27 ފެބުރުއަރީ 2018 - 07:08
ދަތުރުފަތުރުކުރުމުގައި ތިމާވެއްޓާ އެންމެ ރަހުމަތްތެރި ވަސީލަތަކީ ބައިސްކަލެވެ. ލުއި ފަސޭހަ ބައިސްކަލުތައް އަންނަނީ އިތުރުވަމުންނެވެ. މިހާރު އުޅެނީ އެލުމިނިޔަމަށް ވުރެ 10 ގުނަ ބާރުގަދަ، އެކަމަކު 33 ޕަސެންޓް ލުއި މާއްދާއެއް ކަމަށްވާ ކާބަން ފައިބަރުން ހަދާފައިވާ ބައިސްކަލެއް އުފައްދައިގެންނެވެ.
ނިރީކާ އަލްޓްރާ ލައިޓް ސްމާޓް އީބައިކަކީ ބަރުދަނުގައި 16 ކިލޯ ވެސް ހަމަނުވާ ބައިސްކަލެކެވެ. އަދި އެހާ ސްމާޓް ވެސް ބައިސްކަލެކެވެ.
މޮނޮކޯކް ކާބަން ފައިބަރުން ފަރުމާކޮށްފައިވާ މި ބައިސްކަލުގައި އަޅުވާފައިވާ 500 ވޮޓުގެ ބާރުގަދަ މޯޓަރުގެ އެހީގައި ގަޑިއަކު 20 މޭލު ބާރުމިނުގައި ދުއްވާލެވެއެވެ. މޯޓަރާ ނުލައި 10 ސްޕީޑްގެ ޝިމާނޯ ގިއަރުން ފަސޭހަ ދުވެއްޔެއްގައި ދުއްވަންވީއެވެ. އެކްސް ފިޔުޝަން ޝޮކް އެބްޒޯބަރާއި ބާރުގަދަ ބުރަކީގެ ސަބަބުން ހިތްފަސޭހަކަމާއެކު ބައިސްކަލުގައި ބުރެއް ޖަހާލެވޭނެއެވެ.
މީގައި އަޅުވާފައިވާ ބާރުގަދަ ކިޔުބް ހެޑްލައިޓާއި 180 ޑިގްރީއަށް ދިއްލޭ ފަހަތުބައްތީގެ ސަބަބުން ރައްކާތެރިކަން ކަށަވަރުކޮށްދެއެވެ. ހުންގާނުމަތީގައި ސްމާޓްފޯނަށް ވަކި ޖާގައެއް އޮވެއެވެ. ޔޫއެސްބީގެ އެހީގައި، ފޯނު ޖަހާފައި ހުރިހާ ހިނދަކު ބައިސްކަލު ދަތުރުކުރާ މަގު ޖީޕީއެސް އިން އަންގައިދެއެވެ.
ނިރީކާ އީބައިކަކީ އަތްފޯރާ އަގެއްގައި ލިބެން ހުރި ބައިސްކަލެކެވެ. މީގެ މޮޅުކަމާއި ސްމާޓްކަމާ ބަލާފައި މީގެ ބައިސްކަލު ވިއްކަމުންދަނީ 799 ޑޮލަރަށެވެ.