26 ފެބުރުއަރީ 2018 - 12:57
ވޮޝިންޓަން (ފެބްރުއަރީ 26) - އެމެރިކާއާ އެކު މަޝްވަރާތައް ކުރިއަށް ގެންދަން ނޯތު ކޮރެއާ އިން ބޭނުންވާކަމުގެ އިޝާރާތެއް ދީފައިވާ ކަމަށް ސައުތު ކޮރެއާ އިން ބުނެފި އެވެ.
އެމެރިކާ އިން ބުނެފައި ވަނީ ނޯތު ކޮރެއާއާ އެކު ކުރިއަށް ގެންދާ ކޮންމެ މަޝްވަރާއެއްގެ ނަތީޖާއަކަށް ވާނީ އެ ގައުމުން ނިއުކްލިއާ ހަތިޔާރު ނައްތާލުން ކަމަށެވެ. ނޯތު ކޮރެއާ އިން ކުރިން ބުނެފައި ވަނީ މަޝްވަރާތަކުގެ ކުރިން އެއްވެސް ޝަރުތެއް ކަނޑަނޭޅޭނެ ކަމަށެވެ.
އެމެރިކާއާ އެކު ނޯތު ކޮރެއާ އިން މަޝްވަރާ ކުރަން ބޭނުންވާކަމުގެ އިޝާރާތެއް ދީފައި މި ވަނީ ވިންޓަ އޮލިމްޕިކްސް ނިންމުމުގެ ރަސްމިއްޔާތަށް ސޯލް އަށް ދިޔަ ނޯތު ކޮރެއާގެ ވަފުދުން ސައުތު ކޮރެއާގެ ރައީސް މޫން ޖައެ-އިން އާ އެކު ބޭއްވި ބައްދަލުވުމަށް ފަހު އެވެ.
މޫން ޖައިގެ އޮފީހުން ނެރުނު ބަޔާނެއްގައި ބުނެފައި ވަނީ އެމެރިކާއާ އެކު މަޝްވަރާތައް ކުރިއަށް ގެންދަން ނޯތު ކޮރެއާ އިން ވަރަށް ބޮޑަށް ބޭނުންވާ ކަމަށެވެ. އަދި ދެ ކޮރެއާގެ މަޝްވަރާތައް ބޭއްވުމަށް ވެސް ނޯތު ކޮރެއާ އިން އެއްބަސްވެފައިވާ ކަމަށް ބުނެފައިވެ އެވެ.
ވިންޓަ އޮލިމްޕިކްސް ނިންމުމުގެ ރަސްމިއްޔާތުގައި އެމެރިކާގެ ރައީސް ޑޮނަލްޑް ޓްރަމްޕުގެ ދަރިކަނބަލުން އިވަންކާ ވެސް ބައިވެރިވެވަޑައިގެންނެވި އެވެ.
ނޯތު ކޮރެއާ އިން އެމެރިކާއާ އެކު މަޝްވަރާ ކުރަން ބޭނުންވާ ކަމަށް ސައުތު ކޮރެއާ އިން ބުނިއިރު އެމެރިކާ އިން ވަނީ ނޯތު ކޮރެއާއާ ދެކޮޅަށް ވަރުގަދަ އިގްތިސާދީ ދަތިކުރުމުގެ ފިޔަވަޅުތަކެއް އަޅައިފަ އެވެ. އަދި އެ ފިޔަވަޅުތަކަށް ރައްދު ދިނުމުގެ ގޮތުން ނޯތު ކޮރެއާ އިން ބުނެފައި ވަނީ އެއީ "ހަނގުރާމައިގެ އަމަލެއް" ކަމަށެވެ.