28 ފެބުރުއަރީ 2018 - 06:22
ޝްރީދޭވީގެ 50 އަހަރަށް ވުރެ ދިގު ފިލްމީ ކެރިއަރުގައި އޭނާ ވަނީ ޕްރޮފެޝަނަލް ކަމުގެ މިސާލު ދައްކައިފަ އެވެ. އޭނާއާ އެކު މަސައްކަތް ކޮށްފައިވާ ކޮންމެ އެކްޓަރަކު ވެސް އަދި ކޮންމެ ޑައިރެކްޓަރަކު ވެސް ބުނަނީ ޝްރީދޭވީ ވަރުގެ ޕްރޮފެޝަނަލް އެކްޓަރަކު މަދުން ނޫނީ ނުފެންނާނެ ކަމަށެވެ.
ފިލްމު ޝޫޓިންއެއްގައި ދުވަހަކު ވެސް އޭނާ ބޮޑާހާކައި ރުޅިގަދަކޮށް ހަޅޭއްލަވައެއް ނުހަދަ އެވެ. އަބަދުވެސް އޭނާ މަސައްކަތްކޮށްފައި ވަނީ ވަރަށް ޕްރޮފެޝަނަލް ކޮށެވެ. މީގެ އެއް މިސާލަކީ ޔާޝް ޗޯޕްރާގެ "ލަމްހޭ" ކުޅުނު ދުވަސްވަރު ހިނގި އެއް ހާދިސާ އެވެ.
"ލަމްހޭ" ކުޅުނު ދުވަސްވަރުގެ ހާދިސާއެއް ޔާޝް ޗޯޕްރާ ދީފައިވާ އިންޓަވިއުއެއްގައި ކިޔައިދީފައިވެ އެވެ. އޭނާ ބުނި ގޮތުގައި ޝްރީދޭވީއާ އެކު "ލަމްހޭ"ގެ ޝޫޓިން އަށް އިނގިރޭސި ވިލާތުގެ މެންޗެސްޓާގައި ތިބި ދުވަސްވަރު އެއް ދުވަަހަކު ޔާޝް ޗޯޕްރާ އަށް އިންޑިއާ އިން ފޯނު ކޯލެއް އައެވެ. އެ ފޯނު ކުރި މީހާ ބުނީ ޝްރީދޭވީގެ ބައްޕަ މަރުވި ޚަބަރު އޭނާއަށް ދިނުމަށެވެ.
ނަމަވެސް ޝްރީދޭވީ ގާތު އެ ވާހަކަ ބުނާހާ ހިތްވަރެއް ޔާޝް ޗޯޕްރާއަކަށް ނުލިބުނެވެ. އެހެންވެ ޝްރީދޭވީ ގާތު ބުނީ ބައްޕަ ވަރަށް ސީރިއަސް ވެގެން އުޅޭ ކަމަށާއި ވީ އެންމެ އަވަހަކަށް އިންޑިއާ އަށް ދިއުމަށެވެ. އަދި ޝްރީދޭވީ އަންނަ ދުވަހަކަށް އިންތިޒާރު ކުރާނެ ކަމަށް ވެސް އޭނާ ބުންޏެވެ.
އިންޑިއާ އަށް ދިއުމާ އެކު ބައްޕަ މަރުވި ޚަބަރު ޝްރީދޭވީ އަށް ލިބުމުން ޔާޝް ޗޯޕްރާ އަށް ގުޅާފައި 16 ދުވަސް ފަހުން ޝޫޓިން އަށް ދާނެ ކަމަށް ބުންޏެވެ.
"ސަތާރަ ވަނައަށް ވީ ދުވަހު ޝްރީދޭވީ އެނބުރި ގޮސް އަހަރެން އެހިން ޝޫޓިން ކުރިޔަށް ގެންދެވޭނެހޭ. ނަފްސާނީ ގޮތުންނާއި ޖިސްމާނީ ގޮތުން ވެސް ތައްޔާރުހޭ. އޭނަ ބުނި ތިމަންނަ މިތަނަށް އައިސް މިހިރީ އެކްޓް ކުރާށޭ،" ޔާޝް ޗޯޕްރާގެ އިންޓަވިއުގައި ބުނެފައިވެ އެވެ.
ބައްޕަގެ މަރަށް ފަހު ޝޫޓިން ފެށި ދުވަހު އިއްތިފާގުން ޝްރީދޭވީއަށް ކުޅެން ޖެހުނީ "ލަމްހޭ"ގައި ވެސް އޮތް އެންމެ މަޖާ މަންޒަރެވެ. އެއީ ވަހީދާ ރަހްމާނާއެކު އޭނާއަށް ކުޅެން ޖެހުނު މަންޒަރެކެވެ. ޕްރޮފެޝަނަލް ކަން ދައްކަމުން ޝްރީދޭވީ ވަރަށް ފުރިހަމައަށް އެ މަންޒަރު ކުޅެލި އެވެ. ބައްޕަ މަރުވުމުގެ ހިތާމައިން އޭނާގެ ހިތް ކުދިކުދި ވެފައިވާކަން އެންމެ ހިނދުކޮޅަކަށް ވެސް އޭނާ އެ މަންޒަރުން ފެނުނަކަ ނުދިނެވެ.