިލްމު އުފެއްދުމުގައި ވަރަށް ގިނަ ތަކުލީފުތަކާއި ވޭންތައް އުފުލައިފަ އެވެ.
ފިލްމު ފަށަންވީއިރު ފިލްމަށް ފަންޑުކޮށްދޭނެ އެއްވެސް ޕްރޮޑިއުސަރެއް ބާންސާލީ އަކަށް ނުވި އެވެ. ފިލްމުގެ ބަޖެޓް ބޮޑުކަމުން އެވަރުގެ ރިސްކެއް ނަގަން ގިނަ މީހުން ބޭނުން ނުވީ އެވެ. އެންމެ ފަހުން ފިލްމަށް ފައިސާ ދޭން ވައަކޮމް 18 އިން ނިންމުމުން ބާންސާލީއަށް ހިތްހަމަޖެހުމެއް ލިބުނެވެ.
ފިލްމުގެ ޝޫޓިން ފެށިތަނާ ރާޖްޕޫތު ސޭނާ ކިޔާ ޖަމާއަތަކުން ފިލްމާ ދެކޮޅަށް ތެދުވެ ފިލްމުގެ ސެޓާއި ކެމެރާތައް ހަލާކުކޮށްފައިވެ އެވެ. އަދި އޭގެ ފަހުން ތައްޔާރުކުރި ބޮޑު ސެޓެއް އަލިފާން ޖަހައި އަންދާލި އެވެ.
މި ހުރިހާ ކަމަކަށް ކެތްކުރަމުން ބާންސާލީ ފިލްމު ނިންމައި ރިލީޒްކުރީ އިންޑިއާގެ އެކި ކަންކޮޅުތަކުގައި ފިލްމާ ދެކޮޅަށް ބޮޑެތި ހަޅުތާލުތައް ކޮށް ހަމަނުޖެހުންތައް ހިންގަމުން ދަނިކޮށެވެ.